لكل عروسة ملهاش في المكياج… قائمة مكياج العروسة في الجهاز
عرائس كتير ملهاش خبرة في المكياج، وبيحتاروا وهما بيحضروا جهاز العروسة يجيبوا إيه من أدوات المكياج معاهم. في المقال ده، بنقدملك قائمة مكياج العروسة في الجهاز بتشمل مجموعة بسيطة ومنظمة من المستحضرات والأدوات لأي عروسة ملهاش في الميكب، بحيث تضمني إطلالة ناعمة وسهلة ليكي وبتكاليف تناسب احتياجك…
نصائح لأي عروسة ملهاش في المكياج
من أهم الحاجات اللي بننصح بيها أي عروسة، هي :
- مش كل حاجة لازم تجيبيها، فقط اللي هتستخدميه، حتى لو كانت نصائح صحابك إنك تجيبي كل حاجة.
- بقدر الإمكان خلي تركيزك على المنتجات والأدوات اللي ممكن تحتاجيها للاستخدام اليومي أكتر من المُستخدم في المناسبات.
- ارتياحك الشخصي هو الأهم، لو المنتج غير مريح ليكي مش لازم تفرضيه على نفسك.
قائمة مكياج العروسة في الجهاز
في القسم ده بنقدملك أهم الأدوات والمستحضرات اللي ممكن تحتاجيها للاستخدام اليومي والطلعات الخفيفة.
1. مرطب للبشرة
ترطيب البشرة شئ هام جداً، والمرطب من الاحتياجات الأساسية لأي بنت. اختاري نوع المرطب المناسب لبشرتك، واحرصي على ترطيب بشرتك قبل أي مكياج.
كمان من المهم قبل ترطيب البشرة يكون عندك غسول مناسب للبشرة، استعمال الصابون العادي غير صحي لبشرتك. ابدأي روتين يومك بغسل وشك بالغسول ثم الترطيب.
في 4 خطوات فقط… ازاي تختاري المرطب المناسب لبشرتك؟
2. واقي الشمس
قبل الخروج وبعد ترطيب البشرة، تقدري تستخدمي واقي الشمس لحماية بشرتك من أشعة الشمس وتحافظي عليها من التصبغات.
2. بي بي كريم أو فاونديشن خفيف
كريم الأساس (فاونديشن) اللي درجته قريبة من بشرتك هو من المستحضرات الأساسية للمكياج، ولو كان غير مريح ليكي تقدري تشوفي نوع خفيف منه أو تستبدليه بال بي بي كريم . ال بي بي كريم حل عملي لأنه في نفس الوقت بيكون مرطب + ذو لون خفيف + حماية.
الهدف من كريم الأساس أو ال بي بي كريم هو توحيد لون البشرة قبل أي مكياج واخفاء العيوب أو الحبوب. في الطلعات اليومية أو الخروجات الخفيفة تقدري تستعملي ال بي بي كريم، وفي السهرات أو المناسبات زي الأفراح تقدري تستعملي كريم الأساس.
3. كونسيلر بسيط
الغرض منه هو اخفاء الهالات تحت العين. لو إنتي مبتدئة في المكياج أو بتحبي اللوك الطبيعي، ممكن تستغني عنه في الاستخدام اليومي وتكتفي بـ بي بي كريم أو كريم أساس خفيف.
4. بودرة التثبيت
في بعض المناسبات (زي الأفراح) ممكن تحتاجي يكون مكياجك ثابت لفترة أطول خصوصاً لو بشرتك دهنية أو مختلطة، هنا بيجي دور وجود بودرة التثبيت في قائمة مكياج العروسة في الجهاز. لو هتستخدمي كريم أساس أو كونسيلر لازم تثبّتيه ببودرة عشان ميخططش أو يتحرك من مكانه خصوصاً في المناسبات الطويلة.
تقدري تستغني عنها لو مكياجك بسيط جدًا ومش بيفضل على بشرتك ساعات طويلة، أو لو بتستخدمي بي بي كريم فقط، أو لو بشرتك جافة وغير محتاجة لتثبيت كتير.
