فستان أخت العروسة… أفكار في اختيار الفستان اللي يخليها تنور في الفرح

طبعاً أكتر واحدة في الفرح بيبقى عليها العين بعد عروستنا هي أختها، وعشان كدة لازم تكون بأحلى وأجمل مظهر طول الفرح، ويكون فستان أخت العروسة هو تاني أحلى فستان بعد الفستان الرئيسي للعروسة نفسها.

وأكيد عروستنا الحلوة واختها تعبوا واحتاروا كتير وهم بيفكروا يختاروا أنهي فستان لليوم ده.

طبعاً خيارات الفساتين كتير ومالية الأسواق، وكل ما تستقروا على حاجة تلاقوا حاجة تانية أحسن منها وتفضل الحيرة مستمرة.

وعشان كدة أفضل شيء إنكم تنزلوا تشتروا وانتم مقررين من الأول انتم عايزين ايه بالظبط؟

وايه الموديل اللي هيناسبكم ويناسب أجواء الفرح اللي هتعملوه.

واحنا هنا في المقال ده قررنا نساعدكم، ونحاول نعرض لكم أفكار أفضل الموديلات المناسبة.

وانتم كل اللي عليكم تعملوه انكم تحددوا الموديل اللي هيناسب استايلها واستايل الفرح، وتشتروه بدون حيرة وقلق.

فتابعوا معانا المقال.

فساتين من الترتر بألوان معدنية:

فساتين الترتر الشيك من الفساتين اللي عمر موضتها ما تروح وبتفضل حية في كل مناسبة تديها الروح.

ومن أكتر الألوان اللي هتضيف أجواء احتفالية على فستان أخت العروسة من النوع ده هي الألوان المعدنية.

ودي زي الدهبي والفضي والبرونزي، وفي النهاية هيكون فستان رسمي يذهل أي حد يشوفه.

وهيكون سبب كبير لمدح جمال أختك وأناقتها، وإنها أحلى واحدة في الفرح من بعدك.

فستان أخت العروسة من القطيفة:

ولو الفرح هيكون في الشتا والجو برد خصوصاً لو هيكون أوبن اير.

فهتحتاج يكون اختيارها من الفساتين الشتوية اللي ممكن تدفيها.

وفي الحالة دي هيكون من المناسب ليكم إنكم تختاروا الفستان يكون من القطيفة، وفي أنواع كتير من الفساتين دي.

فممكن يبقى خياركم في الفستان إنه يكون متوسط الطول، وعليه نقشات من الورود الحمراء على خلفية القطيفة السوداء.

وممكن يبقى بأكمام قصيرة منفوخة مع فتحة صدر على شكل قلب تعمل توازن حلو بين الجمال والإثارة.

أما لو أختك محجبة فممكن برضه تحتفظ بخيار الفستان القطيفة، ولكن تجيبوه فستان ماكس طويل وبأكمام طويلة.

وفي الحالة دي ممكن يبقى طوله نازل بموديل ديل السمكة مثلاً، وأكمامه رفيعة على قد دراعها.

فساتين الساتان:

أقمشة الساتان دايماً مناسبة في اختيارها لحضور الحفلات والأفراح، ولو هتختاروها في فستان أخت العروسة فهي هتكون مناسبة جداً ليها.

وتقدروا تختاروا في الحالة دي بين تشكيلات وأنواع وألوان مختلفة من الفساتين.

ويمكن أكتر لون هيخليها تبان ملكة فيه هو اللون البنفسجي.

أما لو المظهر اللي بتفضلوه هو مظهر البنت الرقيقة الدلوعة؛ فممكن تختاروا اللون الوردي.

ولو مش محجبة فتقدر تختار الفستان بإنه يكون ميني دريس من غير حمالات، وتكمل زينتها بشال رقيق عليه.

ده غير إنكم مش لازم تلتزموا بالأفكار التقليدية بكون فستان أخت العروسة الساتان لازم يكون سادة.

لا تقدروا تختاروا فساتين ساتان منقوشة، زي إن الفستان يكون أخضر ومطبوع عليه أشكال لورود وأزهار بالألوان الأحمر والأبيض.

ده هيزود جمال الفستان وتألق أختك في الفرح بظهر مش تقليدي ومختلف عن أي حد تاني في الحضور.

بدل سواريه لأخت عروستنا:

أما لو بتحبوا الأفكار المطرقعة وانكم تذهلوا الضيوف بمظهر غير تقليدي مختلف عن اللي دايماً اتعودوا عليه.

فممكن تكسروا فكرة الفساتين المعتادة وتبدلوها ببدل سواريه، وفي الحالة دي تقدروا تختارو بدلة من الترتر القلاب بألوان مختلفة.

وده بحيث إنها كل ما تتحرك بيه يقلب على لون تاني، وعادة ده بيكون بين لونين زي البرونزي والأسود.

وبكدة هتخبل كل الحضور.

أما لو عايزين مظهر رسمي جاد فمفيش أحسن من اللون الأسود السادة هيقدر يديكم المظهر ده.

وفي الحالة دي تقدروا تختاروا البدلة من قماش ساتان أو كريب.

وكمان اللون الأخضر الغامق هيكون مناسب؛ لإنه هيدي المظهر الرسمي اللي انتم عايزينه، وكمان هو لون احتفالي مناسب للأجواء.

وحتى لو الفرح هيكون في الشتاء ومحتاجين تختاروا حاجة تدفي فخيار البدل السواريه ده هيكون مناسب جداً ليكم.

خصوصاً وإن في بدل منها من القطيفة ده غير إنها حتى في العادي قماشها بيكون أسمك من قماش الفساتين.

وده بيخليها أدفا.

فستان أخت العروسة مكشكش:

مين اللي قال إن الفساتين السواريه وحضور الأفراح لازم تكون فساتين رسمية سك؟ لو عندكم الجرأة غيروا كل المفاهيم دي وأعملوا ثورة في عالم السواريه.

اختاروا الفستان يكون طويل جزءه التحتاني متعدد الطبقات.

أو بكتف واحد مكشوف مع قماش مكشكش وبخلفية سوداء عليها طبعات لزهور متفتحة.

وفي النهاية نتمنى إننا نكون قدمنا لكم أفكار مفيدة في اختيار فستان أخت العروسة.

وساعدناكم في انكم تنتهوا من الحيرة والتردد فيه.

ونتمنى لكم فرح ممتع سعيد وانكم تستمتعوا بوقتكم فيه ويكون ذكرى جميلة ليكم كلكم على مر السنين.