أفكار تصميم ألبوم الفرح وتنظيمه بشكل مختلف

من أهم الأمور اللي بيركز فيها العروسين هي تصميم ألبوم الفرح ودا طبيعي جدًا لإنه الغلاف اللي هيحفظ ذكرياتهم طول العمر. وزي ما كل حاجة تخص الأفراح بقى فيها أفكار جديدة ومميزة، تصميم ألبوم الفرح كمان بقى ليه أفكار مختلفة تخليه مميز زي يوم الفرح وأكثر. عشان كدا هنشارك معاكم بعض الأفكار اللي تقدروا تطبقوها وتحتفظوا بألبوم مختلف جدًا.

تصميم ألبوم الفرح بلمسة حديثة

مهما اختلفت طريقة الاحتفاظ بالصور إلا إن الألبومات التقليدية لسه ليها سحرها الخاص. خاصة لو أضفنا ليها لمسات جديدة تخليها مختلفة، على سبيل المثال ممكن نضيف ليها:

• غلاف مميز: هنفكر بعيد عن التكرار، يعني مش لازم يكون الغلاف صورة للعروسين، ممكن تبقى صورة لذكرى مميزة في فترة الخطوبة.
• تقسيم الصفحات: تقدروا تقسموا صفحات الألبوم على مدار يوم الفرح، جزء لتحضيرات العروسين أو كل تحضيرات لوحدها. وجزء تاني لتحضيرات السيشن أو صور السيشن فقط. وجزء أخير لصور الفرح والعروسين بين الأصدقاء والعائلة.
• إضافة اقتباس: على الصفحة الأخيرة في الألبوم نكتب بخط اليد جملة مميزة أو اقتباس يناسب الزواج.

تصميم ألبوم الفرح المتطور (ديجيتال)

زي كل حاجة في حياتنا أصبحت للتكنولوجيا دور في تجميلها، ونفس الأمر مع تصميم ألبوم الفرح الديجيتال. يعني تقدروا تصمموا ألبوم ديجيتال مميز يبقى فيه أفكار مختلفة للاحتفاظ بذكرى الفرح، ومن أهم الأفكار على سبيل المثال:

• إضافة موسيقى مناسبة وأغاني رومانسية تعبر عن مشاعركم.
• تغيير الحركات الإنتقالية داخل الألبوم وتغيير نمط عرض صور السيشن وصور الفرح.
• تجميع كل الصور في فيديو وطريقة عرضه تشبه عرض الفيديو العادي.

وبكدا يبقى سهل تتفرجوا على كل صور الفرح مع الأصدقاء والعائلة باستخدام الموبايل أو أي شاشة لعرض الصور.

تصميم ألبوم الفرح على شكل قصة

كلنا شوفنا قصص مصورة للأميرات واللي فيها صور الأمير والأميرة وفي الصفحة المقابلة لهم كلام يحكي قصتهم.

في الألبوم دا انتم الأميرين والقصة قصتكم، هتضيفوا كل صورة معاها كلام يحكي القصة من أولها لحد الفرح:

• هنقسم الصفحات لكل مرحلة بداية من الخطوبة، والتحضير للفرح، وأخيرًا صور الفرح أو السيشن.
• هنغير في أحجام الصور ما بين صغيرة وكبيرة ونوزعها بشكل متناسق.
• ممكن تتبعوا تصميم مستوحى من أي شخصية أو قصة حبيتوها وتنفذوا زيها.

خامات مختلفة لألبوم الفرح

سواء هتنفذوا الألبوم التقليدي أو المستوحى من قصة يبقى مهم جدًا تركزوا في خامة الألبوم، عشان تكون مناسبة وتعيش وقت طويل.

تصميم ألبوم خشبي

وهو التصميم المعتاد ولكن نقدر نميزه بالأفكار اللي قولناها في تصميم الألبومات التقليدية.

تصميم ألبوم ريزين

ودا بيكون الغلاف من خامة الريزين ولكن في غلاف خشبي أو ورق مقوى، شكلها طبعًا مميز ومختلف جدًا.

تصميم ألبوم ثلاثي الأبعاد

خامات شبه بلاستيكية ولكنها بتعمل انعكاسات تخلي الصور كأنها ثلاثية الأبعاد، مش ضروري كل الصور تكون بنفس النمط، ولكن ممكن نضيف جزء منها وخاصة الصور المميزة.

أفكار جديدة لإضافتها في الألبوم

خلاص حددتوا نوع الألبوم، لكن محتاجين تضيفوا شوية تفاصيل زيادة، ممكن تختاروا أفكار من بين المقترحات:

• إضافة صور عفوية ومش مترتبة زي الضحك بين الصحاب أو نظرات حب بين العروسين.
• إضافة صور بالأبيض والإسود وتكون شكلها كلاسيكي أو هادئ جدًا.
• التقاط صور بالطائرة الدرون بزاوية شاملة للفرح، هتضيف عمق ومظهر فخم جدًا للألبوم.

وطبعًا مش مهم حجم تصميم ألبوم الفرح الأهم إنكم توصلوا في النهاية للشكل اللي نفسكم فيه وتقدروا تحتفظوا بكل ذكريات اليوم دا.

اقرأ أيضًا: ديكورات تصوير لدبلة الفرح تقدروا تنفذوها بنفسكم بدون فوتوجرافر.

اقرأ أيضًا: وضعيات صور عرايس محجبات من غير لوكيشن تصوير.