فرح في الصيف … أفكار للاستمتاع بالأجواء

فرح في الصيف اللي خلاص داخلين عليه يعني الشمس هتكون بتشرق بشكل ساطع في كل يوم مع شوية نسمات لطيفة بين فترة والتانية.

وعلى الرغم من حرارة الجو في الفترة دي إلا حفلات الأفراح بتتمتع بتوهج خاص خلال الوقت ده.

وده بسبب ضوء الشمس المبهج والخضرة المبهرة في الطبيعة وتفتح الأزهار والورود.

ولما النسيم بيحرك فروع الأشجار المتمايلة ده بيدي برودة لطيفة في الجو.

كل الأجواء دي بتخلي الأفراح في الوقت ده ليها رونق خاص.

وبتتيح لكم إنكم تنفذوا أفكار وأنشطة مختلفة ليها طابع صيفي جميل؛ فلو فرحكم هيبقى الفترة الجاية في أجواء صيفية.

فاحنا هنا في المقال ده جمعنا لكم كل الأفكار اللي ممكن تحتاجوها في تنظيم تفاصيل فرحكم؛ فتابعوا معانا المقال.

تيمات فرح في الصيف:

بس في الأفراح الصيفية نقدر ناخد راحتنا في أفراح الأوبن إير، وبالذات في إننا نعمل الفرح على شط البحر.

الجو في الفترة دي هيوفر لكم حرية انكم تعملوا فرحكم على الشاطئ وانتم مش قلقانين من حاجة.

بالعكس ده هيضيف أجواء مرحة وممتعة على فرحكم؛ فممكن حتى تعملوا خطبة الجواز وكتب الكتاب على رمل الشط.

ده غير الأنشطة الساحلية والألعاب النارية اللي هتخلق ذكريات خاصة للعريس والعروسة وضيوفهم.

لكن برضه عشان تقدروا تستمتعوا بالفرح كويس من غير أي منغصات لازم تاخدوا بالكم من حالة الطقس يومها.

وعلى هذا الأساس تظبطوا معاها لبسكم وتنبهوا على ضيوفكم بأي مستجدات.

ويستحسن إنكم تستشيروا المسئولين عن تنظيم المكان في كل خطوة.

وسواء هتعملوا فرحكم على الشط أو في أي مكان تاني في الهواء الطلق برضه.

فمتنسوش تستثمروا منظر غروب الشمس في فرحكم، فالصيف بيتميز بمنظر غروب الشمس الجميل فيه والتوهج البرتقالي للشمس وهي بتغرب.

فتقدروا تخلقوا جو رومانسي بإنكم تخططوا إن فرحكم يبدأ مع الغروب.

وده لإن الصور اللي هتتاخد في الوقت ده وهيظهر فيها غروب الشمس في الخلفية مع أنوار المكان هتعمل لقطات خيالية في جمالها.

ولإن الموسم الصيفي هو موسم الفاكهة.

فمتنسوش في اختياراتكم لقوايم الأكل والمشروبات والحلويات إنكم تدخلوا فيها خيارات متنوعة من فاكهة الموسم.

ده غير ديكورات الزهور اللي بتتميز بيها الأجواء الصيفية سواء في بوكيه ورد العروسة أو البوكيهات المتوزعة على الترابيزات أو ديكورات تزيين الحوايط بالورد.

والألوان الناعمة في الورد اللي هتستخدموه في التزيين هيضيف أجواء باردة على المكان.

خصوصاً لو دمجتوا زهور دوار الشمس مع أنواع تانية من الزهور باللون الأزرق البارد، التركيبة دي هتساعد على إنكم تنقلوا نضارة الأجواء الصيفية للمكان.

وعموماً تقدروا تستخدموا في الديكورات ألوان درجات البرتقالي والوردي والأصفر عشان تضيفوا الطاقة والحيوية على المكان.

احتياطات الوقاية من الشمس وحرارة الجو:

على الرغم من إن فرح في الصيف يعني أجواء ممتعة زي ما قلنا فوق لكن ده ميمنعش برضه احتمالات التضرر من الشمس وحرارة الجو.

وعشان كدة لازم تاخدوا احتياطاتكم وانتم بتجهزوا لفرحكم في الوقت ده عشان تضمنوا راحتكم وراحة ضيوفكم كمان.

فلو هتعملوا فرحكم في مكان أوبن إير لازم تركزوا في اختيار توقيت الفرح خلال اليوم بحيث تتجنبوا أشعة الشمس المباشرة في أوقات النهار.

فممكن الفرح يبقى بعد العصر أو بالليل، وكمان حاولوا تختاروا مكان يكون درجة الحرارة فيه مش عالية وطبيعته بتخلي جوه فيه نسيم بارد خلال اليوم.

ده غير اهتمامكم بإن المكان يكون متوفر فيه أماكن فيها ضليلة ضيوفكم يقدروا يحتموا فيها من أشعة الشمس، ويكون متوفر مشروبات باردة طول الوقت خلال الفرح.

مظهر العروسين في فرح في الصيف:

الجو الحر ده طبيعي يكون ليه تأثير على مظهركم، في احتمالية كبيرة انكم تتعرضوا للحر والعرق خصوصاً مع كتر الحركة والرقص وبذل المجهود.

عشان كدة لازم تختاروا تسريحات شعر بسيطة متتبهدلش من الحركة الكتير ولا تبوظ مع العرق، ومتحسسكوش بالتوتر طول الوقت.

ده طبعاً غير اهتمامكم بطبيعة لبسكم انتم نفسكم، بالنسبة للعروسة يُفضل تختاري فستان خفيف يسمح لك بحرية الحركة وميحركيش.

وكمان يكون بيسمح بمرور الهوا فيه عشان ميكتمش على نفسك، زي الأورجازا الرقيقة والخفيفة أو التول الشبكي الناعم.

وده لإن الفساتين التقيلة في الأجواء دي بتدي إحساس بالكآبة، ونفس الشيء بالنسبة للعريس يُستحسن يختار بدلة بسيطة خفيفة.

وممكن يختار مظهر مش رسمي أوي بحيث تكون البدلة مظهرها بسيط وخفيف خصوصاً لو الفرح أوبن إير.

فممكن يختارها باللون الأبيض أو البيج أو أزرق فاتح عشان متبقاش تقيلة ومتمتصش الحرارة وأشعة الشمس.

وفي نهاية المقال نتمنى نكون قدمنا لكم أفكار ونصايح مفيدة تقدروا تستخدموها في فرح في الصيف وتستمتعوا بفرحكم الصيفي.

ونتمنى لكم بداية حياة زوجية سعيدة مليانة حب وفرح وهنا تدوم بينكم للأبد.