رحلة شهر عسل على الطريق السريع بطريقة غير تقليدية

خلاص هتبدأوا حياتكم الزوجية الجديدة مع بعض، بس عايزين تبدأوها بطريقة مختلفة ومجنونة؛ فإيه رأيكم في رحلة شهر عسل على الطريق السريع؟

المعروف دايماً إن العرسان الجداد بيطلعوا شهر العسل في فندق أو شاليه فاخر في منطقة سياحية ساحلية على البحر.

بس ده جو تقليدي أوي ومفيهوش أي تجديد، وممكن يتعمل في أي وقت.

لكن إنكم تقضوا أطول وقت مع بعض على طريق السفر دي تجربة مش هتقدروا تعوضوها في أي وقت تاني.

والتجربة دي هتخليكم تقدروا تتعرفوا على بعض أكتر وتعرفوا كل طباعكم في كل الأوقات.

وزي ما الناس زمان قالوا إن السفر هو اللي بيكشف طباع الناس.

ده غير إنكم هتعيشوا مع بعض مغامرات مش هتنسوها أبداً وانتم بتكتشفوا الدنيا حواليكم مع بعض.

وطبعاً الرحلة دي هتكون جوة مصر، على طريق السفر سواء اختارتوه صحراوي شرقي أو غربي على حسب تفضيلكم.

كل اللي هتحتاجوه إنكم تأجروا عربية كرفان لو هتباتوا في العربية.

أو عربية من نوع مناسب للطريق لو هتنزلوا تباتوا في الاستراحات أو الفنادق على الطريق أو في البلاد اللي هتزوروها.

واحنا هنا في المقال ده هنساعدكم بكل النصايح اللي ممكن تحتاجوها وانتم طالعين رحلة شهر عسل على الطريق السريع.

فتابعوا معانا المقال.

اختيار الطريق:

أول خطوة هتحتاجوا تقرروها قبل ما تطلعوا رحلتكم هي إنكم تختاروا طريقكم.

قرروا ايه هي الأماكن اللي حابين تزوروها وهتقضوا فيها وقت قد ايه؟

وحطوا في اعتباركم مدة الإجازة اللي أخدتوها من شغلكم وانتم بتقرروا، هل الإجازة طويلة ولا قصيرة؟ ومدتها دي هتسمح لكم بسفر قد ايه على الطريق.

وتقدروا تختاروا أماكن كتير تزوروها في مصر على طول الطريق من شرقها لغربها وشمالها لجنوبها.

سواء مناطق الجبال في الجنوب ومحافظات الصعيد أو سيناء وسانت كاترين، أو المناطق الساحلية اللي بتطل على البحر.

وده سواء كان البحر الأحمر في الغردقة وشرم الشيخ ودهب وغيرهم.

أو البحر الأبيض المتوسط في إسكندرية ودمياط ورشيد ومرسى علم.

اختيار نوع العربية في رحلة شهر عسل على الطريق السريع:

بعد ما حددتوا طريق الرحلة، جه وقت انكم تحددوا نوع العربية اللي هتخوضوا بيها الرحلة دي.

غالباً مش هتقدروا تطلعوا النوع ده من الرحلات بعربياتكم العادية.

إلا لو كانت أصلاً عربية جيب بتاعة سفر وطلوع جبال وطرق وعرة.

لكن في الغالب هتحتاجوا تأجروا عربية مخصوص للرحلة دي، وطبعاً هتحتاجوا توفقوا بين نوع العربية واستهلاكها وميزانيتكم.

فاتأكدوا من استهلاك العربية للبنزين، والمسافة اللي بتقطعها لكل لتر، وعلى حسب قراراتكم في المبيت تقدروا تختاروا إذا كانت عربية كرفان.

أو ممكن تختاروها عربية جيب متعددة الاستخدامات عشان تقدر تتحمل صعوبة الطريق وظروف الطقس المختلفة.

اختيار أماكن المبيت والأكل على الطريق:

مش معنى إنكم بتعملوا رحلة شهر عسل على الطريق بشكل غير تقليدي إنكم تتنازلوا عن اللمسات الرومانسية الرقيقة اللي المفروض تكون موجودة في شهر العسل.

تقدروا تستمتعوا بده بإنكم تختاروا فنادق حلوة على الطريق حتى لو بسيطة ومش بنفس فخامة فنادق شهر العسل المعتادة.

وتقضوا ليالي رومانسية فيها، أو تفطروا في أماكن جديدة مختلطة بالثقافة المحلية لسكان المنطقة اللي هتنزلوا فيها وتعيشوا معاهم تجربة جديدة.

إدوا نفسكم وقت تستمتعوا بالأماكن اللي بتعدوا عليها:

الفكرة في رحلة شهر عسل على الطريق مش إنكم تاخدوا الطريق سفر رايح جاي مع بعض وخلاص.

لا استمتعوا بكل مكان بتعدوا عليه، وانزلوا اتفرجوا على المناطق السياحية الأثرية اللي فيه، وادخلوا المدن واختلطوا بأهلها.

وخدوا صور كتير في كل مكان واعملوا ذكريات جديدة ومختلفة يمكن متلاقوش وقت تاني بعد كدة ترجعوا تعيشوها.

فحددوا من الأول أماكن تحبوا تشوفوها على طول الطريق، واعملوا خريطة خاصة بيكم بالأماكن دي عشان يبقى سهل عليكم تلاقوها وتروحوها من غير ما تتوهوا.

خدوا تذكارات من رحلة شهر عسل على الطريق:

اعملوا حسابكم وانتم طالعين الرحلة انكم تاخدوا معاكم شنطة فاضية زيادة، الشنطة دي حاولوا تملوها وانتم على الطريق بتذكارات من كل مكان زورتوه.

متكتفوش بس بالصور، ولكن في كل بلد ومدينة بتنزلوها هتلاقوا منتجات محلية خاصة بالمنطقة دي مش هتلاقوها في أي مكان تاني.

اشتروا منهم اللي يعجبكم واستغلوه في إنكم تضيفوه ديكور جميل في عشكم الجديد يفكركم دايماً بأحلى تجربة عشتوها مع بعض في رحلتكم الغير تقليدية.

وفي نهاية المقال نتمنى إننا نكون قدمنا لكم أفكار ونصايح مفيدة تقدروا تستغلوها في رحلة شهر عسل على الطريق السريع متنسوهاش أبداً.

وتكون بداية جميلة لحياتكم اللي جاية مع بعض، ونتمنى لكم حياة زوجية سعيدة مليانة حب وفرح وهنا، وألف مبروك على جوازكم.