ما هي فحوصات قبل الزواج التي يجب عليك عملها؟

زي ما بتهتم بكل تفصيلة قبل الفرح زي تشطيب الشقة بالكامل، وتفكير في المصاريف والمسؤوليات بعد الجواز، لازم بردو تفكر في صحتك وتهتم بيها عشانك وعشان أسرتك المستقبلية.

النهاردة هنتكلم في موضوع مهم، وهي فحوصات قبل الزواج اللي لازم يعملها العريس، وهنقولك ايه الأماكن اللي ممكن تعمل فيها الفحوصات دي. 

ما هي فحوصات قبل الزواج؟

فحوصات قبل الزواج هي عبارة عن عمل بعض التحاليل الطبية ، والغرض منها هو الكشف عن الأمراض الوراثية واللي ممكن تتنقل للأبناء، وكمان الكشف عن الأمراض اللي ممكن تتنقل من الزوج للزوجة، والفحوصات دي بيعملها الطرفين عشان يطمنوا على صحتهم. 

أنواع فحوصات قبل الزواج

الأمراض غير المُعدية

مرض السكر

ودة لأنه من الأمراض المنتشرة في مصر، ولو تم اكتشاف وجود مرض السكر لازم المريض يتابع مع دكتور متخصص، ويلتزم بالتعليمات والأكل الصحي. 

السمنة

ودة من أهم فحوصات قبل الزواج، لأنها ممكن تكون بداية للإصابة بأمراض كتير زي: السكر وارتفاع كوليسترول الدم ، وأمراض القلب. 

الضغوط النفسية

مع ضغوطات الحياة، فيه ناس كتير بيجيلها أمراض نفسية زي الاكتئاب والقلق، وبيترتب عليهم أمراض مناعية.

الأمراض المُعدية

وهي أمراض بتنقلها الفيروسات أو البكتريا، زي الأمراض المنقولة جنسيا، والأمراض المنقولة من الأم الحامل للجنين زي:

فيروس B

واللي بيسبب تليف كبدي، ولو تم إهماله يسبب سرطان في الكبد، ولازم الفحص دة يتعمل علشان أعراض فيروس B مش بتبان بسهولة، وبتبان بس مع تدهور الحالة. 

فيروس C

بيسبب مشاكل في الكبد زي التليف الكبدي والأورام السرطانية، ويتم أخذ العلاج المناسب له في حالة الإصابة.

الإيدز

الإيدز من الأمراض اللي لازم تكتشف مبكرا، ودة لأنه بياخد سنين كتير في العلاج، وكل مدى بيقلل المناعة لو متعالجش. 

عامل ريزوس أو RH

ودة من التحاليل المهمة عشان ميحصلش مشكلة للأم أثناء الحمل والولادة.

والتحليل دة بيقوم بيه الزوجين، ولو طلع إيجابي مفيش مشكلة، ولو طلع سلبي لازم الأم تاخد مصل بعد الولادة علطول، أو في خلال ٣ أيام من الولادة. 

الأمراض الوراثية

انتشار الأمراض الوراثية بين الأطفال مشكلة كبيرة في مصر، ودة بسبب انتشار زواج الأقارب، والأمراض الوراثية تعتبر من الأمراض الخطيرة، واللي لازم تكتشف في أوقات مبكرة من عمر الطفل زي:

أنيميا البحر المتوسط ( الثلاسيميا)

وهو من الأمراض المنتشرة في مصر، وهو خلل في الجينات، ويسبب فقر الدم، ودة لأنه بيقلل من عدد كرات الدم الحمراء في الدم، واللي دورها نقل الأكسجين لكل خلايا الجسم.

فحص السائل المنوي

وهو من التحاليل المهمة، واللي بتحدد إذا كان فيه مشكلة في الإنجاب مستقبلا أو لأ ، ويشمل فحص عدد وجودة الحيوانات المنوية. 

فحوصات قبل الزواج في مصر

تهتم وزارة الصحة المصرية بعمل توعية للمقبلين على الزواج عشان يطمنوا على صحتهم، وخصوصا الصحة الإنجابية، والتجربة نجحت بشكل كبير، وكشفت عن أمراض كتير. 

اماكن اجراء فحوصات قبل الزواج

1. التوجه لأقرب مكتب صحة ليك للاستفسار عن الفحوصات.
2. المستشفيات التابعة لوزارة الصحة المصرية، واللي بيتم فيها التحاليل مجانا وفي سرية تامة زي مكتب الصحة.
3. معامل التحاليل الخاصة.

اقرأ أيضا: هرمونات تؤثر على وزن العروسة قبل وبعد الفرح

اقرأ أيضا: تجهيزات العريس للفرح من الألف للياء