
الملابس الداخلية تحت فستان الفرح إزاي تختاريها ليومك المميز؟
اختارتي كل حاجة من فستان الفرح واكسسوارته والجزمة اللي هتلبسيها وهتمسكي ايه في ايدك وكل حاجة تمام خلاص؟ طب عرفتي ايه الملابس الداخلية تحت فستان الفرح اللي هتلبسيها؟
الملابس الداخلية تحت فستان الفرح ممكن متكونش موضوع خد حاجة في تفكيرك، ومعتقدة انك هتلبسي أي حاجة من اللي متعودة عليهم ويكون شكلها شيك بس عشان لما تروحي مع عريسك.

بس الحقيقة إن ده موضوع مهم جداً؛ لإن ده اللي هيحدد مدى راحتك طول حفلة جوازك، لو مرتاحة مش هتحسي بتكتيف وانت بترقصي مع عريسك أو بتتحركي وسط المعازيم.
وكمان لازم تكون مناسبة مع الفستان عشان تديكي الراحة دي ومتبانش تحته أو تأثر على شكله.
عشان كدة في المقال ده احنا جمعنا لك شوية نصايح ممكن تفيدك وانت بتختاري تشتري الملابس الداخلية تحت فستان الفرح، وايه الأنواع اللي ممكن تعتمدي عليها؛ فتابعي معانا.
ستايل فستان الفرح:
أول حاجة لازم تاخدي بالك منها وانت بتشتري الملابس الداخية تحت فستان الفرح هو ستايل الفستان نفسه.

فمينفعش مثلاً إنك تجيبي حمالة صدر تقليدية بأشرطة حمالات وانت هتلبسي فستان من غير حمالات أو كتاف تداري أشرطة الحمالة؛ فممكن تستبدليها بحمالة صدر من غير أشرطة أو مشد.
كمان لو فستانك سيمبل ورقيق وقماشه خفيف فمش هينفع تلبسي الملابس الداخلية تحت فستان الفرح من النوعية السميكة ومليانة خطوط، ساعتها هتغامري بإن حزها يبان من تحت الفستان.
البسي اللي بتحسي فيه بالراحة:
في أوقات كتير بنقول إن مش مهم الراحة في اختيار اللي هنلبسه في فرحنا على قد ما بندي أولوية للمظهر النهائي.
بس الحقيقة إنك لو مكنتيش مرتاحة شكلك النهائي هيظهر عليه علامات عدم الراحة دي، ومش هتبقي واثقة في نفسك ولا في حركتك ودي حاجة احنا منحبش انها تحصل أبداً في يوم زي ده.

وعشان كدة وانت بتختاري ملابسك الداخلية اللي هتلبسيها تحت فستان الفرح اختاري النوعية اللي بترتاحي فيها، وبتديكي ثقة في نفسك وفي حركتك ومظهرك.
ودي حاجة ممكن تختلف من عروسة للتانية، ففي واحدة ممكن تبقى الراحة والثقة بالنسبة لها في حمالات صدر مرفوعة أو مشد يشكل جسمها، وواحدة يبقى بالنسبة لها إنها متلبسش حمالات صدر أساساً.

فاختاري تلبسي اللي يريحك، واختاري كمان من الأول الفستان اللي يتناسب مع أسلوبك.
وعشان تضمني الراحة بشكل كامل هيكون من الأفضل انك تجربي ملابسك الداخلية اللي هتلبسيها يوم الفرح قبله.
وياريت لو تلبسيها يوم كامل وتتحركي بيها عشان تضمني انها مريحة في الحركة ومش مكتفاكي.

اختاري الملابس الداخلية تحت فستان الفرح العملية:
أكيد طبعاً وانت بتختاريها بتكوني بتفكري في اللحظة اللي هتروحي فيها انت وعريسك وتقلعي الفستان؛ فبتختاري ملابس داخلية شيك وحلوة.
مش هنقولك متختاريهاش على الأساس ده لكن ميكونش ده أساسك الوحيد، لو هي مش عملية مع فستانك متختاريهاش.
يعني مينفعش تختاري ملابس داخلية كلها ساتان وأشرطة دانتيل أو ريش تحت فستان فرحك لمجرد ان شكلها حلو؛ لإنها كدة هتحرك وتشوكك طول الفرح، وأظن دي حاجة منحبهاش.
اختاري ملابس داخلية حلوة وشيك لكن في نفس الوقت تكون عملية ومناسبة ليوم الفرح، وأجلي الدندشة لشهر العسل.

اختاري اللون المناسب:
ممكن تبقي شايفة إن من المنطقي إنك تختاري ملابس داخلية لونها أبيض عشان تبقى مناسبة مع الفستان.
بس مش دايماً بيكون ده اللون الأنسب، أوقات بيكون اللون البيج هو الأفضل لإنه أقرب للون بشرتك.
عشان كدة من الأفضل إنك تجربي الملابس الداخلية اللي هتلبسيها يوم فرحك مع الفستان قبلها عشان تبقي عاملة حسابك.

خلي دايماً عندك خطة احتياطي من الملابس الداخلية تحت فستان الفرح:
متعتمديش على طقم واحد من الملابس الداخلية ليوم فرحك، يمكن يحصل حاجة على آخر لحظة ويتقطع مثلاً أو حاجة.
خليكي محتفظة بطقم تاني أو اتنين احتياطي معاكي لو حصل أي حاجة طارئة متحتاسيش، وكوني مطبقة عليهم نفس النصايح اللي قلناها فوق برضه وألف مبروك يا عروسة.

نتمنى تكون النصايح اللي قدمناها لك في المقال ده فادتك وتقدري من خلالها انك تختاري الملابس الداخلية تحت فستان الفرح اللي هتلبسيها في أهم يوم في حياتك، ويكون يوم جميل متنسيهوش طول عمرك.
هل محتوى المقال دة كان مفيد بالنسبة لك؟
نعم، مفيد!لا!