فستان جدة العروسة اللي هتحضر بيه يومك المميز إزاي تختاريهولها؟

فستان جدة العروسة أكيد بيكون شيء محير ليكي في اختياره خصوصاً لو جدتك من الناس الكبيرة اللي ملهاش في حضور الأفراح والمناسبات والخروج كتير من البيت.

بس أكيد طبعاً انت يهمك وجود جدتك معاكي في يوم زي ده، وإنها تظهر بأحلى مظهر بين كل الحضور.

جدتك أكيد كان ليها دور خاص ومهم في حياتك طول الوقت.

وأكيد هتحبي إن دورها يكمل بوجودها معاكي في يومك المميز.

وعشان كدة احنا هنا في المقال ده جبنا لك أفكار لفساتين تقدر تناسب سن وذوق جدتك.

وفي نفس الوقت تكون شيك وأنيقة تناسب أجواء فرحك اللي اختارتيه.

وكل اللي عليكي تعمليه إنك تختاري فكرة من الفساتين دي تعجبك وتعجب جدتك عشان تلبسها في فرحك.

فتابعي معانا المقال.

فستان جدة العروسة اللامع بتصميم A:

الفستان من النوع ده هيكون مناسب جداً مع ذوقك جدتك؛ لإنه أقرب في ستايله لموضات عصرها ووقتها.

فهو بيتميز بكونه طويل مكسي وبأكمام طويلة، ولكن في نفس الوقت فتحة الرقبة فيه بتخليه يبرز جمال الجسم.

ولو جدتك محجبة فأكيد سهل تداري الفتحة بالطرحة، ده غير إن الترتر اللي بيزينه بيديه مظهر احتفالي رسمي جميل.

وأفضل الألوان المناسبة للفرح إنكم تختاروه باللون الدهبي.

الفستان المطرز بالخرز:

وده برضه هيكون مناسب لذوق الجدات ورغبتهم في الحشمة مع أناقته العالية.

لإنه عادة بيكون فستان مكسي بأكمام طويلة وصدر مقفول.

لكن دم ميمنعش إن قصاته المنفوشة من الوسط، وتطريز الزهور عليه اللي بتترصع بالخرز والكريستالات بتديله مظهر شيك جداً.

وممكن تختاري الفستان يكون سك من قماش التل، مع تطريز بالخرز.

الشكل ده مستوحي من موضات القرن الماضي هيكون مناسب جداً في فستان جدة العروسة.

تايير الجدات:

أكتر حاجة بيحبوها الجدات طول الوقت في اللبس هي التييرات، بترجعهم لزمن موضة التمانينات والسبعينات الجميل.

ولو جدتك من النوع ده؛ فهيبقى من الأنسب ليكم إنك تختاري لها تايير على ذوقها ويناسب ذوق الفرح كمان.

وتقدري تختاري في الحالة دي إنه يكون مكون من جيبة شيفون رقيقة بتصميم على شكل A مع بلوزة صغيرة من فوق من غير أكمام من الدانتيل وعليها جاكت رقيق بنفس التصميم والقماش.

فستان جدة العروسة يشبه التايير:

أما لو جدتك مبتحبش تلبس حاجات كتير مع بعض لكن في نفس الوقت بتحب مظهر التايير؛ فتقدري تختاري لها نوع من أنواع الفستان ده.

ودي فساتين كاملة ولكنها بتبان كإنها قطعتين مختلفتين بحيث إن الفستان بيكون كامل لكن فوقيه عباية شيفون صغيرة لحد الوسط.

ودي بتخليه يظهر كإنه عبارة عن بلوزة شيفون رقيقة مع جيبة سواريه شيك هتخلي مظهر الفستان أحلى ما يكون.

أو ممكن تستثمري الفكرة دي بشكل مختلف وتكون عباية الشيفون عباية ضهر بس.

بحيث تبرز الفستان كله من قدام وتديه مظهر شيك وأنيق من الخلف.

شيفون ودانتيل وترتر:

وتقدري تمزجي بين كل العناصر اللي ممكن تكون جدتك بتحبها في إنك تختاري لها طقم يكون فيه كل الموضات اللي هي بتحبها.

جيبة شيفون رقيقة مكسي مع بلوزة من الدانتيل مطرزة بحبات الترتر.

وبكدة هتبقى حافظت على شياكة زمان وحشمة سنها وكمان تبقى أشيك الجدات في الفرح.

الفستان الدانتيل:

أما لو هي بتحب الدانتيل فعلاً وده ذوقها الكامل؛ فتقدري تستثمري ده في إنك تختاري لها فستان كامل من الدانتيل.

وتقدري تنوعي في اختياراتك على حسب استايلها، فتقدري تختاري فستان جدة العروسة يكون بتصميم حورية البحر.

وده تصميم بيبرز منطقة الوسط بشكل جميل من غير ما يكون ضيق أو يقيد حركتها.

ولو هي محجبة أو بتحب الاحتشام الكامل هتختاريه يكون مقفول وبأكمام طويلة.

أما لو جدتك مش محجبة ومعندهاش مانع إنها تلبس فساتين دراعتها مكشوفة.

فتقدري تختاريه يكون بفتحة صدر على شكل قلب مع أشرطة من الدانتيل على الدراع من فوق بدل الأكمام.

وفي نهاية المقال نتمنى إننا نكون فدناكي وقدمنا لك اختيارات ممتعة ليك وانت بتقرري تشتري فستان جدة العروسة.

ونتمنى إنك تلاقي لجدتك أحلى فستان ويكون يوم فرحك أسعد يوم مر عليكم في حياتكم، وبداية لأيام أسعد كتير جاية قدام.