ديكورات تزيين الحوائط لأوض عشكم الجديد

وانتم بتجهزوا بيتكم الجديد اكيد فكرتم في دهانات الشقة وكل أوضة، لكن مش شرط ان الدهانات بس هي اللي تكون مناسبة في كونها ديكورات تزيين الحوائط.

فعلى الرغم من وجود قطع كتير من الديكور ممكن تزين كل أوضة في الشقة، إلا إن منظر الحيطان وهي فاضية كدة معليهاش غير الدهان، ممكن يبوظ المنظر كله، وعشان كدة فيه كتير من الديكورات اللي تقدروا تستخدموها في كل أوضة على حسب نوعها؛ علشان تنور المكان وتضيف له حياة وبهجة.

وفي المقال ده احنا هنحاول نقدم لكم أفكار مختلفة تساعدكم تزينوا حيطان بيتكم بأشكال متنوعة.

سواء كان ورق حائط أو استيكرات جدران، وكمان هنحاول نعرفكم ايه المناسب لكل حاجة منها في كل أوضة مختلفة من أوض البيت؛ فتابعوا معانا المقال.

ديكورات تزيين الحوائط باستخدام ورق الحائط:

لو مش حابين تتعبوا في اختيار ألوان دهانات مناسبة، وحابين تغيروا منظر أوض بيتكم كل فترة.

فممكن تلجأوا لاستخدام ورق الحائط، وفي الحالة دي هتحتاجوا تدهنوا الحيطان بس وش أساسي من غير ما تهتموا باختيار لون معين، وبعد كدة تختاروا ورق الحائط المناسب لذوقكم.

في ورق حائط كوري وده نوع رسمي بيتميز بتصميماته الهندسية الهادية وألوانه الحيادية.

وعادة بيكون ورق سميك مقاوم لحرارة الجو والرطوبة، وكمان بيكون قابل للمسح والتنضيف.

ونوعيته ومميزاته دي بتخليه مناسب جداً لأوض استقبال الضيوف الرسميين زي الصالون أو أوضة المكتب لو هتعملوا أوضة مكتب في بيتكم.

وكمان فيه ورق حائط إكليرك، وعادة بيكون لونه فضي، وده بيخليه يدي مظهر عاكس للأوضة اللي بيكون فيها.

والانعكاس ده بيدي إحساس بوسع المكان، وبيزود أناقته، وده بيخليه مناسب للاستخدام في أي أوضة في البيت.

وبالنسبة لأوض الليفينج ممكن نستخدم فيها ديكورات تزيين الحوائط من ورق الحائط اللي بمظهر حجري.

وده بيدي مظهر للأوضة وكإنها لسة على الطوب الأحمر؛ فبيدي إحساس حميمي وتاريخي للمظهر العام.

وكمان عادة ما بيتميز بكونه بيوفر عزل حراري للأوضة.

أما لو كنتم من محبي المناظر الطبيعية، وكان نفسكم تعيشوا حياة برية وسط الطبيعة.

بس طبعاً في عصرنا ده شيء مش متاح، لكن ممكن تعوضوا ده بإنكم تستخدموا ورق حائط في الأوض اللي بتقضوا فيها أطول وقت سواء أوض النوم أو الليفينج للمناظر الطبيعية.

وبكدة ممكن تنطلقوا في الأدغال مع بعض طول اليوم.

ملصقات جدران ذهبية:

ودي تقدروا تستخدموها كقطع ديكورات تزيين الحوائط بشكل متفرق، لإن فكرتها بتقوم على إنكم تستخدموها زي إطار خارجي يبرز بعض قطع العفش أو الأجهزة في البيت؛ فممكن مثلاً تستخدموها حوالين التلفزيون في أوضة الليفينج، أو حوالين المراية في الحمام، أو حوالين ضهر السرير في أوض النوم، وهكذا.

وهي عادة بتكون مصنوعة من البلاستيك، وبتتلزق على الحيطة زي الاستيكر.

وبتتباع على هيئة قطع مربعات صغيرة منفصلة بتشتروا منها الكمية المناسبة ليكم عشان تكفي الإطارات اللي انتم محتاجينها.

وفي منها برضه على هيئة دواير مفرغة سواء فضي أو دهبي، ودي تقدروا تستخدموها في أوض الليفنج والصالون.

ومميزاتها في الحالة دي إنها بتعكس الإضاءة في كل جوانب الأوضة، وكمان مبتخبيش دهان الحيطة لو حابيين تظهروه وتستغلوا ألوانه.

ديكورات تزيين الحوائط لغرف الأطفال:

سواء ده كان جوازكم التاني وعندكم أطفال من جواز سابق.

أو كنتم عروسين جداد بتتجوزوا لأول مرة بس حابين تجهزوا كل أوض الشقة من البداية.

فهيكون من المناسب إنكم تستخدموا ديكورات تزيين الحوائط في أوض الأطفال على شكل استيكرات بتتلزق على الحيط.

وده عشان يبقى من السهل على الطفل إنه يغيرها في كل فترة لما ذوقه يتغير.

ويحس إن أوضته بتتشكل على ذوقه هو.

ومن أشكال استيكرات الحوائط اللي ممكن تستخدموها في الحالة دي بتكون استيكرات على شكل عربيات أو كرة قدم في أوض الولاد.

أما في أوض البنات فممكن نستخدم استيكرات على شكل حيوانات أليفة بيحبوها زي القطط والطيور والفراشات أو شخصيات أميرات ديزني.

ولو الأوضة مشتركة بين بنت وولد؛ فممكن نحط لكل واحد فيهم الاستيكرات المناسبة ليه في الجنب المخصص ليه عند سريره ومكتبه.

ولإن عادة الأطفال بيخافوا يناموا في الضلمة وبيحبوا يكون فيه نور جمبهم في الأوضة وهم نايمين؛ فممكن نستخدم استيكرات على السقف كمان.

وده باستخدام استيكرات فسفورية بتنور في الضلمة على شكل نجوم وقمر أو مجموعة الكواكب الشمسية.

وده هيدي منظر جميل للأوضة ويخليهم يناموا بأمان وسعادة طول الليل.

وفي نهاية المقال نتمنى إننا نكون فيدناكم بأفكار ديكورات تزيين الحوائط اللي تقدروا تستخدموها وانتم بتجهزوا عشكم الجديد، وألف مبروك مقدماً.