فستان جدة العريس لظهور مميز في فرح حفيدها

فستان جدة العريس اللي هتحضر بيه الفرح أو حفلة الخطوبة ممكن يبقى محير في اختياره.

ما بين إننا عايزين نحافظ على الحشمة المناسبة لسن الجدة الجميلة وفي نفس الوقت يكون الفستان شيك ومناسب لأجواء الاحتفال.

والحيرة ممكن تزيد هنا أكتر لو الجدة نفسها مكنتش مهتمة بالموضة واللبس ومش فارق معاها تحضر الفرح بأي حاجة.

فبالتالي هي مبتساعدكوش في اختيار القرار، وانت كعريس ممكن تحس بالغيرة إن عروستك أكيد قادرة تتولى المهمة دي في ناحيتها.

وهتقدر تختار أحلى فستان لجدتها، لكن احنا هنا موجودين عشان نساعدك.

وهنقدم لك أفضل اقتراحات ممكن تناسب الفستان اللي تقدر جدتك تحضر بيه فرحك أو خطوبتك.

وهنحاول في كل أفكار الموديلات اللي هنقدمها لك إنها تكون مناسبة لكل الأذواق.

وده عشان تقدر تختار منها براحتك، ويكون المظهر العام في النهاية يشرفك ويسعدك.

فتابع معانا المقال.

الفستان الشيفون المطرز بالخرز:

الفستان ده هيكون مناسب جداً لأذواق الجدات، وده لإنه كلاسيكي في مظهره وطبعه، ومن النوعية اللي اتعودوا يلبسوها في وقتهم.

وكمان بيتميز باحتشامه لكونه من الفساتين الطويلة المكسية وبأكمام كاملة، وكمان فيه أنواع منه بحزام وهمي عند الوسط.

والحزام ده بيدي منظر للفستان بحيث يبان كإنه طقم تيير من بلوزة وجيبة مش فستان كامل.

والخرز اللي عليه بيدي مظهر براق سواريهي يخليه مناسب جداً لكونه فستان جدة العريس اللي تحضر بيه فرح حفيدها المميز.

الفستان الدانتيل:

وكمان من الموديلات اللي على ذوق الجدات هي الفساتين الدانتيل.

وتقدروا في النوعية دي تختاروا فستان طويل من قماش الدانتيل باللون الوردي اللي هيكون مناسب جداً لأجواء الفرح.

وفي بعض الأنواع منه ممكن يكون معاه حزام عريض من نفس القماش بحيث يصمم فيونكة كبيرة على الجنب.

أو ممكن يبقى فستان منفوش من منطقة الوسط بحزام بسيط وعليه جاكيت صغير من فوق بنفس نوع ولون القماش.

طبعاً دي اختيارات تقدروا تحددوها بناء على ذوق جدتكم وطبيعة أجواء الفرح أو مكان الاحتفال نفسه.

فستان جدة العريس بالترتر:

مفيش أي واحدة من الجدات ممكن تقول لفستان الترتر لا.

مهما كنا بنتريق على الترتر دلوقتي وبنشوفه بلدي إلا إن الحقيقة إنه من أهم خطوط الموضة في كل الفساتين.

والجدات اللي عاصروا بداية ظهور موضة الترتر في الفساتين الشيك اللي كانت خارجة من بيوتات أزياء عالمية هيقدروا جداً فكرة إنهم يحضروا فرحك بفستان شيك من الترتر.

وطبعاً أنسب الألوان منه هو اللون الأسود واللي هيدي جدتك إطلالة مبهرة وبراقة بين كل الحضور.

وممكن كمان الفضي والرمادي يدوا نفس الإطلالة.

أما لو هي بتحب الألوان الزاهية والمبهجة.

فتقدر تجيب لها فستان أحمر مع قماش التل اللي يزين منطقة الرقبة والأكمام هيديها حضور ولا أروع.

بدل سواريه لجدتك:

على الرغم من إن كتير من الجدات ممكن يكونوا بيحبوا المظهر التقليدي في حضور المناسبات والأفراح.

إلا إننا منقدرش ننكر إن البنطلونات بتكون أريح ليهم في الحركة.

وده خصوصاً إنهم كبروا على إنهم يتنشكلوا في ديل الفستان ويقعوا ويقوموا عادي.

وقعة زي دي لو حصلت في السن ده ممكن يبقى فيها كسور والفرح كله يبوظ.

فبدل ما نغامر بفستان يقيد حركتهم أو يكون سبب في إصابتهم، نقدر نستبدل فستان جدة العريس ببدل سواريه شيك.

واللي هتديهم نفس المظهر وأشيك كمان، ونقدر نفضل محتفظين بفكرة الترتر من الفستان اللي فات كمان.

وده بإن البدلة تكون مكونة من تلات قطع:

البنطلون المريح اللي هيخليها تتحرك براحتها طول الفرح وتقدر تبقى واقفة جنبك في كل الصور.

والجاكيت اللي هيتلبس من فوق، وتحته بلوزة سواريه بترتر، وكمان الجاكيت ممكن أكمامه تبقى منتهية بأساور من الترتر.

أو ممكن برضه يكون الجاكيت والبلوزة من قماش الدانتيل المزين المناسب للأفراح.

وبكدة نبقى حافظنا على مظهر وشياكة لبس الفرح وفي نفس الوقت اتمتعنا بحرية الحركة والأمان فيها.

فستان جدة العريس من القطيفة:

أما لو الفرح هيتعمل في الشتا والمكان هيكون بارد على الجدة خصوصاً لو هنسهر لوقت متأخر بالليل.

ففي الحالة دي هيكون اختيار الفستان من القطيفة اختيار مناسب جداً، وده لإنه هيديفها طول الوقت.

وكمان فخامة قماش القطيفة هتديها المظهر الشيك اللي هيلائم أجواء الفرح والاحتفال.

وتقدر تجيب منه ألوان مختلفة على حسب ذوقها واختياراتها.

وبكدة نكون قدمنا لكم اختيارات مختلفة تقدروا تستعينوا بيها في اختيار فستان جدة العريس اللي هتحضر بيه فرحكم.

نتمنى إننا نكون قدرنا نفيدكم ونساعدكم في اختياراتكم ونتمنى لكم فرح سعيد وبداية حياة جديدة سعيدة مليانة حب وهنا.