استعدادات العريس يوم الفرح… أربع حاجات لازم تعملها

أكيد أهم حاجة لازم تعملها في اليوم ده هي إنك تتجوز، بس قبل ما نوصل للمرحلة دي، وخلال اليوم قبل ما تروح تاخد عروستك لمكان فرحكم لازم تعرف ايه هي استعدادات العريس يوم الفرح اللي هتخليك قادر تعدي ضغط اليوم ده بهدوء وروقان بال.

طبعاً طول النهار ومن بدري عروستك الحبيبة هتكون مشغولة في تجهيز فستانها وترتيبات المكياج والذي منه.

وكل ده بيديك وقت كافي تقدر تقضيه مع نفسك وتستعد لمهامك اللي هتتولاها انت بنفسك بعد كدة.

وده عشان متحسش فجأة إن اليوم طار من ايدك وكان كله خبط ورزع.

كإنك كنت في معركة وزوبعة مقدرتش تفهم منها حاجة ولا تستوعبها!

وعشان كدة احنا هنا في المقال ده هنحاول نرتب معاك اليوم، ونوضح لك شوية حاجات تاخد بالك منها خلال الوقت ده.

وتحاول تحطها في خطتك من ضمن استعدادات العريس يوم الفرح؛ فتابع معانا.

جولة مشي في استعدادات العريس يوم الفرح:

ابتدي يومك بجولة مشي صغيرة حوالين مكان سنك أو الفندق اللي نازل فيه، ممكن تبقى شايف ان ده مضيعة وقت!

بس صدقني دي حاجة مهمة جداً من استعدادات العريس يوم الفرح.

المشي بيحفز الطاقة الذهنية للعقل وهيصفي ذهنك ويخليك تعرف تركز كويس.

وانت هتحتاج التركيز ده أوي في كل اللي جاي وتعاملك مع ترتيبات الفرح نفسه واستقبال المعازيم وكل تفصيلة جاية.

من أهم استعدادات العريس يوم الفرح إنه ياكل كويس:

انت داخل على شغل كتير بعد كدة، من أول ما هتبتدي انت تلبس وبعدين تروح تاخد عروستك من الكوافير.

ولسة هتروحوا الفوتوسيشن، وكتب الكتاب، وزفة القاعة واستقبال ومباركة المعازيم والرقص معاهم ورقصة السلو، وليلة كبيرة.

فلازم تكون مستعد لكل ده، وعشان تقدر تستحمل التعب والإرهاق ده كله لازم تكون واكل كويس.

ولو سألت أي عريس قبلك هيقولك إن اللي فاده في اليوم ده أو اللي كان ناقصه إنه يكون واكل كويس.

وميكونش حاسس بالجوع طول الوقت؛ فعشان كدة لازم تحط على أولويات استعدادات العريس يوم الفرح إنك تفطر كويس قبل ما تبدأ يومك.

اكتب جواب رومانسي لعروستك:

هتبقى حاجة جميلة جداً ورومانسية إن أول ما تبقوا لوحدكم وبتستعدوا لبداية حياتكم الجديدة تديها جواب رومانسي.

وتكون بتعبر لها فيها عن مدى حبك ليها وايه أكتر الحاجات اللي بتحبها فيها.

وكمان تصوراتك عن حياتكم المستقبلية مع بعض وإزاي تخلوها أحلى طول الوقت.

كمان ممكن تستغل الوقت ده في إنك تكتب ملاحظات لنفسك عن مشاعرك وأفكارك وتصوراتك للحياة الزوجية اللي انت داخل عليها في الوقت ده، وتحتفظ بيها عشان تفتحها كل سنة في عيد جوازكم مثلاً.

وتشوف هل تصوراتك وأفكارك دي كانت متوافقة فعلاً مع حياتكم اللي انتم عايشينها؟

أو ايه اللي انت محتاج تظبطه عشان تحقق أمنياتكم اللي كان نفسك فيها قبل الجواز وتوصل لها؟

اتأكد من كل حاجة في بدلتك ومظهرك:

أكيد أهم حاجة للعريس في يوم فرحه إنه يكون متأكد من كل تفصيلة تخص مظهره.

اتأكد من بدلتك مرة واتنين وتلاتة، اتأكد إنها مكوية كويس.

زرايرها مظبوطة في مكانها ومفيش حاجة منهم ممكن يكون سهل تتقطع.

الكرافات أو البابيون اللي هتلبسه موجود ومظبوط، حلاقتك تمام، جزمتك متلمعة، لو ليها رباط اتأكد انه متين ومش هيتفك بسهولة.

خليك متأكد مليون في المية من كل حاجة تخص مظهرك، في النهاية المظهر ده هو اللي هتاخد بيه صور الفرح اللي هتعيش معاك للأبد طول حياتكم الزوجية وهتتعلق على حيطة بيتكم.

أكيد مش هتحب إن مظهرك يكون فيه أي لخبطة في اليوم ده، أو إنك متكونش على نفس مستوى أناقة وجمال عروستك.

ودي كانت أهم أربع حاجات في استعدادات العريس يوم الفرح اللي هتساعدك كعريس إنك تتجاوز الوقت ده وتكون مستعد ليلتك الكبيرة وانت مرتاح ومطمن.

وفي نهاية المقال نتمنى إننا نكون فدناك فعلاً، ونتمنى لك حياة زوجية سعيدة أبدية كلها حب وهنا وفرح مع عروستك الجميلة.