كيف تتخلصي من هيشان الشعر؟

هيشان الشعر من المشاكل اللي بتقابل بنات كتير وخصوصا العرايس، لأنها بتكون عايزة شعرها في أحسن شكل. النهاردة حبينا نقولك على خطوات لحل المشكلة دي. 

ايه السبب الرئيسي لهيشان الشعر؟

هيشان الشعر له أسباب متعددة، ولكن الأسباب الرئيسية هي رطوبة الجو أو الأجواء اللي بيكون فيها مطر، والشعر الكيرلي بطبيعته أو wavy hair. 

نصائح ليكي علشان تقللي من هيشان شعرك

1- استخدمي منتجات مناسبة مع نوع شعرك

استخدام شامبوهات مش مناسبة لنوع شعرك بتزود مشكلات شعرك بشكل كبير، فالأحسن أنك تعرفي الأول نوع شعرك، وفروة رأسك، وحددي بعدها المناسب له. 

2- خللي البلسم وحمام الكريم أساسي في روتين شعرك

أثبتت دراسات من أطباء الجلدية المتخصصين أن استخدام البلسم أو حمام الكريم بيساعد على قلة هيشان الشعر، وزيادة قوة الشعر، وزيادة لمعانه وحمايته من أشعة الشمس الضارة وخصوصا الأشعة فوق البنفسجية.

3- قللي استخدام الأجهزة الحرارية لتقليل هيشان الشعر

السشوار والمكواة بيخللوا شكل الشعر مظبوط وبيلمع، بس للأسف مع الاستخدام الكتير بيظهر مشاكل في الشعر على سبيل المثال: سقوط الشعر وزيادة هيشان الشعر وتقصف الشعر أيضا. 

4- متعرضيش شعرك لأشعة الشمس بشكل مباشر

أشعة الشمس أنواع فيه منها المفيد وفيه منها المضر للجلد والشعر، والتعرض للشمس في أوقات الذروة بيضعف الشعر وبيساعد على هيشانه بشكل كبير، وبيقصف الشعر أيضا. 

5- اتأكدي من مصدر الصبغة أو البروتين اللي بتعمليه لشعرك! 

المواد الكيميائية اللي بتستخدميها لشعرك لها دور كبير في شكل الشعر ولمعانه وقوته، فحاولي متعرضيش شعرك كل شوية للمواد دي خصوصا لو مش متأكدة من مصدرها لأنها بتعمل على تلف الشعر وإجهاده. والمواد دي زي الصبغة، ومواد الفرد الكيميائية، والبروتين.

6- الزيوت الطبيعية.. علاج سحري لهيشان الشعر

حاولي تدخلي الزيوت الطبيعية في روتين شعرك سواء حتستخدميه عادي أو حتعملي حمام زيت، ومن الزيوت اللي أثبتت فعاليتها هو زيت الأرجان، وزيت جوز الهند. 

7- اختاري منشفة مناسبة لشعرك

المنشفة المايكرو فايبر من أفضل الاختيارات اللي ممكن تحطيها في روتينك، لأن لها دور قوي في تجفيف الشعر، وبتقلل من هيشان الشعر، وتقصف الشعر. وحاولي دايما بعد الشاور لما تنشفي شعرك نشفيه بهدوء، وبطريقة تكون خفيفة على شعرك. 

8- علاقة نوع فرشاة الشعر وهيشان الشعر

لما تشتري فرشاة لشعرك اختاري الفرشاة اللي تكون واسعة مش ضيقة علشان متتعبش فروة رأسك، وتحافظ عليه من التقصف والهيشان. 

9- خللي بالك من روتين شعرك قبل النوم

قبل النوم لازم تجهزي شعرك كويس علشان ميحصلش فيه هيشان لما تصحى اليوم اللي بعده وحقولك على شوية حاجات تجهزيها قبل ما تنامي:

• اربطي شعرك برابطة تكون حرير. 
• نامي على مخدة يكون عليها غطاء حرير، ودة لأن الحرير بيساعد على تقليل مشاكل الشعر.

10- قصي أطراف شعرك بشكل منتظم

حاولي كل فترة وبانتظام تقصي أطراف الشعر علشان دة بيزيل الأطراف المتضررة والميتة اللي صعب تتعالج بسهولة، والأفضل تروحي للبيوتي سنتر في الحالة دي. 

11- استخدمي بونيه الشعر لو رايحة المصيف

لو رايحة المصيف، وحتنزلي حمام السباحة خليكي حريصة أنك تستخدمي بونيه الشعر علشان الكلور ميضرش شعرك ويسبب جفاف وتقصف للشعر. 

12- اهتمي بتغذية سليمة علشان يختفي هيشان الشعر

سوء التغذية من أكتر الأسباب اللي بتضعف الشعر وتخليه باهت، فلازم تهتمي بتناول خضراوت وفواكه، وحتلاحظي الفرق بعدها بشكل كبير. 

اقرأ أيضا: ازاي تتخلص من حب الشباب نهائيا؟

اقرأ أيضا: أفضل فنادق شهر العسل في تركيا.