خسارة شريكة حياتك… أسهل طريقة لده

لقيت حب عمرك خلاص وبتستعد للفرح أو اتجوزتم فعلاً وبدأتم حياتكم الجديدة، أكيد خسارة شريكة حياتك مش هي الحاجة اللي بتسعى لها بعد كل التعب ده!

الست القوية نادرة وجميلة، مرت بحاجات ومصاعب كتير في حياتها.

بس دايماً قدرت إنها تشق طريقها بنفسها رغم كل المشاكل اللي قابلتها.

هي عارفة هي عايزة إيه من الدنيا كويس، ذكية ومجتهدة وتقدرش تقبل يأي شريك إلا لو كان على نفس مستواها.

شريك حياتها لازم يكون داعم ومتفهم وتحس إنها تقدر تعتمد عليه.

ولإنها صادقة مع نفسها وعارفة قيمتها كويس فمش أي حاجة ممكن ترضيها.

لو خطيبتك أو مراتك من النوع ده، وانت فخور باختيارك ليها وانها اختارتك عن الكل.

فلازم تعرف ان فيه تصرفات ممكن برضه تقتل علاقتك بيها وتخليها تتراجع عن اختيارها ليك وتندم عليه.

وعشان كدة في المقال ده حبينا نجمع لك بعض التصرفات اللي ممكن توصلك إلى خسارة شريكة حياتك.

واللي استحالة أي واحدة ناضجة وعندها شخصية مستقلة تقبل بيها.

ونتمنى انك تاخد بالك منها وانتم لسة في بداية حياتكم مع بعض عشان تبني الحياة دي صح.

عدم الاحترام:

احترام الطرفين لبعض هو الأساس اللي بتتبني عليه أي علاقة سوية ناجحة وسعيدة.

وأي واحدة ناضجة وفاهمة الحياة صح عارفة كدة كويس، وعشان كدة استحالة تتسامح في تعاملك معاها بقلة احترام ومعاملة سيئة.

أو انك تستخدم لغة مهينة تقلل منها وانت بتتكلم معاها، وده سواء كنت بتقلل من شخصيتها هي نفسها أو مظهرها أو طريقة كلامها أو هوايتها أو شغلها أو صحابها وأهلها أو أي حاجة بتعبر عنها وبتحبها في نفسها.

وده مش معناه ان ممنوع تتكلم معاها وتعترض مثلاً على أي حاجة بتعملها انت ممكن تكون شايف جانب ما منها سلبي، لكن فيه فرق بين النقد البناء اللي هدفه إني انصح الطرف التاني؛ عشان أنا مهتم بيه وبمصلحته، وبين السخرية والاستهزاء اللي هدفهم التقليل من الطرف التاني.

والست الناضجة بتقدر تفرق بين الاتنين كويس.

والاحترام مبيتجزأش؛ فزي ما تحب إنها تعاملك وتحترمك احترمها وقدرها، إلا لو كنت حابب خسارة شريكة حياتك في أقرب وقت.

الكذب أهم أسباب خسارة شريكة حياتك:

مفيش إنسان بيحترم نفسه بيقبل إنه يتعامل مع حد كداب، وده بينطبق كمان على الزوجة والحبيبة.

مفيش واحدة بتحترم الراجل اللي بيكذب، وزي ما قلنا في النقطة الأولانية إن أهم حاجة في أي علاقة هي الاحترام.

فلو كسرت احترامها ليك بكذبك هتقع من نظرها ومش هتقدر تكمل معاك مهما كانت بتحبك.

ومتبررش أي كذبة بإنها كذبة بيضا عشان المركب تمشي، لإن في النهاية الكذب مالوش رجلين، وهيجي يوم وتعرف كذبتك.

وساعتها مش هتقدر تسامحك عليها، الست القوية بتفضل انها تواجه الحقيقة بصراحة مهما كانت مرة أو قاسية على إنها تعيش في الوهم، وتكتشف فجأة إنها كانت مغفلة، دي حاجة استحالة تتسامح فيها.

عدم الأمان:

صحيح إننا في الوقت الحالي كستات نبان استرونج اندبندينت وومان، واننا معتمدين على نفسنا ومش محتاجين حد في حياتنا يكون مصدر للأمان.

بس الحقيقة ان الست لما بتحب وتقرر تتجوز بيكون معيارها الأساسي في الاختيار انه يكون راجل بتحس معاه بالأمان.

إنها تبقى عارفة ان لو الدنيا كلها جت عليها هتجري تستخبى في حضنه وهو هيحميها من العالم كله؛ فلو مكنتش مصدر للإحساس ده تدريجياً هتلاقي نفسك بتخسرها لإنها مش حاسة بأهمية لوجودك في حياتها.

الخيانة تساوي خسارة شريكة حياتك للأبد:

إذا كان الكذب سبب من أسباب خسارة شريكة حياتك؛ فالخيانة أكبر وأسوأ، وعادة أصلاً بتكون هي السبب الرئيسي ورا الكدب.

وزي ما انت استحالة تقبل تستمر في علاقة سواء كانت جواز أو لسة حب بس مع واحدة خانتك؛ فمفيش واحدة بتحترم نفسها برضه هتقبل تكمل مع واحد خانها تحت أي مسمى.

صحيح في مجتمعنا عادة ما بنبرر خيانة الراجل وبنضغط على الست انها تسامحه فيها، بس لو كانت الانسانة اللي في حياتك فعلاً واحدة ناضجة وشخصيتها قوية استحالة هترضخ لضغوط المجتمع في النقطة دي.

هي هتبقى عارفة كويس إنك زي ما خنتها مرة هتخونها تاني وتالت، وعشان تسامحك لازم تعمل المستحيل عشان تثبت لها إنك اتغيرت، ويمكن برضه في النهاية متقدرش تسامحك.

فلو فعلاً مش عايز توصل لمرحلة خسارة شريكة حياتك وبذل مجهود خرافي بعدها عشان تقدر تسامحك وترجع تثق فيك تاني، حاول من الأول تبعد عن التصرفات دي، عشان تعيشوا حياة طويلة أبدية مع بعض.