تجهيز شقة مينيماليزم جهد أقل أناقة أكثر

تجهيزات شقتكم الجديدة مبتخلصش؟ كل ما بتفكروا تختاروا ستايل تجهيزات بتغيروا رأيكم تاني عشان الاحتياجات زيادة؟ ايه رأيكم في تجهيز الشقة بأسلوب جديدة أقل في الجهد والتكلفة، ودا من خلال تجهيز شقة بمفهوم المينيماليزم؟

ودا مفهوم بسيط جدًا رغم صعوبة الكلمة، من خلاله بتركزوا على أساسيات التجهيزات بدون أي كراكيب أو إضافات تقدروا تستغنوا عنها.

مفهوم تجهيز شقة مينيماليزم

الفكرة ببساطة إنكم مش هتركزوا في اللي حواليكم بيجهزوا شقتهم إزاي، هتركزوا بس إحتياجاتكم إيه. وإزاي حياتكم تكون أسهل وتجهيزاتكم تكون راقية وأنيقة ومناسبة زوقكم.

فكل حاجة مش ضرورية أو ملهاش لازمة هتستغنوا عنها. وحاجات تانية ضرورية لكن بتحتاج مساحة كبيرة أو تكلفتها مش منطقية هتستبدلوها بحاجات تانية مناسبة بتكلفة مناسبة.

ودا لإن الفكرة الأساسية في تجهيز شقة مينيمالزيم هو التركيز على الأصغر حجمًا وعددًا وأكثر إفادة واستخدامًا. وبناءً عليه هنلغي تمامًا فكرة “عشان دا بيتجاب” و” لازم نجيبه هنحتاجه بعدين”.

تجهيز شقة مينيماليزم “تجهيز في الخفيف”

هنوضح الفكرة أكثر من خلال توضيح كل عنصر في تجهيز شقة مينيمالزيم من خلال تحديد الجهاز الأساسي واستبداله بجهاز أخف.

تجهيز الأثاث للشقة

هتركزوا على احتياجات الشقة من قطع الأثاث بما يتناسب مع مساحتها أو عدد الغرف. وطبعًا بما يتناسب مع احتياجاتكم على سبيل المثال:

• استبدال النيش الكبير ببوفيه بسيط عملي للتخزين بدل من تجمع التراب في كل النيش وصعوبة تنظيفه، وطبعًا حجمه الكبير.
• طقم الأنتريه أو الصالون هيتم استبداله بقطع أثاث محددة تناسب مساحتكم واستخدامكم. يعني لو أسرتكم كبيرة وضيوفكم كتير ممكن تلجئوا لقطع أثاث قابلة للطيّ أو الأثاث متعدد الاستخدام. أما لو استقبالكم للناس بسيط يبقى هتشتروا كنب مريح يناسب استخدامكم.
• غرفة النوم هتكون بمقاسات معينة تناسب الغرفة، وطبعًا لا داعي لدولاب كبير، يكفي تقسيم دريسنج أو تصميم دولاب يناسب فردين.

احتياجات الأجهزة الكهربائية

لا خلاف على وجود احتياجات أساسية في الأجهزة الكهربائية زي الثلاجة، البوتاجاز، الغسالة، الخلاط. لكن أكيد في أجهزة كثيرة مش ضرورية، أو قد تناسب فرد ولا تناسب أخر، وهنا هتحتاجوا تركزوا هل انتم فعلًا محتاجين الأجهزة دي ولا لأ، على سبيل المثال:

• ماكينة القهوة التركي، أو ماكينة الاسبريسو، أو الأمريكان ماشين.
• عصارة الفواكه، خلاط العصائر، العجان.
• الميكروويف، الفرن الكهربي، الاير فراير، محمصة الخبز.

ولو محتاجين تعرفوا هل إنتم محتاجين الجهاز دا ولا لأ اسألوا نفسكم، هل هتستخدموه بشكل يومي أو على الأقل مرة أسبوعيًا. لو الإجابة لأ أو مش عارفين يبقى بلاش تشتروه لإنه غالبًا هيتركن أو على الأقل هيكون زيادة وكركبة على الفاضي.

تجهيز المطبخ بمفهوم المينيمالزيم

وهنا أكبر عقبة بتقابل العرايس على وجه الخصوص عند التجهيز، يعني لو ركزنا في تجهيزات العروسة في المطبخ هنلاقي إن نصف التجهيزات مش ضرورية وإنها ضمن “حاجات لازم العروسة تجبها”. عشان كدا مش هنقول العروسة متجبش إيه ولا إيه لإن الموضوع كبير جدًا، لكن هنقول إيه الأساسي في تجهيزات العروسة للمطبخ:

• طاقم حلل متعدد الاحجام، إضافة إلى عدد 5 حلل تقريبًا مقاسات تناسب الاستخدام اليومي.
• أدوات تحمير وفرن من طواجن وصواني وبرام وقلايات أو قلاية هوائية.
• أدوات سفرة من معالق وفوط.
• طاقم تقديم طعام من خامات مناسبة “ميلامين، أو أركوبال”.
• طاقم زجاج للشاي، وطاقم للقهوة زجاج أو بروسلين، ومجات للمشروبات الدافية.
• أكواب زجاج للمشروبات الباردة، و2 طاقم كاسات للتقديم.
• رفايع مطبخ ضرورية، تقدروا تعرفوا تفاصيل أكثر عنها من هنا.

مفروشات تجهيز شقة مينيماليزم

 أخر جزء هنتكلم فيه هو مفروشات الشقة، من مفروشات لغرفة النوم، وكمان السجاد والستاير. وبما إن المفهوم بيركز على البساطة فاختيار الخامات يكون بنفس البساطة، وتقدروا تجهزوا الشقة ببساطة:

• 5 أطقم ملايات لغرفة النوم مع 6 فوط أو 8 على الأكثر ومتخافوش هيكفوا معاكم سنين.
• بطانية مفردة، وبطانية مزدوجة، أو الاستغناء عنها واستبدالها بلحاف فايبر خامة جيدة.
• ملاية حرير أو مفرش حرير للمناسبات.
• ستائر بلاك أوت لغرفة النوم.
• ستائر مناسبة لغرفة المعيشة أو الصالون.
• سجاد بأحجام صغيرة لإنه هيزيد المكان بساطة وشياكة.

وعشان تطبقوا فعلًا مفهوم البساطة وتنفذوا تجهيز شقة مينيماليزم بالفعل حاولوا تركزوا على احتياجاتكم اليومية، والجودة قبل الكمية. وتعتمدوا قدر الإمكان على التخزين الذكي والأدوات متعددة الاستخدام.

اقرأ أيضًا:

تصاميم مطابخ مفتوحة على الصالة .

استخدام الرخام في الديكور وتحويل البيت لتحفة فنية.