كيفية تجنب التوتر في يوم الفرح ؟

مشكلة تجنب التوتر في يوم الفرح. واحدة من المشاكل الصعبة. وكتير مننا بيلاقي نفسه مش عارف يتعامل معها. ونتيجة ده ممكن يكون يوم الفرح واحد من أصعب أيام حياته. بدل ما يكون أسعد يوم فيها. وغير تأثير المشكلة على العريس والعروسة. الموضوع كمان بيوصل انطباع مش كويس للمعازيم؛ ودا لأنهم ممكن يشوفوا أن العريس أو العروسة مش مبسوطين، أنهم أخيراً أتجوزوا. رغم أن ده مش حقيقي. وعشان كدا قررنا أننا نشارك معاكم حلول كويسة جداً تساعدكم، وهنعرف في فقرات المقال ده، كيفية تجنب التوتر في يوم الفرح.

أفضل نصايح تجنب التوتر في يوم الفرح

عشان نتمكن من تجنب التوتر في يوم الفرح. لازم نكون عارفين شوية نصايح. ونكون فاهمين بعض النقط. ودا لأن أسباب التوتر عند أغلبنا ثابتة ومتكررة، ولو استوعبنا النصايح الجاية بكدا ننجح، ونكون هاديين ومتطمنين يوم الفرح، ودي أهم نصايح تجنب التوتر يوم الفرح:

التوتر قبل الزواج

1-خليك عارف أنك مش مضطر تكون مثالي

كتير مننا بيوم الفرح بيخاف أنه يغلط. وأنه ميظهرش بصورة مثالية. وخصوصاً أن عيون الحضور كلهم بتكون عليه، وأي غلطة في ألف عين هتشوفها، ودا بيخلق قلق وارتباك كبير، وعشان كدا أول نصيحة تخليك متمكن من تجنب الارتباك يوم الفرح، هي أنك تقبل نفسك، وتحب التلقائية بتاعتك، وتتأكد أنك مش مضطر تكون مثالي، وإن اليوم ده أهم يوم في حياتك، ولازم تستمتع بكل تفصيلة فيه.

2-حاول تظبط كل احتياجات اليوم قبلها

تاني نصيحة عشان نهرب من التوتر يوم الفرح، هي أننا نتأكد من تظبيط كل حاجة قبل الفرح، ودي أهم الحاجات:

• رتب مواعيد اليوم ( مواعيد الوصول للكوافير، ومواعيد التصوير، وكمان معاد الزفة ومعاد الوصول للقاعة).
• اتأكد أن عربية الزفة من مكان موثوق فيه؛ عشان متبقاش مضغوط، أو تقع في مشكلة تأخرك وتسبب ارتباك ليك.
• اتأكد أن تجهيزات الشقة خلصت قبل يوم الفرح؛ عشان متبقاش متوتر بسببها يوم الفرح.
• راجع خطة القاعة لفرحك، ونظم معاهم مواعيد الوصول والفقرات؛ عشان متحسش أنك مسؤول عن تنظيم الفرح، مش عريس وده يوم فرحك.

تجهيزات العروسين

3- تجنب التوتر يوم الفرح بالراحة

تالت أهم نصيحة، عشان تنجح في الهروب من التوتر يوم الفرح، هي أنك تحاول ترتاح قبل اليوم ده كويس؛ لأن أغلبنا من الفرحة ممكن يسهر مع صحابه، وأهله لدرجة أنه يروح فرحه مطبق، وفي مننا بيأخر تجهيزاته للفرح لآخر لحظة، ومش بيقدر ينام من قلة الوقت، ونتيجة ده أنك هتكون مرهق جداً، وكمان مش قادر تركز، دا غير أن قلة النوم والراحة ممكن تخليك عصبي، وهنا هتكون عرضة لأنك تنفعل بسهولة؛ عشان كدا لازم نرتاح، وننام كويس قبل يوم الفرح.

4- تجنب التوتر يوم الفرح بمساعدة شريكك

أنك تستعين بشريكة حياتك يوم الفرح دا حل كويس. وهيساعدك أوي في تخفيف التوتر؛ عشان كدا لازم متتكسفش، وحاول فأي وقت تحس أنك مرتبك تتكلم معاها، ولو حسيت أن الكل مركز معاك. ممكن تركز معاها، وبكدا تتلاشى القلق بسبب نظراتهم، حاول أنك تركز معاها هي بس، وكأن مفيش غيركم في المكان، ده حل بيساعد وبينجح دايما.

5-اتقبل فكرة أن المشاكل ممكن تحصل عادي

الخوف من مشاكل الفرح طبيعي. لكن مش طبيعي أنه يأثر علينا، ويخلينا مش قادرين نستمتع باليوم؛ عشان كدا لازم نتقبل الفكرة، ومنشغلش بالنا طول اليوم بكل تفصيلة، أو بكل تفاعل. أو موقف بيحصل في الفرح، ونفضل نفكر في نتيجة ده، ونخاف أن الفرح ينتهي بصورة مش كويسة. حاول أنك تستمتع باليوم، وتكون مبسوط وجنب عروستك، وخليك متأكد أن أهلك وأصحابك معاك، ومش ممكن يسمحوا لحد أنه يفسد فرحتك، أو يخلي ليلة العمر بتاعتك تنتهي نهاية مش سعيدة. عشان كدا متفكرش في المشاكل، وحاول تخلي مخك يفصل، وتركز أنك تكون فرحان، وتحاول تعيش كل تفاصيل اليوم؛ لأنها ليلة في العمر هنفتكرها دايما، فخلي كل لحظة فيها سعيدة.

6-بلاش تاكل أكل تقيل أو متعب يوم الفرح

الأكل ليه تأثير كبير جداً على حالتنا المزاجية، وكمان بيأثر على تركيزنا وراحتنا. وعشان كدا ركز يوم الفرح أنك تاكل وجبة صحية. تخليك نشيط طول اليوم. ومتسببش ليك أي ضرر، وبلاش تاكل من مصدر مجهول؛ لأن دا مش يوم مناسب للتعب، فحافظ على نفسك، وياريت متكنش كمية الأكل كبيرة؛ عشان مع الحركة الكتير ممكن تتعب، فحاول أنك تاكل وجبة مغذية، وفي نفس الوقت تاكل كمية مناسبة.