ازاي نوفر فلوس تجهيز الشقة

تجهيز الشقة خطوة كل عريس وعروسة بيستنوا اليوم اللي يعيشوها. لأن فيها فرحة كبيرة. بس كمان فيها مسئولية وتكاليف كتير بتخلّي الواحد يلف حوالين نفسه. وكل ما بتقرب الليلة الكبيرة العرسان بيتصطدموا بحقيقة إن الأسعار نار، وكل حاجة بقت محتاجة ميزانية لوحدها سواء العفش أو الأجهزة أو الديكورات، وحتى التفاصيل الصغيرة زي المفارش أو الطقم اللي في المطبخ بس الحقيقة إن الشطارة مش في إنك تدفع كتير، لأ الشطارة الحقيقية إنك تجهّز شقة شيك ومريحة من غير ما تهد حيلك ماديًا. عشان كدا هنساعدك في المقال ده أنك تعرف ازاي نوفر فلوس تجهيز الشقة

مستحيل نوفر فلوس تجهيز الشقة!

أننا نوفر فلوس تجهيز الشقة دا مش مستحيل. بس للأسف ناس كتير فاكرين إن كلمة “توفير” معناها “بخل”، لكن في الحقيقة هي فن محتاج وعي وكمان تخطيط واختيارات ذكية. يعني لو عرفت منين تشتري. وإيه اللي يستاهل تصرف عليه. وإزاي توازن بين الشكل والمضمون. هتقدر تجهّز شقتك بذوق عالي وميزانية مناسبة، وبكدا تحتفل بفرحك من غير ديون ولا ضغوط نفسية. والطرق عشان نوفر فلوس تجهيز الشقة كتير. لكن أهمها هو:

١-اعملوا خطة شاملة بكل التفاصيل

قبل ما تنزلوا تشتروا أي حاجة اقعدوا سوا واكتبوا كل اللي محتاجينه. من أول النيش (لو لسه حد بيشتريه) لحد المعالق والسجاد. وقسّموا القايمة لأقسام أجهزة – عفش – مطبخ – ديكورات – حاجات صغيرة. وبكدا هتقدروا تتحكموا في المصاريف، ومش هتشتروا حاجات زيادة. أو تنسوا حاجات مهمة وتضطروا تشتروها في وقت مش مناسب.ونصيحة مهمة لازم تحطوا حد أقصى للميزانية، وسيبوا نسبة 10-15% للطوارئ. أو الاختيارات اللحظية اللي ممكن تظهر في النص.

٢-استغلوا العروض والخصومات بذكاء

في مواسم كتير بيكون فيها خصومات ضخمة على الأجهزة الكهربائية والعفش. زي عروض الصيف أو تخفيضات البلاك فرايداي، أو حتى معارض الأثاث السنوية. فحاولوا تابعوا الصفحات والمواقع المهتمة بالأدوات المنزلية. واعرفوا امتى تنزلوا تشتروا. وبلاش استعجال لأن أوقات فرق السعر بيكون كبير جدًا بين شهر والتاني. وفيه فكرة ممتازة وهي أن لو في حاجة غالية عاجباكم اسألوا نفسكم، “هل ممكن نلاقي بديل ليها أرخص؟ أو نشتريها مستعملة بحالة كويسة؟”. ودا مش بخل خالص إحنا بس بنحاول نوفر ونبعد عن الديون.

الاجهزة الكهربائية للعروسة: دليل شراء الأجهزة الكهربائية

٣-المستعمل مش عيب: استخدمه بذكاء

الناس زمان كانت بتعيب على شراء الحاجة المستعملة. لكن دلوقتي بقى فيه صفحات وجروبات مخصوصة للحاجات المستعملة بحالة ممتازة. فممكن تلاقي ترابيزة شيك، أو غسالة شبه جديدة أو طقم ركنة تحفة بنص سعرها. لكن المهم تتأكدوا من حالتها كويس وتشوفوها قبل ما تدفعوا. وكمان ممكن تاخدوا بعض الحاجات من العيلة. فيه ناس بتحب تحتفظ بحاجات شكلها أنتيك أو ليها ذكرى، بس لو اتجددت بشكل بسيط، ممكن تطلع تحفة في شقتكم.

