حفل زفاف بتجربة حسِّية متكاملة لمحبي الأفكار المختلفة

الكل دلوقتي بيدور على فكرة فرح متتنسيش، عشان يكون مميز ومختلف، سواء بقى بتغيير في شكل الديكور. أو فقرات مختلفة ومتنوعة في الفرح، أو تنظيم فرح صديق للبيئة زي اللي نصحنا بيه قبل كدا.

وعشان أفكارنا دائمًا مختلفة المرة دي هنقولكم تفاصيل تجربة فرح حسِّية من خلالها هيفضل فرحكم ذكرى لا تُنسى. عشان مش بس المعازيم هيفتكروا تفاصيل الفرح بشكلها، كمان هيفتركروها بريحتها ولونها وتميزها.

حفل زفاف بتجربة حسِّية بداية من الرائحة

الريحة ليها قوة سحرية ممكن تشموا ريحة معينة وتفضل عالقة في عقولكم سنين. فإيه رأيكم نبدأ بإعداد رائحة مخصصة للفرح، هتكون حصرًا لمناسبتكم الخاصة وممكن استخدامها في الذكرى السنوية للزفاف.

• من خلال متخصص في إعداد العُطور هتوصفوله الروائح المُفضلة ليكم، وإزاي بتأثر معاكم. وخاصة النوتات العطرية المناسبة لمود الفرح، زي الفانيليا، اللافندر، الورد الأبيض أو أي نوع تاني مفضل.
• العُطور هيتم توزيعها على مفارش الترابيزات، ومناديل السحب، بحيث الرائحة تفضل متواجدة لأطول فترة ممكنة.
• ممكن توزيع شموع للمعازيم بنفس الرائحة، بحيث تفضل ذكرى تفكرهم بالفرح وأجوائه.
• في أركان بعيدة عن المعازيم يتم توزيع فواحات كهربائية، لتوزيع العطر كل فترة زمنية بسيطة. بحيث الرائحة متكونش زيادة عن اللازم أو تسبب ضيق للمعازيم.

موسيقى تتناسب مع حفل زفاف بتجربة حسِّية

في الفرح دا الدي جي مالوش دور إبداعي خالص، لإن إختيار الموسيقى للعروسين فقط. إنتم المتحكمين في المود العام للموسيقى اللي عايزين تسيبوه كذكرى سمعية تبقى لأطول فترة في ذاكرة الحضور. وتقدروا تبدعوا في الجزء دا بأفكار كثيرة جدًا، منها على سبيل المثال:

• موسيقى دخول العروسين هتكون بداية تعريفية لنوع الموسيقى اللي اختارتوه. يعني زفة تقليدية ولا زفة كمانجا أو بيانو على سبيل المثال.
• إعداد بلاي ليست بها كل الأغاني اللي اخترتوها لكل مرحلة أو كل فقرة من فقرات الفرح.
• موسيقى خاصة لوقت البوفيه، واللي ضروري تكون متماشية مع التجربة الحسِّية للأكل اللي هتستعدوا ليها في الجزء التالي من المقالة.
• موسيقى الرقصات الهادئة تتماشى مع نوع الزفة سواء تقليدية أو كمانجا.

التذوق واللمس في حفل زفاف بتجربة حسِّية

في الفرح هنركز كمان على إن التذوق واللمس يكون ليهم ذكرى خاصة، يعني لو حابين مود كلاسيكي أو مودرن تقدروا تعكسوا دا على حاسة التذوق واللمس.

التذوق جزء من التجربة الحسِّية

هنركز على الأكل إنه يكمل التجربة اللي هيعيشها المعازيم، سواء كان التركيز على الطبق الرئيسي أو الأطباق الجانبية. أو حتى بالتركيز على حلوى مميزة تناسب المود العام للفرح.

لو مختارين أكلات للمطبخ الشرقي ممكن تقدموا الحلويات بقلاوة بدل الجاتوه. وبدل المشروبت الغازية مشروب ليمون بالنعناع فريش.

إزاي تخلوا اللمس ذكرى

اللمس شعور بسيط لكنه بيسيب ذكرى، كمان له تأثير على الشعور بالسعادة والهدوء. على سبيل المثال استخدام مفارش من الكتان تأثيرها مختلف عن الحرير أو الشيفون. تقدروا من خلال اختيار ويدينج بلانر مناسب تحديد نوع القماش الأمثل أو المناسب لمود الفرح.

ومن الذكريات الخاصة بذاكرة اللمس توزيعات الفرح اللي ممكن تكون من ميداليات خشبية أو منتج طبيعي. المهم يكون ليه ملمس خاص متماشي مع التجربة الحسِّية للفرح.

اختيار الألوان مكمل للتجربة الحسِّية

طبيعي بعد اختيار كل شيء ككجزء من تجربة متكاملة تظل ذكرى بكل الحواس إنكم تختموا التجهيزات بألوان متكاملة مع التجربة. بداية من اختيار ديكور الفرح وألوان المفارش وحتى ألوان وحدات الإضاءة.

لازم تركزوا إن كل جزء في حفل زفاف بتجربة حسِّية يكون مُكمل للجزء اللي قبله. عشان في النهاية تتكون صورة خاصة ومميزة للفرح تفضل ذكرى للأبد.

اقرأ أيضًا:

كيفية اختيار ويدينج بلانر مناسب يخطط لفرح يفوق التوقعات.

تنظيم حفل زفاف صغير بتكاليف أقل وجودة أعلى.