تغيير الخطط في اللحظة الأخيرة إزاي تتعامل معاها؟
تغيير الخطط في اللحظة الأخيرة أمر نادر ومستبعد، لكن للأسف أحياناً بيحصل ويكون أمر واقع.
مهما خططت لحفل زفافك على أكمل وجه، هتفضل هناك احتمالية حصول أي حالات طارئة.
ومن الحالات الطارئة دي إن حد من المسئولين عن تفاصيل الفرح زي شيفات الأكل أو مسئولين الموسيقى.
أو اللي بينسقوا الديكور، أو حتى القاعة نفسها يلغوا التزامهم معاك في آخر لحظة.
وأكيد انت أخدت وقت كبير تختار فيه الناس دي بالشكل المناسب ليك ولعروستك عشان تحولوا حلم فرحكم لحقيقة.
لكن كل ما يوم فرحكم بيقرب بيكون برضه فيه احتمالية لظهور مواقف مختلفة ممكن تتقلب لحالة طوارئ.
وأكبر حالة إن حد من الناس اللي اخترتوهم عشان تعتمدوا عليهم في اليوم ده يضطر يلغي التزامه معاكم في آخر لحظة.
وطبعاً ده هيلخبط كل خططكم وهيوتركم وممكن يخليكم تحسوا إنكم مشلولين عن التفكير.
لكن افتكروا دايماً إن طول الوقت بيكون فيه حلول، وإن المرونة هي طريقكم الوحيد عشان تلاقوا الحلول دي.
وفي المقال ده احنا هنحاول نساعدكم في الخطوات اللي تقدروا تفكروا فيها وتمشوا عليها لو اتحطيتوا في الموقف ده.
وكل ده عشان تقدروا تحققوا حلم الفرح اللي اتمنيتوه طول عمركم.
ومتحسش إنك خذلت عروستك ومقدرتش تحقق لها حلمها في اليوم المميز ده؛ فتابع معانا المقال.
خد الظروف في الاعتبار لما يحصل تغيير الخطط في اللحظة الأخيرة:
أولاً وقبل أي حاجة لازم تكون عارف كويس إن ده أمر نادر جداً إن حد من المسئولين عن الشغل في الأفراح يلغي التزامه مع عميل من غير ما يبلغه قبلها بوقت كافي.
الناس دي سمعتهم في المجال بتعتمد على التزامهم، وده أكل عيشهم والناس اللي حواليهم؛ فمش هيضحوا بيه بسهولة كدة.
فلو ده حصل يبقى فعلاً فيه أمر كبير أضطرهم لده، ومش مجرد ذريعة للتهرب مثلاً.
في الأول والآخر برضه دول بشر؛ فممكن تحصلهم ظروف قهرية مؤسفة زي أي حد.
مثلاً حد من أفراد أسرتهم يموت، أو يعملوا حادثة، أو أي ظروف مشابهة تجبرهم يعتذروا.
خد نفسك:
حتى لو كنت فاهم ومقدر المشكلة اللي حصلت واضطرت إن يحصل تغيير الخطط في اللحظة الأخيرة، لكن ده مش هيلغي خضتك وتوترك.
معظم الناس بيحلموا بلحظة فرحهم دي سنين ويمكن عقود، وبالنسبة لعروستك ممكن يبقى من يوم ما وعيت على الدنيا.
فعشان كدة من الطبيعي إنكم تحسوا بالتوتر، لكن متخليش الغضب وإلقاء اللوم هو اللي يسيطر عليكم.
المهم دلوقتي إننا نقدر ناخد خطوات فعلية نصلح بيها الوضع بسرعة.
وأسهل خطوة ممكن تعملوها في لحظتها هي إنكم تسألوا الشخص اللي اعتذر إنه يرشح لكم بديل.
وغالباً هو هيكون مستعد يرشح لك البديل ده قبل انت ما تسأل أصلاً، لإن سبب الإلغاء خارج عن سيطرته، وهيحاول يعمل أي حاجة تعوض ده.
بس الأسئلة اللي هتحتاج تعرف إجابتها هي إن البديل ده هيكون في نفس المستوى والجودة والسعر ولا مختلف؟
بلغ منظم الحفلات الخاص بيك عن تغيير الخطط في اللحظة الأخيرة:
لو كنت معين منظم حفلات مسئول عن فرحك، يبقى أول ما يحصل حاجة زي دي لازم تبلغه فوراً، وسيبه هو يتولى المشكلة.
ده تخصصه وهو هيقدر يتواصل مع أشخاص بديلة يقدروا يقوموا بنفس المهمة اللي تم الاعتذار عنها.
وده لإنه بطبيعة شغله عارف كل الناس اللي شغالين في المجال، ومين ممكن يحل مكان مين وبنفس الجودة والسعر.
وممكن يبقى فيه حد بديل في نفس الناس الباقية اللي انت بتتعاون معاهم في بقية تفاصيل الفرح لكن انت متعرفش.
هو هيقدر يعرف كل التفاصيل دي ويحلها بلمح البصر، ويتعامل مع الموضوع بسرعة واحترافية؛ لإن ده أصلاً اللي هم بيشتغلوا عشانه.
دور في جروبات الفيس والسوشيال ميديا:
لو معندكش منظم حفلات شغال على فرحك، والبديل اللي عرضه عليك الشخص المعتذر مكنش مناسب في حالة تغيير الخطط في اللحظة الأخيرة.
واضطريت في النهاية إنك تدور بنفسك من تاني يبقى كحل سريع حاول تدور في جروبات الأفراح على السوشيال ميديا.
اكتب بوست سريع عن اللي حصل وانك مزنوق في الوقت ومحتاج بدايل سريعة بس تكون بجودة معين وحدد باكيدج الأسعار اللي تقدر عليه.
عادة البوستات اللي من النوعية دي بتجيب تفاعل سريع، وممكن تلاقي أشخاص بيقوموا بالمهمة دي يردوا عليك ويعرضوا عليك شغلهم.
بدايل سريعة عند تغيير الخطط في اللحظة الأخيرة:
ممكن تطلب ترشيحات من الناس التانية اللي شغالة معاك على الفرح، بس حتى لو ده منفعش فأحياناً بيكون فيه بدايل سريعة تعوض الموقف.
فمثلاً لو كان الشخص أو الجهة اللي اعتذرت دول هم اللي كانوا مسئولين عن الأكل؛ فممكن تستبدلهم بطلب وجبات جاهزة من مطعم.
أو لو كان مسئول الموسيقى؛ فممكن تحضر قايمة الأغاني بنفسك، وتستخدم مكبرات صوت وسماعات في الفرح لتشغيلها.
جايز تكون دي مش أفضل الحلول لكنها بدايل سريعة لو كان الوقت فعلاً زنق ومش هتلحق تدور على بديل محترف تاني.
في النهاية لازم تكونوا متأكدين إن أهم حاجة في فرحكم هي إنكم مع بعض؛ فمتخلوش أي حاجة تانية تأثر عليكم.
ومهما كان فيه تغيير الخطط في اللحظة الأخيرة فالمهم انكم تفضلوا مع بعض لآخر لحظة في حياتكم.
ونتمنى لكم بداية حياة زوجية سعيدة بعيدة عن كل الضغوطات والتوتر ومليانة بحب وفرح طول الوقت.
هل محتوى المقال دة كان مفيد بالنسبة لك؟
نعم، مفيد!لا!
