تنظيم فرح صديق للبيئة في مصر فكرة مميزة وبرة الصندوق

وسط الزحمة اللي عايشين فيها، ومع كل التغيرات المناخية وأضرار التلوث اللي بناعان منها، ممكن نوقف لحظة ونفكر، ماذا لو حولنا مناسباتنا لمناسبات صديقة للبيئة؟ بالظبط كدا المقالة دي عشان تساعدكم في تنظيم فرح صديق للبيئة في مصر، فكرته هتكون جديدة يعني هتخليكم مميزين. وبما إنكم تحافظوا على البيئة فهتكون فكرة مثالية جدًا إن الناس تقلدها وتتناقلها.

وبدل ما التريند يكون شيء مش مناسب أو أمر مغاير لطبيعة المجتمع، هتعملوا تريند رائع وهتساعدوا البيئة تتنفس وتعملوا توعية بأهمية الحفاظ على البيئة؟

فرح صديق للبيئة بداية من كروت الدعوة

لإن أهم سمة بيدور عليها العرسان هي التميز والإختلاف، هنساعدكم تعزموا للفرح بشكل مختلف تمامًا، وكمان الدعوة تكون صديقة للبيئة، ودا تقدروا تنفذوه بطريقة من الاتنين:

• الطريقة الأولى: وهي الأسهل والأوفر، مش هتحتاج منكم تكلفة، وهي تصوير فيديو لطيف للعروسين بيوجهوا الدعوة بنفسهم ويقولوا تفاصيل الفرح ومكانه ومعاده. وطبعًا تنفيذ الفكرة إلكتروني يعني تُرسل الدعوة على واتساب أو فيس بوك، وبكدا مفيش أي تأثير على البيئة.
• الطريقة الثانية: هتكون تقليدية لفكرة كروت الدعوة، ولكن التَمَيُز في خامة الكارت. عشان هيكون من خامات صديقة للبيئة زي الأوراق القابلة للتحلل السريع. والمشكلة في الطريقة دي إن التكلفة هتكون مرتفعة عن تكلفة الأوراق العادية.

ديكور مستدام لـ فرح صديق للبيئة

بما إن الهدف من البداية تنظيم فرح صديق للبيئة فطبيعي يكون الديكور شيئ ملفت للنظر ويشجع الحضور على تقليد الفكرة. عشان كدا اختياركم هيكون ما بين بعض الأفكار لديكورات أو خامات بتحقق الغرض الأساسي وهو الحفاظ على البيئة، بدل من ديكورات قابلة للتلف والتخلص منها بيأثر على البيئة. ومن الأفكار المثالية جدًا على سبيل المثال:

• استخدام أشجار زينة تناسب ديكور الفرح ومع انتهاء الفرح تُترك في المكان، أو يُزين بها البيت. أو عل الأقل تكون من أماكن مخصصة في تأجير أشجار الزينة.
• استخدام قصاري فخار طبيعي بها ورد طبيعي لتزيين طاولات الفرح، وتكون في نفس الوقت هدية للمعازيم في نهاية الفرح بدل من توزيعات العروسين اللي بتكون من خشب قابل للتلف أو خامات بلاستيك.
• الفرح يكون نهاري عشان تقللوا من استخدام مصادر إضاءة متعددة، منها استهلاك للطاقة، وكمان خامتها قابلة للتلف وغير صديقة للبيئة.
• أما بقى فستان الفرح فبما إن الفرح صديق للبيئة فالعروسة هتحتاج تختار فستان ممكن تستخدمه مرة تانية، أو على الأقل تتبرع بيه لمكان تاني بحيث يتلبس أكثر من مرة فنقلل مقدار تلوث البيئة. وطبعًا بدلة العريس يقدر يلبسها في مناسبات كثيرة أو يحتفظ بيها لمناسبات خاصة.

بوفيه الفرح هيكون صديق للبيئة

مش معنى إنكم فكرتوا في تنظيم فرح صديق للبيئة إنكم هتتنازلوا عن أفكار حابين تنفذوها. بل بالعكس هنحاول نخلي كل فكرة تبقى أحلى بتنفيذها بخطوات سهلة وإمكانيات متوفرة.

بالنسبة لبوفيه الفرح ممكن تتنفذ فيه أفكار رائعة جدًا:

• هنلغي فكرة توزيع الأكل في أطباق من الفلين والمعالق والشوك البلاستيك. تقدروا تستبدلوها ببوفيه مفتوح موزع فيه الأكل على أطباق ومعالق وشوك قابلة للغسيل وإعادة الاستخدام.
• هتعتمدوا على باسكت قمامة لإعادة الاستخدام أو أي شيء بديل. بحيث يتم التعامل مع أي توزيعات للعصاير أو الصودا من خلال وضعها في مكان مخصص لها حسب خامتها.
• تقدروا كمان تتفقوا مع جمعية خيرية تجهز باقي الطعام بشكل مناسب لتوزيعه على المحتاجين.

بوكيه الورد إزاي يكون صديق للبيئة

تقدروا تتعاملوا مع بوكيه الورد بطريقة من اتنين، إما يكون نوعه نفسه صناعي فتقدروا تحتفظوا بيه وبكدا مش هيكون مؤثر في البيئة.

أو يكون ورد طبيعي وتحتفظوا بيه من خلال تجفيفه وحفظه في صندوق خاص تستخدموه كديكور في البيت. وبكدا برضو هتكونوا قللتوا الهدر في كل خامات استخدمتوها في الفرح.

في النهاية فكرة تنظيم فرح صديق للبيئة فكرة من بين أفكار كتير جديدة على المجتمع المصري. لكن لو شخص واحد بدأ الفكرة هتنتقل لأفراح كثيرة جدًا، لدرجة إن يبقى العادي الفرح يكون صديق للبيئة.

اقرأ أيضًا:

أفكار تصميم ألبوم الفرح وتنظيمه بشكل مختلف.

أخطاء في تجهيزات الفرح إزاي تتجنبوها.