5. البلاشر
البلاشر أو أحمر الخدود بيدي نضارة للمكياج خصوصاً مكياج المناسبات، تقدري تنوعي في ألوانه بين الوردي والبني الفاتح وألوان أخرى حسب اللي ممكن تستخدميه كتير. لو هتكتفي بلونين بننصحك يكون وردي هادي وخوخي هادئ.
6. ماسكارا + كحل+ آي لاينر
3 حاجات أساسية لمكياج العيون على حسب المناسبة أو الاستخدام اليومي،من المهم يكونوا في قامة جهازك، لأن عادة بتتسخدمي يومياً واحد أو اثنين منهم. على سبيل المثال ممكن تنزلي بالماسكارا فقط أو الأي لاينر فقط حسب راحتك، لكن في المناسبات ممكن تحتاجي تجمعي بينهم التلاتة أو بين على الأقل الماسكارا والآي لاينر.
7. باليت آي شادوا للعيون
آي شادوا العيون بيكون مهم لمكياج المناسبات، مش لازم باليت فيها 50 لون، تقدري تكتفي بالألوان الحيادية على سبيل المثال البني والبيج.
8. أحمر الشفاه… أحد أساسيات قائمة مكياج العروسة في الجهاز
وطبعاً لا غناء عن الروج حسب زوقك ودرجة وشك والألوان اللي بتحبي تستخدميها، لكن بوجه عام تقدري تجيبي الألوان الهادئة المناسبة للإستعمال اليومي زى الكاشمير أو الروز الهادئ أو البني. اختاري بين الروج العادي والروج المات أو ال Lip gloss على حسب ارتياحك وتفضيلاتك الشخصية، لكن من الأفضل تنوعي في الاختيار.
وطبعاً متنسيش مرطبات الشفاه، وتقدري كمان تجيبي أقلام تحديد الشفاه لو بتحبي تستخدميها في وضع الروج.
أدوات المكياج
وضع المكياج بيحتاج أوقات أدوات تساعدك في توزيعه صح زي:
- إسفنجة لتوزيع الكونسيلر والفاونديشن.
- فرشة بودرة.
- فرشة بلاشر.
- فرشة آي شادوا صغيرة للعيون.
- العروسة في الجهاز للمناسبات
مستحضرات مكياج العروسة للمناسبات
بعض مستحضرات وأدوات التجميل بتكون للمناسبات أكتر من الاستخدام اليومي، لذلك ممكن تجيبيها في جهازك وممكن تستغنى عنها حسب رغبتك. على سبيل المثال:
- الهاي لايتر
- روج أحمر جرئ
- رموش صناعية
- جليتر بسيط.
- مثبت مكياج (Spray)
شنطة لقائمة مكياج العروسة في الجهاز
مهما كانت الأدوات أو مستحضرات المكياج اللي جبتيها وعددها، إنتي محتاجة لشنطة تنظمها وترتبها بشكل أنيق.
من الأفضل تكون الشنطة مبطنة أو متقسمة كويس بحيث تعرفي ترتبي المنتجات بشكل كويس دون افسادها.
تقدري تعرفي من خلال منصة إيجي ويدينج عن محلات أدوات المكياج في القاهرة واسكندرية وتقييماتها.
في النهاية، لو إنتي عروسة ملهاش في الميكب، متقلقيش! تقدري تعتمدي على روتين بسيط، فيه كام منتج أساسي يخلي شكلك ناعم ومنور من غير تعقيد. وافتكري إن قائمة مكياج العروسة في الجهاز بتعتمد على راحتك الشخصية واستخدامك، لذلك مش لازم تجيبي كل حاجة بتجيبها البنات. إنك تختاري “منتجات كويسة” بس تحبي تستخدميها أفضل من عشرات المنتجات اللي ممكن تشتريها ومش تستخدميها.
اعرفي أكتر:
تنظيف البشرة.. نصائح لضمان نتائج مذهلة!
ازاى تهتمي بنقاء ونضارة البشرة قبل الفرح؟
هل محتوى المقال دة كان مفيد بالنسبة لك؟
نعم، مفيد!لا!
