الحياة الجنسية السليمة... 14 قاعدة لصحة أفضل لك ولشريكة حياتك

من أكتر التحديات اللي بيفكر فيها كل عريس وعروسة هي ازاي حيقدروا يسعدوا ويفرحوا بعض.. في المقال دة حنقولك على بعض قواعد الحياة الجنسية السليمة اللي لو حققتوها حتعيشوا حياة سعيدة خالية من المشاكل .

النقاش مهم من أجل الحياة الجنسية السليمة!

النقاش هو أهم عنصر في الحياة الزوجية والجنسية حتى يتعرف كل طرف على أفكار وتفضيلات الطرف الأخر.

بعد الفرح بقيتوا تحت سقف واحد خلاص. اتكلم كتير مع زوجتك عن حياتكم الجنسية، وازاي تقدروا تسعدوا بعض وكل طرف محتاج ايه من الطرف التاني، واتكلموا عن الأمور المفضلة ليكم.

التوتر والعلاقة الزوجية

التوتر يفسد دائما علاقة الزوجين ببعضهما بسبب التفكير الزائد والخوف من رد فعل الطرف الأخر.

التوتر دايما هو مفسد الحياة الجنسية بين الزوجين.. وأنت عليك دور كبير أنك تقلل توتر زوجتك خصوصا في بداية الزواج.. طمنها وفكرها بحُبك ليها في كل الأحوال واتكلم معاها دايما عن سبب توترها وهدّيها.

ممارسة الرياضة والحياة الجنسية

ممارسة تمارين اليوجا يساعد على تحسين الحالة البدنية للأزواج مما يؤدي إلى حياة جنسية صحية.

فيه تمارين رياضية كتير تقدروا تعملوها وخصوصا لو حاسين بمشكلة في العلاقة الجنسية زي تمارين كيجل واللي بتساعد على تقوية عضلات الحوض، وهي من التمارين السهلة اللي ممكن تعملوها في البيت، وتمارين اليوجا أيضا.

اسأل الأطباء والمتخصصين.. مش عيب!

اسأل استشاري العلاقات الزوجية في حالة وجود مشكلة في علاقتكما الزوجية.

بلاش تحس بحرج أنك تسأل طبيب متخصص في العلاقة الزوجية أو استشاري العلاقات الأسرية وخصوصا لو لاحظتوا وجود مشكلة في ممارسة العلاقة الزوجية لأن الزيارة دي حتفرق معاكم وحتلاحظوا بتغيير كبير بعدها.

خصوصية الحياة الجنسية بينكم!

الخصوصية بين الزوجين أمر ضروري ولذا لا يجب أن يعرف أحد عن طبيعة العلاقة بينكما!

للأسف في عصر التكنولوجيا والنت بنلاقي ناس بتحكي عن مشاكلها الزوجية، ودة تم تحريمه دينيا . حاولوا أن علاقتكم الخاصة تكون كتاب مقفول بينكم أنتوا الاتنين بس، ومحدش يعرف حاجة عنكم.

تجربتك غير تجربة الأخرين!

متاخدش تجربة صاحبك أو قريبك مثال لك، ودة لأن لينا اختلافات، وكل شخص له تفضيلاته وتفكيره، ومتحاولش أنك تحكي مشكلة تخص الموضوع دة وخصوصا لصاحبك. لازم تتواصل مع الطبيب فورا!

النظافة الشخصية.. أهم عنصر في الحياة الجنسية

النظافة الشخصية للزوج والزوجة مهم جدا قبل وبعد ممارسة العلاقة الخاصة لمنع وجود الاتهابات وانتقال أي عدوى.

لازم تحط في اعتبارك أن النظافة هي أهم سر لنجاح العلاقة الجنسية والزوجية، ومنع انتقال الأمراض الجنسية أو أن طرف ينفر من الطرف الآخر وخصوصا قبل وبعد ممارسة العلاقة الخاصة.

استخدام المزلقات مش رفاهية!

المزلقات من الحاجات اللي حتساعدكم في ممارسة علاقة زوجية ممتعة، وخاصة في بداية الزواج، واستخدامه من أهم عوامل العلاقة الزوجية السليمة.

الواقي الذكري.. أهم عنصر في الحياة الجنسية السليمة!

لضمان علاقة جنسية صحية بين وبين زوجتك استخدم الواقي الذكري لمنع انتقال العدوى وإذا قررتما تأجيل الحمل.

ضروري جدا استخدام الواقي الذكري أثناء العلاقة الجنسية وخصوصا لو فيه عدوى أو التهابات لمنع انتقال أي أمراض جنسية، واللي بيكون فيه منها أمراض خطيرة.

الرضا بشكل شريكة حياتك مهم!

احنا بشر، ولازم تكون مدرك أن الجسم بيكون فيه عيوب مش بنقدر نصلحها، ونفس الحكاية جسم زوجتك ممكن يكون فيه عيوب، فمتقللش ثقتها في نفسها ولا تحسسها بوجود مشكلة عندها.

التجديد في العلاقة الزوجية

التجديد بين الزوجين مهم جدا لمنع وجود الملل بينهما مثل عمل مفاجئة من الزوج لزوجته والعكس.

مع روتين الحياة الممل ساعات بتحسوا بزهق في علاقتكم مع بعض، فممكن تحاولوا تجددوا في علاقتكم الخاصة بطرق كتيرة ومختلفة، وممكن تستعينوا بالإنترنت أو متخصص في العلاقات الزوجية علشان تستفيدوا بمعلومات أكتر!

الابتكار في علاقتكم سوا.. ضرورة

تناول العشاء خارج المنزل فكرة جيدة إذا أردتم التجديد في العلاقة الزوجية.

يعني ممكن تتعشوا برة أو تلبسوا طقم جديد أو تتفرجوا على التليفزيون سوا، أو تروحوا أي رحلة تغيروا فيها جو، وتجددوا حبكم واهتمامكم ببعض!

الفحص الطبي الدوري

عمل فحوصات طبية ضرورية قبل الفرح وبعد الزواج علشان لو فيه أي مشكلة تقدروا تحلوها بسهولة.

نصيحة مهمة!

وأخر نصيحة ممكن نقولها هي أن بلاش خوف من المجتمع، ومن أفكاره اللي معظمها بتكون غلط طبيا وبتأثر على العلاقة الجنسية بشكل كبير وعلى علاقتكم الزوجية طول العمر.

هل محتوى المقال دة كان مفيد بالنسبة لك؟

نعم، مفيد!لا!