ازاي تتخلص من حب الشباب نهائيا؟

حب الشباب من المشاكل اللي بتواجه ولاد كتير، خصوصا من سن المراهقة وسن العشرينات.. النهاردة حنتكلم عن أسبابها، وعلاج المشكلة. 

ما هو حب الشباب؟

حب الشباب عبارة عن تراكم الدهون اللي بتخرج من البشرة عن طريق الغدد الموجودة فيها وبتؤدي إلى انسداد المسام. 

أسباب ظهور حب الشباب

• نوع البشرة: لو كانت بشرتك دهنية أو مختلطة، فأنت معرض بشكل كبير لظهور العلامات والندبات أكتر من البشرة الجافة. 
• الضغط النفسي: ودة لأنه بيلغبط هرمونات الجسم على سبيل المثال هرمون الذكورة (التستوستيرون).
• عدوى فطرية: بسبب وجود الفطريات عند بصيلة الشعر. 
• التلوث البيئي: الأدخنة وعوادم السيارات لها الدور في وجود ملوثات على سطح البشرة. 
• الأكل غير الصحي: الوجبات السريعة لها دور رئيسي في انتشار الحبوب على البشرة.

أكلات قد تسبب في ظهور حب الشباب

فيه بعض الأبحاث بتقول أن اللبن المبستر، والأكل اللي فيه سكريات كتيرة من أسباب حدوث المشكلة دي. 

معلومة خاطئة! 

كان منتشر قبل كدة أن الشيكولاتة ممكن تسبب في ظهور الحبوب، ولكن الأبحاث قالت أن الشيكولاتة مش بتأثر في حدوث دة. 

هل حب الشباب منتشر على مستوى العالم؟

أيوة بالفعل، لأن الدراسات بتقول أن ٨٠ % من الشباب في سن من ١١ – ٣٠ سنة بيتعرضوا لحب الشباب. 

حلول بسيطة لعلاج الحبوب

الالتزام بروتين لبشرتك حيحميها من الأتربة، وتراكم الدهون على سطح البشرة. 

روتين للبشرة الدهنية والمختلطة

• استخدم مرطب على شكل چيل، لأنه حيكون خفيف على بشرتك على عكس الكريمات اللي بتكون تقيلة وبتساعد على ظهور الحبوب بشكل أكبر. 
• الغسول المناسب حيكون مساعد ليك بشكل رئيسي مع المرطب، والأفضل تستخدمه الصبح وبالليل.

علاج حب الشباب

خلينا متفقين أن حب الشباب مش بيروح في وقت قصير، لأنه بياخد فترة في العلاج واختفاء أثار الحبوب أيضا والموضوع محتاج صبر.

العلاج الموضعي

حنقولك على بعض المواد الفعالة اللي بتستخدم، ولها مفعول جيد وحتلاحظ النتيجة مع الانتظام على العلاج، وطريقة استخدامه.

والمواد الفعالة هي:

• حمض الساليسيلك: وهو بيعمل على تقشير الطبقة الخارجية من البشرة، ومع الوقت حتلاحظ اختفاء العلامات اللي ظهرت بسبب حب الشباب. 
• مشتقات فيتامين أ: زي مادة التريتينوين tretinoin ومادة الريتينول retinol، ولازم يتم استخدامهم بحذر شديد علشان ممكن يسببوا التهابات شديدة على البشرة. 

العلاج الدوائي 

• مضادات الفطريات: ودي بيتم استخدامها تحت إشراف الطبيب، لأن بيكون ليه طريقة استعمال محددة، وبيتاخد لوقت معين لازم يلتزم بيها المريض. 
• مشتقات فيتامين أ: موجود منها أقراص أيضا، ولازم تستخدم بحذر تحت إشراف الطبيب، ومهم جدا متابعة وظائف الكبد عن طريق عمل بعض التحاليل اللي بيوصي بيها طبيب الجلدية بعد فترة 3 شهور من تناول الدواء. 

العلاج التجميلي

دلوقتي العلاج التجميلي بقى حل لمشكلات جلدية كتير، ولها مفعول سريع، وأسرع من الأدوية على سبيل المثال استخدام الليزر في العلاج واللي بيسموه المتخصصون الفراكشنال ليزر ولازم يتاخد كذا جلسة علشان تختفي العلامات من الوجه. 

المقشرات الكيميائية

على سبيل المثال التقشير على البارد ودة عن طريق بعض الأحماض، ودي بتكون على مدار عدة جلسات في عيادات التجميل، وبيقوم بيها أطباء جلدية متخصصون أيضا. 

حب الشباب من المشكلات اللي حتفضل موجودة، واللي لازم يكون عندك صبر وتأني في علاجها، والأهم هو المتابعة مع المتخصصين خصوصا لو الحبوب دي مش بتروح وسايبة علامات في بشرتك مش بتقل! 

اقرأ أيضا: راحة ضيوف الفرح مسئوليتك فإزاي تحققها؟

اقرأ أيضا: لوعايز تخس قبل فرحك.. حنقولك معلومات لازم تعرفها عن مرض السمنة.