رفايع تجهيزات العريس هتحتاجوها لعشكم الجديد
رفايع تجهيزات العريس دي حاجات ممكن متاخدش بالك منها وانت بتجهز بيتك الجديد في وسط زحمة اهتمامك بالعفش الأساسي وفرش الأوض.
صحيح إن زحمة الفرش وشراء العفش هتاخد كل اهتمامك وتركيزك، وفي وسط ده ممكن تنسى حاجات بسيطة.
لكنها مهمة جداً لأي رجل في بيته، دلوقتي انت رايح بيتك الخاص.
فيه حاجات كتير كنت معتمد طول الوقت انها موجودة في البيت عند أهلك، كنت بتستخدمها طول الوقت.
فواخد إن وجودها وتوافرها ده أمر طبيعي، لكن لو مشترتهاش بنفسك في بيتك الجديد هتتافجئ إنها مبقتش موجودة.
ومش معقولة هتسيب بيتك وترح بيت أهلكم كل شوية عشان تستخدم الحاجات دي أو تستلفها منهم وترجعها.
الطبيعي إن يكون عندك نسختك الخاصة من المستلزمات دي في بيتك تستخدمها وقت ما تحب.
وعادة كل المقالات بتتكلم عن جهاز العروسة واللي بتحتاج تاخده معاها وهي رايحة بيتها الجديد.
ومحدش بيتكلم عن عريس العروسة دي.
وكإن هو كمان مش رايح بيت جديد وهيحتاج ياخد معاه حاجات يبدأ بيها حياته الجديدة دي وتسهلها عليه.
وعشان كدة احنا هنا في المقال ده جمعنا لكم أكتر الرفايع اللي ممكن تحتاجها في بيتك.
ومع ذلك ممكن متنتبهش ليها وانت بتجهز بيت جديد؛ فتابع معانا المقال.
مكبر صوت بلوتوث من رفايع تجهيزات العريس:
لو كنتم من محبي الحفلات أو بتحبوا تسمعوا أغاني طول الوقت.
أو حتى بتعتمدوا في شغلكم ودراساتكم على الكورسات الصوتية الأون لاين.
يبقى أنتم أكيد محتاجين مكبر صوت بلوتوث تقدروا تربطوه بأي جهاز عندكم أو تشغلوا عليه اليو إس بي.
وبكدة تقدروا تسمعوا اللي انتم عايزينه طول اليوم في البيت في أي أوضه منه وانتم بتعملوا أي نشاط تاني.
من غير ما تكونوا مضطرين تقعدوا جنب الجهاز عشان تسمعوا اللي انتم عايزين تسمعوه.
وكمان من المميز إن النوع ده من المكبرات بيكون بألوان مختلفة.
فتقدروا تختاروا منها اللي يناسب ذوقكم أو يليق مع ديكورات البيت.
مجموعة عدة تصليح:
ليه أدوات التصليح ممكن تبقى من أهم رفايع تجهيزات العريس اللي ممكن تحتاجها ولازم تكون عندك؟
طبعاً انت طول عمرك معتمد إن أي حاجة بتبوظ في البيت باباك هو اللي بيصلحها وانت مالكش دعوة بحاجة!
بس الكلام ده معدش ينفع خلاص، لما حاجة تبوظ عندك في البيت بابا وماما مش هيجوا من بيتهم عشان يصلحوها لك.
خلاص انت بقيت راجل البيت وشوية وهتبقى انت كمان بابا؛ فلازم تكون عارف تصلح كل حاجة في البيت بنفسك.
طبعاً فيه حاجات هتحتاج صنايعية متخصصين سواء نجارين أو سباكين لكن فيه برضه حاجات بسيطة مش هتكون محتاج تجيب حد يصلحها مخصوص.
عشان كدة لازم يكون عندك شنطة عدة فيها أدوات التصليح اللي ممكن تحتاجها في أي مشكلة بسيطة زي تغيير اللمب أو تثبيت مسمار في كرسي أو ترابيزة.
وشنطة العدة دي عادة بيكون فيها شاكوش وكشاف وكماشة وشريط قياس وإزميل وشوية مسامير.
شنطة رياضية من رفايع تجهيزات العريس:
سواء كنت بتطلع رحلات سفر مع صحابك في الويك إيند أو بتروح الجيم كتير أو بتشيل لاب توب معاك دايماً.
في كل الأحوال دي هتحتاج شنطة رياضية تكون معاك في بيتك الجديد عشان تقدر تروح بيها أي مكان بسرعة وسهولة من غير ما تشيل هم.
وطبعاً لازم تختارها من خامات كويسة ومتينة عشان تقدر تستحمل تقل حاجتك في مشاوريك رايح جاي.
مج حراري:
أكيد عندك مجك الخاص اللي بتشرب فيه دلوقتي، بس بما إنك داخل على حياة جديدة؛ فالأفضل انك تبدأها بكل حاجة جديدة.
وعشان كدة من رفايع تجهيزات العريس إنك تجيب مج حراري جديد، وهتكون لفتة رومانسية منك لو جيبته مطبوع عليه صورة ليك مع عروستك.
أو ممكن تنقش عليه أساميكم أو أول حروف منها بس مع تاريخ جوازكم لو مش حابب ان صورتها واسمها يكونوا ظاهرين طول الوقت في أي مكان تاخد فيه المج.
منتجات العناية الشخصية:
طبعاً دلوقتي وانت رايح على بيت جديد لازم يكون معاك منتجات العناية الشخصية اللي بتستخدمها كل يوم.
حضر شنطة صغيرة يكون فيها الشامبو اللي بتستخدمه والبلسم وكريمات الشعر والبشرة لو بتستخدمها.
وكذلك طبعاً أدوات ومكن الحلاقة وكريمات الحلاقة، والمشط والفرشاة ومقص الضوافر، وبرفانك الخاص ومزيلات العرق، ومرطب الشفايف.
وفي النهاية نتمنى إننا نكون قدمنا لك أفكار مفيدة تساعدك تعرف رفايع تجهيزات العريس اللي هتكون محتاجها وانت بتجهز لحياتك الجديدة.
ونتمنى لك بداية حياة جديدة سعيدة مع شريكة حياتك اللي قلبك اختارها وحبيتها، وتكون قصة حبكم أبدية يتحاكى بيها في كل مكان.
هل محتوى المقال دة كان مفيد بالنسبة لك؟
نعم، مفيد!لا!