٣-استغلوا فكرة الهاند ميد وشطارة معارفكم

في حاجات كتير ممكن تعملوها بنفسكم وتوفّروا فيها فلوس. وتكون كمان ممتعة وسبيشيال. فمثلًا ممكن تشتريوا ترابيزة عادية وتعملوا لها ديكور بإيدكم. أو بدل ما تدفعوا في تابلوه بألف جنيه اطبعوا صورة تحبوها وحطوها في برواز بسيط. كمان الستائر والديكورات البسيطة ممكن تتعمل في البيت بخامات من سوق الجمعة أو شارع الرويعي. والفكرة هنا إنكم تخلوا جزء من تجهيز الشقة تجربة مشتركة، وتضيفوا لمستكم الشخصية اللي هتخلي البيت فعلاً بيتكم. ولو عندكم معارف من اصحابكم مميزين اطلبوا مساعدتهم.

مواقع بيع جهاز العروسة أون لاين بأفضل سعر وخامة

٤-بلاش تجروا ورا البرستيج… اشتروا اللي يناسبكم

واحدة من أكتر الغلطات اللي بتزود تكلفة تجهيز الشقة هي التقليد الأعمى. “فلانة جابت شاشة 75 بوصة، وإحنا لازم نجيب زيها”، أو “فلان عمل مطبخ أمريكاني غالي، يبقى لازم نعمل زيه” وهكذا. بس الحقيقة إن كل بيت ليه احتياجاته، وكمان كل شخص ليه ظروفه. عشان كدا اختاروا اللي يناسب استخدامكم مش اللي يبهر الضيوف. وافتكروا أن فرحة التجهيز يوم لكن القسط شهور!. فلو حاجة مش ضرورية دلوقتي سيبوها على جنب، وركّزوا في الأساسيات. وخليكم عارفين أن البيت الحلو مش بالشكل بس، بالراحة والدفا اللي بتحسوه فيه كل يوم.

٥-قارن الأسعار قبل ما تشتري أي حاجة

من أهم خطوات التوفير الذكي إنك متشتريش من أول مكان تشوفه. مهما كانت الحاجة عاجباك. خُد وقتك وقارِن بين أكتر من محل أو موقع أونلاين. لأن في منتجات فرق سعرها بيوصل لمئات الجنيهات، بس علشان اسم المحل مختلف. والمميز كمان إنك دلوقتي تقدر تقارن الأسعار أونلاين بسهولة على مواقع وتطبيقات كتير. وممكن كمان تستفيد من تقييمات الناس اللي اشتروا قبلك. وهتقدر تعرف لو الحاجة تستاهل ولا لأ، وهل فيه مشاكل ظهرت فيها؟ التقييمات بقت كنز في قرارات الشراء.

تجهيزات الشقة

٦-خففوا الكماليات وخليكم عمليين

لما تيجوا تختاروا ديكورات أو أجهزة اسألوا نفسكم: “هل الحاجة دي ضرورية؟”. مثلاً في ناس بتشتري غسالة أطباق ومجفف ملابس وهم أصلًا مش بيستخدموهم، أو بتجيب خلاط وفرن طعام وكبة ومفرمة وبيشغلوا الخلاط بس!. عشان كدا بلاش تخزنوا أجهزة مش هتستخدموها وتدفعوا فيها مبلغ كبير من غير داعي. ونفس الكلام على عدد الطاسات والصواني في المطبخ. أو طقم الصيني اللي بيتحط في النيش ومحدش بيشوفه. خليك عملي واشتري اللي هيخدمك بجد في حياتك اليومية