تصميمات دعوات الفرح 3 أفكار مختلفة اختاروا منها اللي يناسبكم

سواء كنتم بتجهزوا لخطوبتكم أو فرحكم؛ فأكيد بتفكروا في تصميمات دعوات الفرح اللي هتبعتوها لقرايبكم وصحابكم عشان تعزموهم يشاركوكم فرحتكم.

لكن ممكن تبقوا مش حابين تعتمدوا على الدعوات التقليدية اللي اتعودنا عليها من ساعة ما وعينا للدنيا.

وبنشوفها بتجيلنا دايماً في كل عزومة على خطوبة أو فرح، دعوة تقليدية محطوطة في ظرف تقليدي بتتفتح وجواها ورقة ستان.

ومكتوب على الدعوة ان فلان وفلان بيدعوكم لحضور حفل خطوبة أو زفاف ابنه وكريمته فلان وفلانة في المكان الفلاني الساعة كذة.

وعلى قد ما اتعودنا على الدعوات دي إلا إنها في الحقيقة بقت دعوات مكررة أوي.

ومبتعبرش خالص عن روح العريس والعروسة نفسهم وشخصيتهم وطبيعة علاقتهم.

الدعوات دي بتبقى رسمية أكتر منها حميمية وموجهة من أهل العريس والعروسة مش منهم هم.

فلو حابين تكونوا مختلفين وتعملوا تصميماتكم بشكل يناسبكم ويظهر شخصيتكم وقصة حبكم؛ فاحنا هنا جيبنا لكم أفكار مختلفة تقدروا بيها تحققوا ده.

وكمان التصميمات دي هتبقى مناسبة جداً إنكم تقدروا تستغلوها في انكم تشاركوها على حساباتكم في السوشيال ميديا وتعلنوا بيها للكل عن ميعاد فرحكم أو خطوبتكم.

وده عشان تقدروا توصلوا لكل الناس اللي حابين تعزموهم لكن مش عارفين عناوينهم بالظبط عشان تقدروا تبعتوا لهم الدعاوي لحد بيوتهم.

أو حتى تستخدموها في مجرد الإعلان عن خطوبتكم أو جوازكم وتشاركوا العالم فرحتكم؛ فتابعوا معانا المقال.

تصميمات دعوات الفرح بستايلات هادية:

لو كنتم بتحبوا الألوان والتصميمات البسيطة الهادية؛ فتقدروا تختاروا تصميم دعوة فرحكم بلون هادي زي الزهري أو الروز مثلاً.

فممكن يكون تصميم بسيط فيه ورد وأغصان خضرا حواليها مع كتابة بسيطة فيها الدعوة اللي بتوجهوها لضيوفكم.

أو رسومات بسيطة لريش وحمام أو عصافير ملونة حوالين الكلام اللي في الدعوة، أو ممكن تزينوا تصميم الدعوة ببصمات لصوابعكم داخلة في بعض على شكل قلب.

وممكن برضه تستغلوا التصميم بإنه يكون في الخلفية بحر وسما، وكإنها لوحة لشاطئ هادي.

وبلون اسود وخط بسيط يتكتب عليها إعلان خطوبتكم أو فرحكم والمكان والساعة وأي معلومات حابين توصلوها للناس اللي بتعزموهم.

والدعوة دي هتكون فكرتها مناسبة جداً كمان لو عاملين فرحكم أو خطوبتكم في مدينة ساحلية على البحر أو حتى لو في مركب في النيل.

ساعتها هتكون تصميمات دعوات الفرح معبرة عن أجواءه ومكانه.

استخدموا صوركم الشخصية على دعواتكم:

وممكن تبقى خلفية التصميم صورة رومانسية ليكم مع بعض، وعلى الجنب منها تكتبوا صيغة الدعوة اللي بتوجهوها لضيوفكم.

وممكن تبقى صورة ليكم وانتم بتلبسوا الدبل، ومن الجمل المميزة اللي يكون دمها خفيف وتقدروا تستخدموها على دعواتكم زي:

“من النهاردة وللأبد” أو “لقد فعلناها”.

وكمان تقدروا تستخدموا أكتر من صورة ليكم بأحجام صغيرة تعبر عن مواقف مختلفة ليكم مع بعض أو مراحل مختلفة لقصة حبكم.

أو ممكن تستغلوا تصميمات دعوات الفرح وش وظهر ومتركزوش ع جهة واحدة بس من الدعوة.

فتكون صورتكم اللي هتختاروها أو صوركم لو هتختاروا كذة صورة على وش الدعوة، وفي ضهرها تفاصيل الدعوة من وقت ومكان وأي كلمة حابين توجهوها لضيوفكم.

تصميمات دعوات الفرح بالأبيض والأسود:

أما لو كنتم من محبي الأجواء الكلاسيكية القديمة؛ فممكن تختاروا تصميم دعوة فرحكم أو خطوبتكم بصورة ليكم بفلتر الأبيض والأسود.

وممكن كمان تتصوروا الصورة دي مخصوص لتصميم الدعوة، وتختاروا وضعية تصوير شبه مشهد مميز في فيلم قديم بتحبوه.

والتصميم المناسب في الفكرة دي هي إن أرضية الدعوة حوالين الصورة يكون فيها نجوم متوزعة على الأرضية لإن ده شبيه بأجواء التصميمات القديمة عموماً.

وفي نهاية المقال نتمنى اننا نكون فدناكم وقدرنا نقلل حيرتكم في اختيار تصميمات دعوات الفرح المناسبة ليكم وبتعبر عن شخصيتكم وعن قصة حبكم.

ونتمنى لكم يوم مليان بالفرح والسعادة ويكون يوم مميز ليكم ولضيوفكم، وبداية حياة زوجية سعيدة أبدية.