حاجات بتهم ضيوف الفرح وحاجات مبتهمهمش

حاجات بتهم ضيوف الفرح أكتر من أي تفاصيل تانية لازم تاخدوا بالكم منها وانتم بتجهزوا لفرحكم.

فعلى الرغم من إن فرحكم المفروض يعكس ذوقكم انتم وأسلوبكم وشخصيتكم كعريس وعروسة.

إلا إن في الحقيقة فرحكم برضه هيبقى فيه ناس كتير جت مخصوص ويمكن يكونوا سافروا كمان من مكان لمكان.

يعني اتكلفوا وصرفوا فلوس مخصوص بس عشان يشاركوكم فرحتكم، فعشان كدة لازم على الأقل تراعوا متعتهم وراحتهم على قد ما تقدروا.

طبعاً محاولة إسعاد مية شخص أو أكتر في كل تفصيلة مهمة ممكن تكون مستحيلة.

لكن ممكن تحاولوا إلى حد ما تضيقوا نطاق تفاصيل حفل الزفاف اللي هتهم كل ضيوفكم فعلاً.

وفي المقال ده احنا حاولنا نجمع لكم أكتر التفاصيل اللي ضيوفكم هيركزوا معاها وهتفرق معاهم فعلاً.

وكمان هننبهكم على الحاجات اللي أغلب الضيوف مبيهتموش بيها أوي ومش هيركزوا في تفاصيلها.

وده عشان وانتم بتقرروا توزعوا المهام والجهود تعرفوا ايه اللي يستاهل وقت وميزانية أكتر من ايه.

فمتصرفوش مجهود وميزانية فوق طاقتكم على حاجة ممكن محدش يلاحظها أساساً ولا يهتم بيها.

فتابعوا معانا المقال.

الأكل أكتر حاجات بتهم ضيوف الفرح:

أكيد ده شيء مش مفاجئ ليكم يعني، طبيعي إن أكتر حاجة ممكن المعازيم ياخدوا بالهم منها هي الأكل.

ولو فيه حد منهم روح من غير ما ياكل لإن الأكل مكفاهوش؛ فدي حاجة مش هينساها أبداً، وكل ما هتيجي سيرة فرحكم هيفتكرها ويحكيها للناس.

وأكيد طبعاً دي حاجة متحبوش إنها تحصل أبداً، وعشان كدة من المفترض إنكم تصرفوا نص ميزانيتكم على الأكل وخدمات المكان.

أكيد مش هتحبوا إن حد من الضيوف يفضل حاسس بالجوع طول الوقت ويروح بالإحساس ده.

مش هتفرق لو اخترتوا تقدموا الأكل للضيوف كوجبات محددة في أطباق ولا بنظام الأوبن بوفيه.

المهم تتأكدوا ان نوعية الأكل بترضي كل الأذواق وكمياتها كتيرة مناسبة لعدد المعازيم المتوقع وزيادة احتياطي كمان.

وعشان تقدروا تضمنوا ده لازم تكونوا متأكدين من استعانتكم بطباخين وخدمة طعام مميزة.

خصوصاً لو مش عاملين فرحكم في فندق والفندق هو اللي هيتولى المهمة دي بطقم الشيفات والجرسونات عنده، يبقى انتم اللي لازم تتفقوا مع حد متخصص بنفسكم.

مكان فرحكم نفسه:

أي حد هيروح مناسبة أو إيفنت أول حاجة هيفكر فيها المكان ده فين، ومكان كويس أولا؛ عشان كدة من أكتر حاجات بتهم ضيوف الفرح هي مكان الحفلة نفسه.

وطبيعي إن اختياركم للمكان هو أول حاجة هتعملوها وانتم بتخططوا للفرح؛ لإن المكان ده هو اللي هيحدد طبيعة اليوم وتيمة الحفلة وتفاصيلها.

أما التفاصيل الصغيرة في المكان زي المرافق اللي فيه فهي اللي هتلعب دور رئيسي في تجربة ضيوفكم خلال فرحكم.

فالتفاصيل اللي ممكن تبان بسيطة زي الجراج أو عدد دورات المية في المكان بيبقى ليها تأثير كبير على ضيوفكم وراحتهم.

الموسيقى والرقص حاجات بتهم ضيوف الفرح:

طبعاً أغلب المعازيم جايين وعاملين حسابهم إنهم يقضوا يوم ممتع مليان غنا ورقص وفرح وتنطيط.

فسواء كنتم هتختاروا تجيبوا فرقة موسيقية مخصوص تعزف في فرحكم أو هتعتمدوا على أغاني الدي جيه عادي.

لكن في الحالتين لازم تكونوا متأكدين من الناس اللي اخترتوهم ومن قدرتهم على إنهم يتفاعلوا مع أجواء الحفلة.

ويشجعوا المعازيم انهم يفضلوا يرقصوا طول الليل، أكيد آخر حاجة ممكن تحبوا إنها تحصل في اليوم ده إن ضيوفكم يحسوا بالملل.

اللي مبيهمش ضيوفكم:

زي ما فيه حاجات بتهم ضيوف الفرح وبيركزوا فيها وبتفرق معاهم، لكن برضه فيه تفاصيل تانية انتم ممكن تهتموا بيها.

لكن في الحقيقة هي مبتفرقش خالص مع ضيوفكم ولا بيركزوا في تفاصيلها، زي إنكم تهتموا بتحديد أماكن معينة لقعاد كل شخص من عيلتكم وأصدقائكم.

الحقيقة دي حاجة ممكن تبان حلوة في التنظيم والشكل العام لكن في النهاية محدش هيهتم بيها.

وكل حد هيجي هيقعد مع الناس اللي يعرفهم من غير ما يهتم يسأل الكرسي ده بتاع مين ولا دي جهة أهل العريس ولا العروسة.

وبرضه تفصيلة زي رمي بوكيه الورد من العروسة للبنات اللي متجوزوش على الرغم من إن دي فقرة مرحة.

إلا إن أغلب الناس مبيركزوش معاها ومش بيهتموا بيها أوي؛ فلو قررتوا تتجاوزوها محدش هياخد باله ولا يهتم أو يعلق عليها.

وفي نهاية المقال نتمنى إننا نكون وضحنا لكم أكتر حاجات بتهم ضيوف الفرح عشان تاخدوا بالكم منها.

وتدوها من وقتكم ومجهودكم وميزانيتكم أكتر من التفاصيل التانية اللي ممكن محدش يهتم بيها أو يلاحظها.

ونتمنى لكم فرح سعيد مليان بالأوقات المميزة اللي متتنسيش سواء ليكم أو لضيوفكم، ويكون بداية حياة زوجية سعيدة أبدية.