لو عايز تبدأ حياتك صح.. ابعد عن التدخين

زي ما بتهتم أنك تبني بيتك بالطريقة الصح، اهتم أنك تغير في نفسك، والمرة دي مش علشانك أنت بس، علشان أسرتك الجاية، ولأنك المسؤول عنها، ولو لا قدر الله حصل أي مشكلة أو ضرر لحد من أسرتك حتكون أنت أول سبب في الضرر دة، والضرر اللى أقصده هنا هو التدخين سواء عن طريق السجائر العادية أو السجائر الإلكترونية أو “الفيب”.

حقولكم في السطور الجاية أخطار التدخين وازاي تقدر توقفه خصوصا قبل فرحك، وقبل حياة جديدة مع شريكة حياتك. 

اضرار التدخين

أمراض القلب

يزيد معدل حدوث أمراض القلب من ضعفين لأربعة أضعاف بالمقارنة بغير المدخنين، وللأسف دي نسبة كبيرة جدا، ومش عادية. 

الأوعية الدموية

يزيد سُمك الأوعية الدموية، وبالتالي بيحصل ضيق فيها، واللي يؤدي لارتفاع ضغط الدم بشكل كبير جدا وزيادة نبضات القلب، وبالتالي تزيد فرصة حدوث تجلط للدم، واللي بتزود فرصة حدوث أمراض تانية! 

السكتة الدماغية

السكتة الدماغية معناها أن الدم اللي واصل للدماغ بيكون قليل وغير كافي، ويزداد معدل حدوث السكتات الدماغية من ضعفين لأربع أضعاف بالمقارنة بغير المدخنين (زي أمراض القلب بالظبط). 

التدخين والرئتين

يسبب التدخين سرطان الرئة على المدى البعيد، واللي عنده ربو بتزيد المشكلة عنده أكتر من الأول، ودايما بنلاحظ أن اللي بيدخن عنده كحة شديد مش بتروح، حتى لو أخد أدوية كحة ياما، لكنها مش بتأثر معاه، بل حالته بتسوء أكتر. 

مرض السرطان

التدخين من الأسباب الرئيسية لأنواع سرطانات كتير على سبيل المثال:

1. المثانة. 
2. الكبد. 
3. البنكرياس. 
4. الحلق. 
5. اللسان. 
6. المعدة. 
7. القولون. 

صحة الرجل

التدخين يقلل من خصوبة الرجل، ودة لأنها بتأثر على الحيوانات المنوية sperm، وبتأثر على العلاقة الخاصة بين الزوجين بشكل سلبي. 

صحة المرأة والجنين

أنت كمان ممكن تسبب مشكلة كبيرة لزوجتك، وبالأخص لو حملت لأن حملها ممكن ميكملش وصحتها تتأثر بالتدخين ودة اللي بنسميه التدخين السلبي، ولو كمل الحمل بيكون فيه نسبة تشوهات للجنين. 

التدخين ومرض السكر

المدخن عنده احتمالية الإصابة بمرض السكر النوع التاني، بالإضافة لذلك النسبة دي بتوصل من ٣٠ – ٤٠ في المية عن غير المدخنين. 

التدخين والمناعة

يزيد نسبة حدوث أمراض مناعية زي التهاب المفاصل الروماتويدي rheumatoid arthritis. 

الاقلاع عن التدخين

لو حطيت حياتك الجديدة قصاد عينك طول الوقت، ممكن ساعتها تاخد القرار الحاسم لوقف التدخين، ودة علشان صحة أسرتك كلها مش أنت بس. 

نتائج الإقلاع عن التدخين

النتيجة بتبدأ معاك من أول دقيقة، ودة إللي أثبتته الأبحاث العلمية مش كلام وخلاص يعني مثلا حتلاقي نفسك قادر تتنفس كويس، وضربات قلبك مش سريعة لأنها بترجع لمعدلها الطبيعي. بالإضافة أن نفسيتك حتكون أفضل بكتير من البداية، ودة حيلاحظه اللي حواليك. 

الفيب… موضة جديدة! 

علشان الناس تحاول تخلي السجاير عادية وغير مضرة، كل شوية يخترعوا نوع جديد، وبيقولوا أضرار أقل، هو الكلام دة صح ؟

الإجابة أنه لا طبعا مش صح لأن لها تأثيرات عكسية على الصحة. 

اضرار الفيب 

رغم أنها أقل ضررا من السجائر العادية وتحتوي على مواد سامة أقل، بس تحتوي على النيكوتين، واللي يعتبره الأطباء إدمان، بالإضافة أنه بيأثر كمان على الصحة زي السجائر العادية. 

الخلاصة

متقولش حبطل سجاير الأسبوع الجاي أو الشهر الجاي، اتشجع وخد القرار النهائي، وابعد عن السبب اللي يخليك ترجع لها مرة تانية، واشغل نفسك بهواية مفيدة لو لقيت أنك عايز تشرب سيجارة تنسيك أي ضغط أنت محطوط فيه، ومتخليش الضغوطات والحالة النفسية يكونوا سبب مقنع ليك أنك تضر بصحتك، وصحة اللي حواليك.

اقرأ أيضا: الزواج الناجح: الطريق للحصول على حياة سعيدة

اقرأ أيضا: تجهيزات العريس للفرح من الألف للياء