هدايا أول عيد جواز لعريسك… يا ترى هتجيبيله ايه؟

عدت أول سنة على جوازكم خلاص؟ نتمنى انها كانت سنة مليانة حب وفرح وسعادة وقربتوا فيها من بعض أكتر، وأكيد دلوقتي بتفكري في ايه هي هدايا أول عيد جواز اللي ممكن تجيبيها لعريسك؟

أول سنة جواز على قد ما بيكون فيها لحظات حب وسعادة كتير لكن برضه هي أكتر سنة بيكون فيها مشاكل وخلافات، وده لإنكم بتكونوا لسة بتتطبعوا على طباع بعض وبتتعرفوا عليها.

ووارد طبعاً آرائكم وخلفياتكم اللي داخلين بيها الحياة الجديدة دي تصطدم ببعض في أول فترة.

لكن ما دام عديتم السنة دي على خير يبقى قدرتوا تفهموا بعض كويس وتتوافقوا مع بعض.

وطبعاً دي حاجة جميلة جداً تستاهل نحتفل بيها.

وعشان كدة وانتم بتحتفلوا بمرور أول سنة ليكم مع بعض لازم تفكري ايه الهدية اللي هتعبري بيها لعريسك عن حبك وسعادتك بمرور السنة دي وبداية سنة جديدة ليكم مع بعض.

وزي ما عودناكي نكون معاكي في كل خطوة من قبل الجواز؛ فاحنا برضه لسة معاكي دلوقتي.

وفي المقال ده جبنا لك أفكار لهدايا تعجب جوزك وتقدري تعبري له بيها عن حبك واهتمامك بيه وسعادتك معاه.

فتابعي معانا.

ميدالية فضة:

طبعاً الميداليات تعتبر أهم إكسسوار في مقتنيات أي راجل، ما هو مفيش راجل بيمشي من غير مفاتيح يعني.

بس لو هتجيبيله ميدالية في هدايا أول عيد جواز فمينفعش تكون أي ميدالية والسلام.

فطبعاً أشيك حاجة إنها تكون ميدالية فضة أو على الأقل مطلية بالفضة.

وغير إنك تهتمي بشياكتها وجمال شكلها كميدالية لكن برضه تقدري تستغليها في التعبير عن حبك وخصوصية الهدية.

وده بإنك تطلبي ميدالية مخصوص معمولة ليكم، يكون محفور عليها أساميكم، وتختاري جملة حلوة تعبر عن مشاعرك.

وده سواء كانت جملة من كلامك انت وإحساسك الشخصي، أو بيت شعر أو من أغنية بتحبوها.

أو ممكن برضه يبقى اقتباس رومانسي عارفة إنه بيأثر فيه.

اختاري محفظة جلد في هدايا أول عيد جواز:

وبرضه طبعاً المحفظة مكون أساسي في جيب أي رجل مش بيمشي من غيرها، وبيحتاج يطلعها كل شوية.

وبالتالي لما تجيبيله محفظة في هدايا أول عيد جواز فده معناه انها هتفضل معاه طول الوقت وكل ما هيطلع محفظته وهو بعيد عنك هيفتكرك.

وطبعاً أشيك محافظ هي المحفظة الجلد، وزي ما قلنا عن الميدالية الفضة فوق نقدر نقول نفس الكلام هنا برضه.

متجيبيش أي محفظة جاهزة من المحلات وخلاص، مهما كانت شيك وغالية إلا إن الطابع الشخصي الحميمي اللي هتضيفيه على المحفظة لو طلبتيها عمولة مخصوص ليكم هيخليها أحلى بكتير وقيمتها تزيد ويبقى فيها مشاعر أكتر بكتير.

وده بنفس الطريقة اللي قلنا عليها في الميدالية، أطلبيها يكون عليها أساميكم وجملة حلوة منك ليه.

اكسسوارت الهدوم:

وطبعاً دي من الهدايا اللي تقدري تجيبها دايماً في أي وقت سواء هدايا أول عيد جواز أو في عيد ميلاده أو حتى لو من غير مناسبة.

ودي زي الجرافتات الشيك والأحزمة الجلد وبرضه الجزم الجلد الشيك من النوعيات اللي بيحبها.

وممكن كمان طقم زراير البدل والقمصان الغالية، والمناديل الحرير اللي بتتحط في جيب البدلة الرسمية.

كل دي أفكار ممكن تستغليها على حسب ذوق جوزك، يعني طبعاً تفكري إذا كان هو بيستخدم الحاجات دي أصلاً ولا لا.

مش لمجرد إنها هدايا رجالي شيك وغالية تجيبها له وهو أصلاً مبيستخدمهاش ومش ذوقه؛ لإن ساعتها هيحس إنك مش واخدة بالك منه ومن تفضيلاته وذوقه ومش عارفة حاجة عنه وبتجيبي أي حاجة تلاقيها قدامك والسلام!

مجموعات العناية الشخصية في هدايا أول عيد جواز:

زي ما انت عندك مكياجاتك وبرفاناتك وكريماتك وأدوات التجميل بتاعتك، فالرجالة برضه عندهم مستحضرات خاصة بيهم.

ودي فيها برفانات برضه وكريمات الحلاقة ولو بيستخدم كريمات معينة للبشرة وما إلى ذلك يعني.

وزي ما انت هتفرحي لو جابلك علبة مكياج حلوة أو برفان جميل من ماركة نضيف هدية؛ فنفس الشيء برضه بالنسبة له.

إنك تجيبي له هدية من أدوات العناية الشخصية الخاصة بيه ده هيعبر له عن قد ايه انت مركزة في تفاصيله وواخدة بالك من كل حاجة تخصه، وهيضفي خصوصية أكبر على الهدية.

وده هيخليكي تفضلي دايماً في باله ويفتكر دايماً اهتمامك بيه مع كل رشة برفان بيرشها أو في كل مرة يقف قدام المراية وهو بيحلق ويستخدم الكريم اللي انت جيباهوله.

وفي نهاية المقال نتمنى إننا نكون فدناكي فعلاً وقدرنا نقدم لك أفكار هدايا أول عيد جواز تقدري تجيبيها لعريسك.

ونتمنى إننا نكون وفرنا عليكي وقت كان هيضيع في الحيرة تقدري تستغليه في انك تقضي وقت رومانسي أطول معاه.