مصور محترف لعرض الزواج … ليه تستعين بيه في اللحظة دي؟
مصور محترف لعرض الزواج حاجة ممكن متجيش على بالك في اللحظة اللي بتخطط فيها إنك تعرض الجواز على حبيبتك.
في الحقيقة عرض جوازك هيكون أهم لحظة في حياتك، بس في النهاية هي مجرد لحظة وتعدي.
واللي هيخلدها هي الذكريات اللي هتفضل عنها، وأه الذكريات بتفضل خالدة مهما حصل.
بس عشان تضمن إن عرض جوازك المفاجئ اللي خططت ليه وحلمت بيه يفضل ثابت في الذاكرة.
فلازم تستعين بمصور بروفيشنال يسجلك اللحظة المميزة دي.
واللي بيميز صور عرض الجواز إنها بتكون صادقة وعفوية وده بيخليها فريدة من نوعها.
وده بعكس صور المناسبات التانية بعد كدة من قراية فاتحة وخطوبة وفرح.
كل المناسبات دي بتبقى العروسة فيها عارفة المناسبة اللي حواليها، وبالتالي بتكون متوقعة إن فيه تصوير.
فبتكون واخدة بالها من ردود أفعالها وتصرفاتها عشان عارفة إنها هتبان في الكاميرا.
لكن لحظة عرض الجواز المفاجئة بتكون عفوية؛ لإنها مبتكونش عارفة إنها هتحصل في لحظتها، وبتكون متفاجئة ومش مستعدة.
اللحظة دي بيكون فيها كتير من الدموع والضحك والفرح النقي العفوي الجميل، لكنها لحظة بتحصل بسرعة كبيرة وصعب تكررها تاني.
فعشان كدة هتبقى مبسوط لو اتأكدت إن معاك صور تقدر تخلد بيها اللحظة دي للأبد.
وده مش هيحصل إلا لو كان معاك فوتوجرافر شاطر، وبالتالي يقدر يجاريكم في كل تفصيلة بتحصل وياخد لها صورة للذكرى.
وصحيح إن ممكن تأجير مصور محترف لعرض الزواج يكون مكلف مادياً، إلا إنه في الحقيقة يستحق كل قرش هيتدفع فيه.
وفي المقال ده هنشرح لكم الأسباب اللي تخليكم متمسكين بوجود فوتجرافر شاطر في اللحظة دي.
فتابعوا معانا المقال.
الذكريات:
زي ما قلنا قبل كدة إن اللحظة دي هتمر بسرعة زي البرق.
وفي اللحظة اللي بعدها هتلاقي نفسك ماشي في الزفة، ففعلياً اللحظة دي بتمر بسرعة جداً.
وكتير من الناس مبيبقوش فاكرين حاجة من تفاصيلها إلا إنهم عرضوا الجواز أو وافقوا على العرض.
وعشان كدة وجود مصور محترف لعرض الزواج هيخليه ياخد صور جميلة توثق اللحظة المهمة دي من كل زاوية وكل تفصيلة.
الصور دي هتفكركم بكل التفاصيل الصغيرة سواء الرومانسية أو الكوميدية، زي لحظة كنت هتوقع فيها الخاتم وانت بتتقدم لها مثلاً.
وده هيخليكم بعد سنين من جوازكم تقدروا تسترجعوا كل لحظة مرت عليكم في الوقت ده من أوله لآخره.
وأهم لحظة في ده كله واللي تخليك فعلاً عايز يكون معاك فوتجرافر ضروري هو إنك تسجل لحظة رد فعل حبيبتك وانفعالاتها في لحظة عرضك الجواز عليها.
لحظة رد الفعل دي لا تقدر بثمن فعلاً، وهتبقوا قادرين بعد كدة إنكم تشاركوا اللحظة دي مع ولادكم وأحفادكم في المستقبل.
مصور محترف لعرض الزواج يعني صور بروفيشنال تستخدموها في كل المناسبات الجاية:
من أول منشور ليكم على السوشيال ميديا تعلنوا فيه خطوبتكم لحد دعوات حفلة الخطوبة وما بعد ذلك.
