أفكار هدايا رومانسية للعريس تحسسه إنك مهتمة بيه

هتبدأي حياة جديدة مع شريك حياتك ومحتاجة أفكار هدايا رومانسية للعريس تفاجئيه بيها قبل الفرح أو بعده؟؟ بالتفصيل هنقولك على مجموعة هدايا رومانسية جدًا هتختاري منها اللي يناسب شخصية زوجك، أو تحسي إنها بتعبر عن علاقتكم.

أفكار هدايا رومانسية للعريس يوم الفرح

أول حاجة هنركز فيها إنك تفاجئيه يوم الفرح، سواء بهدية هو كان نفسه فيها، أو هدية عايزة توضحي من خلالها الرابط بينكم وفرحتك ببداية حياتكم الجديدة:

هدايا كلاسيكية أنيقة

ودي فيها مجموعة من الخيارات، مثلًا لو بيحب الساعات الكلاسيكية اختاري ساعة هو بيحبها. أو لو مهتم بالأقلام القيمة فاجئيه بأقلام ماركة شهيرة وشكلها شيك. لو أزرار قميص منقوش عليها حروف أساميكم.

رسالة بخط إيدك

مهما كانت المراسيل المكتوبة الأيام دي بتتعمل بتصاميم مميزة وبيعملها ناس محترفين. إلا إن كتابتها بخط ايدك هتبقى ليها أهمية تانية خالص، سواء هتعبري فيها عن مشاعرك أو هتوصليله رسالة تخص حياتكم الجاية.

ألبوم الذكريات المصور

ودا بقى تجميع كل لحظة حلوة مرت عليكم، ممكن الألبوم يبقى فيه صور أو ملاحظات. ممكن كمان تكتبي فيه عن أماكن تتمني تزوريها معاه، أو قائمة أمنيات لحياتكم الزوجية.

أفكار هدايا رومانسية للعريس بعد الفرح

والهدية دي معادها أول ما توصلوا عشكم الجميل، هتقدمي الهدية وتعبري بيها عن حبك ليه وفرحتك ببداية حياتكم الجديدة:

• معدات رياضية: لو جوزك من المهتمين باللياقة البدنية هيتبسط جدًا إنك تجهزي في شقتكم معدات رياضية تنفعه خاصة في الأيام الأولى للجواز اللي مش هيقدر يسيبك فيها وينزل الجيم.
• جهاز ألعاب: حسب بقى ما بيحب وغالبًا هيكون بيحب البلايستيشن، فلو سعره غالي عليكي ممكن تجيبي دراعات بلايستيشن قيمة أو سماعات حلوة. بحيث تكون هدية فعلا هتفرحه أول ما يشوفها ويحسب باهتمامك.
• عشاء رومانسي: طبعًا في خيال كل الأزواج إنهم هيعيشوا أجواء رومانسية طول الجواز. ودي رغم إنها مش حقيقة لكن على سبيل تحقيق حلمه أول يوم في حياته الجديدة ممكن تحضري عشاء رومانسي. خاصة وإن الأكل هيكون جاهز ومتوفر كل اللي عليكي تكملي باقي أجواء الرومانسية.

أفكار هدايا رومانسية للعريس في شهر العسل

خليكي متأكدة إن كل اهتمام بالهدايا هيعود عليكي. يعني لما العريس يلاقيكي مهتمة بتقديم هدايا يوم الفرح وفي شهر العسل وغيره طبيعي هيبقى فيه اهتمام متبادل. عشان كدا اهتمي جدًا بالهدايا حتى لو بسيطة لكن يكون فيها لمسة مميزة:

• قائمة مستقبلية: ممكن تقديمها في دفتر شيك ولطيف، تكتبي في صفحاته الأولى خطط لحياتكم وتشاركيه الخطط دي وتتفقوا تكملوا تخطيط في الدفتر لباقي حياتكم.
• خططي لمغامرة: شوفي المكان اللي هتقضوا فيه شهر العسل مشهور بأماكن مغامرات ولا لأ. ولو هو مثلًا بيحب أجواء التخييم جهزي متطلبات الرحلة وفجئيه بيها.
• ذكرى من المكان: لكل مكان في الدنيا هدايا تذكارية خاصة بيه، اختاري هدية من المكان اللي هتسافروا ليه تكون ليها علاقه باهتماماته وفي نفس الوقت تفكره بالأيام اللي قضيتوها في المكان دا.

أفكار هدايا رومانسية للعريس بعد شهر العسل

تقريبًا فترة الخطوبة وما بعدها وصولًا ليوم الفرح وحتى شهر العسل دا كله إنتم لسه مبدأتوش حياتكم مع بعض. فلو إنتي بتهتمي بتقديم هدايا في كل مناسبة، فمناسبة وصولكم بيتكم وبداية حياتكم الفعلية مع بعض دي أهم مناسبة، عشان كدا ركزي جدًا في إن الهدية تكون ليها علاقة بتوقعاتك وأمنياتك:

• مكان للبلايستيشن: حددي جزء في الشقة ممكن يلعب فيه بلايستيشن خاصة مع أصحابه. وجود جزء زي دا هيحسسه إن وجوده في البيت مهم، وإنك تفضلي وجوده مع أصحابه في البيت أكثر من غيابه عن البيت عشان يقضي وقت مع أصحابه.
• ركن قراءة: لو بيهتم بالقراءة جهزي ركن خاص ليها، يكون في كرسي مريح ومكتبة لطيفة وبسيطة. هيفرق معاه جدًا اهتمامك، ولو انتي كمان مهتمة بالقراءة هيكون الركن دا ملجأ ليكم من كل الضغوط.

المهم من كل أفكار هدايا رومانسية للعريس إنها تكون طالعة من قلبك، وعايزة تقدميها تعبيرًا عن حبك.

اقرأ أيضًا: تجهيزات شهر العسل للعروسة.

اقرأ أيضًا: نصائح للعروسة بعد كتب الكتاب.