اعمل فرح ولا لأ؟ أيهما افضل؟
عروسة وعريس عرض عليك متعملوش فرح وانتي خايفة تفوتك ليلة العمر؟ أو خايفة تندمي بعدين انك كنسلتي الفرح؟ طيب اعمل فرح ولا لأ؟ اعمل فرح ولا اسافر؟ طيب نكتفي بكتب الكتاب وخلاص؟ كل دي أسئلة تهمك وهنجاوبك عليها.
هل الفرح ضروري؟
كل بنت بتحلم بيوم الفرح والفستان الأبيض والطرحة البيضا ولمة أخواتها واصحابها. لكن عمرك فكرتي هل الفرح ضروري؟ ولا ممكن نستغنى عنه مقابل حاجة افضل؟ أو حتى نكتفي بحفلة صغيرة توفيرًا للفلوس؟ اعمل فرح ولا لأ؟
تعالي نبص للموضوع من ناحية أحلام البنات. طبيعي الفرح يكون مهم لأنه حلم العمر، لكن لو بصيتي بعقلية أوسع هتلاقي إن الفرح الكبير ده مفيش حاجة بتتعمل فيه علشانك غير الفستان والطرحة والصور الحلوة ال في ألبوم الصور ال بيتركن في الدولاب.
غير كده كل حاجة بتتعمل في الفرح علشان المعازيم والضيوف من الجانبين: مثلًا البوفيه علشان شكلنا ميبقاش وحش، والأغاني والرقص علشان الناس تفرح وينزلوا فيديوهاتنا على السوشيال ميديا حتى من غير رأينا.
وحتى الكوشة والتجهيزات وقايمة الاغاني والفقرات البهلوانية في الفرح علشان بنت خالتك تقارن فرحها بفرحك.
علشان كده خلينا نكون وسطيين ونقول إن الفرح المبهرج أو الأوفر مش ضروري، ولو فيه فرصة نبدلها بحاجة بسيطة يبقى أفضل. على الأقل هتحمي نفسك من عين الناس.
اعمل فرح ولا اسافر
لو في حيرة اعمل فرح ولا لأ، أو عريسك بيعرض عليكي متعمليش فرح وتسافري. وفي الناحية التانية أصحابك مش نازلين زن عليكي علشان يلبسوا فساتين ويتصوروا كان صورة.
سيبك منهم وتعالي نفكر بعقل وخطوات مدروسة. طبعًا الحياة بعد الجواز غير قبلها خالص، مش معنى كده انها وحشة!! لأ هي بس مش هيكون قدامك فرص كتيرة انك تسافري وتشوفي الدنيا زي ما كنتي بتحلمي.
علشان كده وبناء على الكلام ال قولناه فوق، ليه اعمل فرح وتكلفة علشان أبسط ناس غيري، لما ممكن أوفر مبالغ الفرح الخرافية لسفرية العمر مع جوزي في أول حياتنا.
فلو قدامك فرصة أو أتعرض عليكي اعمل فرح ولا اسافر؟ طبعًا تسافري وتختاري مكان مميز نفسك تروحي فيه وفيه خيارات كتير لشهر العسل في مصر بأقل الأسعار أو خارج مصر.
اعمل فرح ولا لأ كتب كتاب
الزواج هو بداية حياة جديدة بين طرفين بينهم حب واحترام وتقدير. ولأن الظروف الاقتصادية مش احسن حاجة على الجميع، ولازم نراعي بعض.
يعني كل واحد يجيب ال يقدر عليه، ومفيش تعقيدات لأننا بنبني حياة جديدة طول العمر ان شاء الله. وبالنسبة للفرح لو العريس حب يقلل التكاليف شوية، ممكن نكتفي بكتب الكتاب ويكون فيه فستان برضه وفرحة وهيصة وهليلة.
مش لازم حفلة لقراءة الفاتحة، وحفلة للخطوبة وحفلة لكتب الكتاب وحفلة الفرح طبعًا. تكاليف على أهل العروسة وأهل العريس وده شيء صعب في بداية الحياة خصوصًا لو الشاب دخله متوسط.
لكن في حالة كانت الزوجين متفقين والظروف تسمح بالفرح وكتب الكتاب، فمفيش مشكلة. إحنا بنتكلم في حالة حصل اقتراح من احد الطرفين.
ممكن نكتفي بحفل كتب كتاب واختيار فستان كتب كتاب رقيق وقايمة اغاني مفضلة ونجمع أهلنا واصحابنا يفرحوا ويلبسوا فساتينهم ونروح على عش الحب.
كل ما العلاقة بين الطرفين كانت سهلة ولطيفة وفيها تقدير من الطرفين واحترام، كل مالحياة كملت وبقت أسهل وقدرنا نربي جيل جديد سوي مفيش عنده مشاكل ولا تعقيدات نفسية.
في النهاية، اعمل فرح ولا لأ! ده قرار يرجع للعوامل المحيطة بالعروس وتفكير كل منهم وتقبل الأوضاع الحالية. لكن النصيحة الوحيدة ان الفرح عمرها ما كانت بكتر الحاجات لكن كانت في الرضا والاختيار الصح.
هل محتوى المقال دة كان مفيد بالنسبة لك؟
نعم، مفيد!لا!