هيكون عندكم كتير من المناسبات والفعاليات اللي هتكونوا مبسوطين فيها إن معاكم صور رائعة ومتاخدة باحترافية من لحظة عرض الجواز تقدروا تستخدموها فيها.
وده معناه إنكم مش هتضطروا تستخدموا صورة ممكن تكون اتاخدت لكم مع بعض قبل كدة في أي تجمع أثناء فترة ارتباطكم.
واللي ممكن تبقى صورة قديمة أو مش واضحة أوي أو شكلكم فيها مكنش حلو، وكمان تبقى مضطرين تستخدموها هي نفسها في كل الفعاليات.
لكن كدة انتم عندكم مجموعة كبيرة من الصور المحترفة بكل الأوضاع والإعدادات تقدروا تستخدموها براحتكم.
فتقدروا تستخدموها على صفحاتكم في السوشيال ميديا، وفي إيفنتات خطوبتكم أو فرحكم، وعلى الدعوات اللي هتبعتوها للمعازيم سواء في الخطوبة أو الفرح.
وكمان تقدروا تستخدموها في ديكورات بيتكم وتعلقوها مع صور خطوبتكم وفرحكم على حيطان البيت عشان تفكركم دايماً باللحظة المميزة دي.
عشان أهلكم يحسوا انهم كانوا معاكم:
عادة دي لحظة خاصة بيكم، وسواء أهلكم كانوا على علم بعلاقتكم ومستنين اللحظة اللي هتاخدوا فيها قرار الجواز أو ميعرفوش لسة إنكم مرتبطين.
فالأكيد في الحالتين إنهم مش هيكونوا معاكم في اللحظة دي، وعلى الرغم من إنكم هتتبعوا الخطوات الرسمية بعد كدة من إنك تروح تتقدم لأبو حبيبتك وتستنى موافقته.
ويمكن يرفضك وبنته تضغط عليه شهور لحد ما يوافق، بس الأكيد في النهاية إن دي لحظة مميزة الكل هيسأل عنها.
خصوصاً بعد ما الدنيا تستقر والموضوع يمشي في إطاره الرسمي، فوجود ألبوم كامل من مصور محترف لعرض الزواج قدر ياخد صور مثالية للحظة دي من بدايتها لنهايتها.
ده هيخلي أهلكم يحسوا انهم كانوا معاكم في اللحظة دي، وهيرضي فضول صحابكم اللي مكنوش معاكم.
مصور محترف لعرض الزواج بروفة لصور الخطوبة والفرح:
عادة احنا مش متعودين على التصوير الاحترافي، بنتصور بموبايلاتنا وسيلفي طول الوقت لكن منعرفش وضعيات وتفاصيل التصوير البروفيشنال.
ويمكن أول مرة بنتعرض فيها لتصوير من النوع ده بتكون في الخطوبة والفرح، فعشان تضمن إنكم تتعودوا على أجواء التصوير دي.
وإن صور الخطوبة والفرح تطلع مظبوطة، هيكون من المناسب انكم تعملوا بروفة في صور عرض الجواز.
ولو لاحظتم حاجة في مظهركم أو ردود أفعالك مش حلوة في التصوير هتقدروا تتفادوها بعد كدة في الصور اللي جاية.
ولو كانت الصور جميلة جداً ومبهرة بالنسبة لكم؛ فده معناه إنكم تقدروا تعتمدوا على نفس المصور إنه يكون فوتجرافر خطوبتكم وفرحكم بعد كدة.
وفي نهاية المقال نتمنى إننا نكون وضحنا لكم أهمية وجود مصور محترف لعرض الزواج يخلد لكم اللحظة دي.
ونتمنى إنكم تلاقوا المصور المناسب اللي ياخد لكم أحلى صور تعيش معاكم للأبد وتفكركم دايماً بأحلى لحظة في حياتكم لما قررتم تعيشوا مع بعض العمر كله.
هل محتوى المقال دة كان مفيد بالنسبة لك؟
نعم، مفيد!لا!
