في 10 خطوات… ازاي تستمتع في شهر العسل!

شهر العسل من الأيام اللي تقدر تستجم فيها أنت وعروستك، وتنسى أي ضغوطات ومسؤوليات. والنهاردة حنقولك نصايح قالها عرسان مروا بالتجربة دي علشان تكون دليل ليك.

1- اهتم بأناقتك في شهر العسل

لازم تكون شخص أنيق وتهتم بشكل لبسك، ومتنساش تجيب عطر مميز أيضا تختاره أنت وشريكة حياتك مع بعض، لأن الدراسات بتقول أنك ممكن تستخدم عطر يفكرك بذكريات بتحبها بعد كدة.

2- النظافة الشخصية

النظافة الشخصية مهمة في جميع الأوقات، ولكن لازم تهتم بيها زيادة في الفترة دي على سبيل المثال:

• حلاقة الذقن وتهذيبها لو بتحبها بإستايل معين مثلا.
• إزالة الشعر الزائد من الجسم.
• خد شاور يوميا.
• استخدم مزيل العرق باستمرار. 
• اغسل أسنانك مرتين يوميا.

3- ابعد عن أي أفكار سلبية في شهر العسل

بلاش تفكر في الشغل وفي المسئوليات اللي عليك بعد الجواز، وخصوصا المصاريف بعد ما فتحت بيت جديد، وحاولوا تستمتعوا بكل لحظة، وتبتكروا أفكار رومانسية.

4- اتصوروا كتير!

الصور هي أكتر حاجة بتوثق لحظات الشخص، وخصوصا لو لحظات حلوة وممتعة مش بتتكرر كتير، ونصيحتنا اتصوروا كتير وجمعوا الصور في ألبوم مثلا وكل فترة اتفرجوا على الصور دي.

5- خليك رومانسي طول الوقت!

حاول تخللي الرومانسية والكلام الحلو جزء من يومكم حتى لو دقائق، ودة مش عيب أو حاجة غريبة؛ لأنها هي الحاجة اللي حتقربكم أكتر من بعض خصوصا وقت الضغوطات.

6- اتكلموا مع بعض كتير!

الكلام والنقاش مع شريكة حياتك هي أهم نصيحة قالها كذا عريس، ودة لأنه حيقربكم لبعض أكتر، وحتفهموا شخصيات بعض بسرعة، وبالتالي دة بيقلل الخلافات بعد كدة بينكم.

ومفيش وقت أفضل من شهر العسل تتكلموا. افتحوا قلوبكم لبعض واتناقشوا في أفكاركم وكل طرف فيكم منتظر ايه من شريك حياته بعد كدة.

العلاقة الزوجية في شهر العسل

الفترة دي هي أكتر فترة بتكونوا فيها رايقين، ومفيش أي ضغوطات، فبالتالي بتكون العلاقة الخاصة سهلة في أوقات كتيرة.

7- استمتعوا بالعلاقة الخاصة

شهر العسل هي أكتر فترة حتقدروا تكتشفوا بعض، وتعرفوا تفضيلاتكم الجنسية، والتنوع في العلاقة الخاصة في شهر العسل مهم، لأنها حتسيب معاكم ذكريات حلوة مش حتنسوها.

8- تعمل ايه لو حسيت أن فيه مشكلة في العلاقة الزوجية في شهر العسل؟

في الفترة دي ممكن يظهر مشكلة في ممارسة العلاقة الزوجية، ودة طبيعي جدا لأنكم لسا في بداية حياتكم، ومفيش عندكم خبرة كافية في الموضوع ده.

 نصائح مهمة

• اتواصلوا مع متخصص في العلاقات الزوجية واحكوا المشكلة اللي عندكم. ودة فرق مع أزواج جداد كتير فعلا.
• لازم تكون هادي ومش متوتر، وتنسى ضغط المجتمع اللي حواليكم؛ لأن دي خصوصيات بينك أنت وزوجتك فقط.
• بلاش المشكلة دي تأثر على استمتاعكم بالفسح والخروجات.

9- ظبط ميزانيتك كويس

لازم تكون عامل لنفسك ميزانية معينة، وبناءا عليها تختار الأماكن اللي حتتفسحوا فيها، وتعمل حساب لأي مفاجئة ممكن تحصل وأنتوا مسافرين، ومتقلقش أيا كان ميزانيتك ايه حتعرفوا تتبسطوا لأن فيه أماكن كتيرة ومتنوعة أيضا لقضاء شهر عسل مميز.

10- حضر برنامج مميز!

مهم جدا تعمل خطة للأماكن اللي عايزين تروحوها، وخصوصا لو حتقضوا وقت طويل في اجازة شهر العسل، واستكشفوا المكان اللي حتروحوه من الانترنت أو أصحابكم على سبيل المثال، وبكدة حتعملوا برنامج مميز لا يُنسى.

نصيحة أخيرة! 

كلنا عارفين أن الحياة مليئة بضغوطات ومسئوليات كتيرة لا تنتهي. حاول أنك تعيش اللحظة، وتنسى أي حاجة، واعرف أنكم بايديكم تقدروا تخللوا حياتكم كلها رومانسية بالمودة والرحمة والاحترام.

اقرأ أيضا: رحلة شهر العسل إزاي تختاروها؟