التخطيط لفرح ممطر… ايه الحاجات اللي لازم تحطوها في اعتباركم؟

خلاص احنا داخلين على الشتاء، وفي السنين الأخيرة كان دايماً الجو متقلب واحتمالية سقوط أمطار كتير بتيجي بدون توقعات من قبلها، وده معناه إنكم ممكن تضطروا لخيار التخطيط لفرح ممطر.

لو ناوين تتجوزوا في الشتا ده، وحابين الفرح يكون أوبن اير؛ فاحتمالية تعرضكم لموقف زي ده عالية.

وحتى لو الفرح مش أوبن اير بشكل كامل، ولكن بطبيعة الحال فيه خطوات كتير من الفرح بتتم في الهواء الطلق.

ودي زي الانتقال من مكان للتاني، والتصوير في مناطق مفتوحة.

ومش هتقدروا تعرفوا بالتأكيد إذا كانت الدنيا هتمطر في اليوم ده إلا في اليوم نفسه.

وعشان متكونوش متوترين طول الوقت من التفكير في الموضوع وشايلين همه.

احنا في المقال ده هنحاول نقدم لكم اهم النقط اللي لازم تحطوها في اعتباركم.

فتابعوا معانا المقال.

اختيار مكان الفرح:

لو خايفين من احتمالية سقوط أمطار يوم فرحكم؛ فأول حاجة لازم تحطوها في اعتباركم هي اختيار مكان الفرح نفسه.

في الحالة دي هتكون قاعات الأفراح الداخلية هي أنسب الأماكن للفرح.

لإنها هتسمح لكم تنفذوا الفرح زي ما انتم عايزين بغض النظر عن الجو برة عامل إزاي.

ومن خلال اختياركم لمكان مناسب بكدة هتقللوا من الضغط المحتمل عليكم في التخطيط لفرح ممطر.

وهتسمحوا لضيوفكم إنهم يشاركوكم فرحتكم من غير ما يقلقوا من حاجة.

لكن برضه حتى في المكان المناسب لكل الأحوال الجوية زي ده، من المهم انكم تكونوا مستعدين لتغيرات الطقس في تحركاتكم.

فهيكون من المناسب إنكم توفروا وسيلة نقل مخصصة للضيوف اللي معندهمش عربيات خاصة بيهم عشان يقدروا يتنقلوا بسهولة معاكم.

وكمان هتكون لفتة جميلة منكم إنكم توفروا شمسيات في المكان.

وده عشان لو الدنيا مطرت وهم مروحين يقدروا ياخدوا شمسية معاهم لحد ما يوصلوا للمكان اللي هيركبوا منه.

وكمان هتبقى هدية ذكرى جميلة يحتفظوا بيها من فرحكم.

خطط بديلة في التخطيط لفرح ممطر:

لو حفل جوازكم اللي بتحلموا بيه طول عمركم هو إنكم تعملوا الفرح في مكان مفتوح أو حديقة معينة.

ومش قادرين تتخلوا عن تحقيقه عشان مطر ممكن مينزلش أصلاً في الآخر.

ففي الحالة دي على الأقل لازم تحضروا خطة بديلة.

وده بحيث لو المطر فاجئكم في أي لحظة تقدروا تنقلوا لمكان مقفول والفرح ميبوظش كله.

فاسألوا منظمين المكان واختاروا معاهم مكان داخلي مقفول بديل عشان تتجنبوا حصول أي مفاجأت غير سارة في التخطيط لفرح ممطر.

وكمان ممكن تتناقشوا معاهم في إنكم تفرشوا أرضية المكان بحصاير متزحلقش.

وده عشان لو المكان عبارة عن حديقة؛ فده معناه ان لو الدنيا مطرت هيتحول لطين والناس رجليها هتغرز فيه، أما لو المكان مبلط سيراميك مثلاً.

فبرضه هيبقى فيه احتمالية ان الناس تتزحلق مع المية وهم بيجروا يستخبوا من المطرة، وتحصل حوادث منحبش أكيد انها تحصل.

وده بينطبق كمان على خطط التصوير، لو خططكم كلها صور أوبن اير هيكون من المفيد إنكم تحطوا لها خطط بديلة لو المطر فاجئكم.

فتقدروا تتصوروا في أماكن مقفولة تانية.

استغلال المطر في ديكور الفرح:

تقدروا تحولوا فكرة وجود مطر في الجو لديكور جميل لفرحكم يديه روح جديدة خاصة بيه لوحده.

وده زي إنكم مثلاً بدل ما تزينوا مدخل القاعة بالورد؛ فممكن تزينوه بشمسيات ملونة.

وتستخدموا شمسية مفتوحة في لوحة الترحيب اللي بتستقبل الضيوف عند ترابيزة الويدينج بوك يكون مكتوب عليها رسالة شكر وترحيب بضيوفكم.

استعدادات إضافية في التخطيط لفرح ممطر:

طبعاً لو المطر فاجئكم بسرعة وكان غزير؛ فأكيد ناس كتير من الضيوف ممكن تتبل.

في الحالة دي هيكون من المناسب انكم تكونوا موفرين مناشف وفوط يقدروا ينشفوا نفسهم بيها بسرعة.

ولو في احتمالية معلنة فعلاً من الأرصاد الجوية إن الجو ممكن يمطر في اليوم ده.

فهيكون من الأفضل إنكم تتأكدوا إن ضيوفكم عارفين المعلومة دي.

من نقط التخطيط لفرح ممطر إنكم تضيفوا في الدعوة اللي بتبعتوها لضيوفكم معلومة احتمالية إن يكون فيه مطر في اليوم ده عشان يعملوا حسابهم.

وفي نهاية المقال نتمنى إننا نكون قدمنا لكم أفكار مفيدة ليكم فعلاً تقدروا تستخدموها في التخطيط لفرح ممطر.

وده لو هتعملوا فرحكم في الشتا وهيكون في احتمالية لسقوط أمطار.

ونتمنى لكم فرح سعيد وبداية حياة زوجية سعيدة مليانة حب وفرح طول العمر، وألف مبروك مقدماً.