ديكورات تصوير لدبلة الفرح تقدروا تنفذوها بنفسكم بدون فوتوجرافر

من أجمل التفاصيل اللي العروسين بيركزوا عليها أجمل ديكورات تصوير لدبلة الفرح لإن بالنسبالهم الدبلة لا تقل أهمية عن يوم الفرح بكل تفاصيله.

ولإن كل تفصيلة صغيرة في ديكورات التصوير بيكون ليها معنى ودلالة على علاقة العروسين ببعض هنقولكم أفكار ديكورات تصوير لدبلة الفرح توضح مقدار الحب بينكم عشان تفضل أجمل ذكرى طول العمر.

ديكورات تصوير دبلة الفرح مع بوكيه الورد

من أفضل الصور الرومانسية تصوير الدبلة مع البوكيه، خاصة إنه هيكون متوفر طول الفرح فتقدروا تتصوروا بيه وضعيات كتير في السيشن وقاعة الزفاف، وعشان الصور تكون مثالية ممكن نعتمد على تفاصيل إضافية.

بوكيه الورد مع العروسين

هيكون البوكيه بينكم يتمسك باليد اللي فيها الدبلة، ويتقدم البوكيه أمام الوجه بحيث يكون هو الواضح فقط في الصورة مع الدبلة. ممكن صورة تانية يصورها الفوتوجرافر من كادر علوي هيظهر تفاصيل البوكيه والدبلة مع تفاصيل لبسكم يوم الفرح.

بوكيه الورد مع ديكور

الصورة هنا تنفيذها أسهل وتفاصيلها أجمل، هيكون بوكيه الورد على أي ترابيزة وجنبه الدبلة. مع إضافة تفاصيل بسيطة زي وردة على الجنب، أو ظرف رسالة فارغ، أو أي اكسسوار بسيط.

ديكورات تصوير لدبلة الفرح مع اكسسوارات العروسين

هنا هيكون التركيز على تصوير الدبلة مع اكسسوارات العروسة زي الشوز والطرحة والسلسلة والاكسسوارات الذهبية اللي هتلبسها، وكمان معانا تفاصيل واكسسوارات العريس من ببيون أو جرافت، أو الشوز، ونقدر نصور وضعيات كتير جدًا، منها على سبيل المثال:

• تصوير الدبلة مع شوز العروسة والطرحة والبوكيه، كل التفاصيل دي في جانب واحد والدبلتين في وسطهم.
• تصوير الدبلتين مع شوز العروسة والعريس، والتركيز على إن وضعهم يبقى واخد شكل قلب.
• تصوير الدبلتين في وسط السلسلة وعلى جنب باقي المجوهرات.
• تصوير الدبلتين مع وضعهم على بعض بشكل جزئي وعليهم الطرحة. أو وضع الطرحة بشكل عشوائي وفوقها الدبلتين.

ديكورات تصوير لدبلة الفرح مع رسائل وأوراق

من أكثر الوضعيات اللي بتدي شعور بعمق العلاقة بينكم، هتكون دلالة واضحة جدًا على مقدار الحب والتفاهم بينكم. وممكن نطبق ديكورات كتير منها على سبيل المثال:

• ترتيب رسائل وأظرف بشكل عشوائي وعليهم الدبلتين.
• ترتيب عشوائي تاني للرسائل ولكن مع كتابة جملة لطيفة على رسالة وتصوير الدبلتين بجانب الجملة.
• وضع ظرف مفتوح وجواه الدبلتين بشكل جزئي، وكتابة جملة لطيفة على الظرف.
• وضع ورقة عليها شعار خاص بذكرى بينكم أو مناسبة خاصة ووضع الدبلتين بجانبهم.

ديكورات بسيطة لتصوير الدبلتين

هنا بقى البساطة كلها، ديكورات تقدروا تنفذوها بنفسكم وتصوريها بنفسكم بدون أي جهد أو أي تفاصيل إضافية:

• رسالة فاضية ترسموا عليها قلب والدبلتين في وسطه.
• قماش حرير أو ستان يتلف بشكل دائري والدبلتين في وسطه.
• طرحة الفستان تتجمع على شكل قلب وتستخدموا مشابك شعر العروسة على طرفي القلب كأنهم سهم يخترق القلب، وعلى كل طرف من السهم دبلة.
• صندوق صغيرة أو أي علبة متوفرة وتتحط فيها ورود جافة أو طبيعية وعليها الدبلتين.
• باستخدام شمع في كوب زجاجي أو اي إنعكاس موجود لأشعة الشمس، وفي الضوء نصور الدبلتين وهما على بعض بشكل جزئي.

في الآخر أي ديكورات تصوير لدبلة الفرح هي وسيلة تعبير عن الترابط اللي هيبدأ بينكم، فطبيعي يكون ديكور خارج من القلب وحاسيين بأهميته. مش مجرد صورة هتشاركوها على وسائل التواصل.

اقرأ أيضًا:وضعيات تصوير دبلة الفرح صور منتهى الرومانسية.

اقرأ أيضًا: وضعيات صور عرايس محجبات من غير لوكيشن تصوير.