اختيار مصور الأفراح إزاي تقرره؟

اختيار مصور الأفراح ممكن يبقى أمر محير كتير بالنسبة لك، وغالباً انت كعريس اللي هيكون عليك المهمة دي.

عروستك الحلوة طبعاً هيكون عندها تفاصيل تانية كتير تركز فيها؛ فتقدر انت تتولى عنها مهمة اختيارك للفوتوغرافر اللي هيصور فرحكم.

وسواء كنتم بتخططوا لفرحكم في المكان اللي انتم عايشين فيه أو هتسافروا تعملوا فرحكم في منطقة ساحلية أو سياحية.

سواء فرح على الشط أو في منطقة جبلية أو في مكان أجازتكم المفضل فمهم تختارو فوتوجرافر شاطر.

عشان يقدر يوثق لكم اليوم بصور تحفة، وفيه عوامل كتير ممكن تأثر على اختيارك ليه زي ميزانيتك اللي انت محددها.

ده غير شطارة المصور نفسه، وتأثير شهرته وإمكانية تعامله مع تفاصيل اليوم والمكان اللي هتعمل فيه فرحك.

واعتياده على المكان من عدمه، وعشان كدة احنا هنا في المقال ده جبنا لك كل التفاصيل اللي ممكن تحتاج تعرفها.

عشان تاخد قرار فيها قبل ما تحدد اختيارك؛ فتابع معانا المقال.

اختيار مصور الأفراح المحلي ولا على سفر؟:

سواء كنت هتعمل فرحك في مدينتك أو مدينة تانية ممكن تختار المصور يكون من نفس مدينتك برضه أو من مكان تاني.

خصوصاً لو هو حد مشهور وشاطر أوي في مجاله وانت نفسك هو اللي يصور لك فرحك.

بس أكتر وقت ممكن تحتار فيه في النقطة دي فعلاً لو انت هتعمل فرحك في مدينة غير مدينتك.

فممكن تبقى محتار ساعتها هل تاخد فوتوغرافر معاك من اللي تعرفهم ويسافر معاك لمكان الفرح.

ولا تتفق مع فوتوغرافر من المكان اللي هتعمل فيه الفرح، ولا تختار واحد من أي مكان تاني ما دام كدة كدة هيسافر؟

الحقيقة إن كل خيار من دول ليه مميزاته وعيوبه، فلو اخترت فوتوغرافر من مدينتك هيبقى سهل عليك توصله بسرعة بعد كدة.

وده هيسهل عليك تاخد منه الصور والتواصل معها هيكون أسهل، لكن برضه ده معناه إنك هتضطر تدفع تكاليف سفره وإقامته معاك.

أما لو اخترت فوتوغرافر من المدينة اللي هتعمل فيها فرحك؛ فده هيكون معناه إنك مش هتقدر تقابله شخصياً كتير.

وغالباً كل الاتفاقات بينكم هتكون أون لاين أو على التليفون بس لحد يوم الفرح، ونفس الشيء برضه بعد الفرح، وده هيقلل إلى حد كبير من جودة تواصلكم واتفاقاتكم.

لكن الميزة الأكبر في الموضوع ده إنه هيكون عارف كل تفاصيل المكان ومتعود عليها، وعارف تفاصيل الجو وتقلباته في البلد في أي وقت من السنة.

وكل ده بيخليه عارف يصور امتى وأنسب اللقطات يقدر ياخدها امتى وايه أكتر أماكن التصوير الجذابة في المكان.

حدد أسلوبك:

ومن أول الخطوات اللي لازم تعملها في اختيار مصور الأفراح إنك تحدد الأسلوب اللي انت عايز صور الفرح تطلع بيه.

خصص شوية من وقتك في إنك تتفرج على صور أفراح جديدة على السوشيال ميديا وفكر في الأسلوب اللي تفضله منهم.

من الأساليب المنتشرة في الوقت الحالي في تصوير حفلات الزفاف والخطوبة الأساليب الكلاسيكية أو الصحفية أو الفنية وفيه كمان أساليب تصوير الفاشون واللايف ستايل.

تحديدك لأسلوب التصوير اللي بتفضله هيساعدك إنك تضيق نطاق اختياراتك وتحدد الفوتوغرافر اللي انت عايزه من المصورين المعروفين في التصوير بالأسلوب ده.

وكمان تقدر تشوف صورهم السابقة بنفسك وتحكم عليها من خلال صفحاتهم على السوشيال ميديا أو مواقعهم الشخصية.

اختيار مصور الأفراح من آراء العرسان السابقين:

دلوقتي بقينا قبل ما نشتري أي حاجة بنقرأ الريفيوهات اللي عليها، والفضل في ده يرجع للانترنت وعمو جوجل اللي بيوفر لنا مواقع مختلفة بتتكلم عن كل تفصيلة في حياتنا.

والمصورين في الآخر زيهم زي أي منتج تاني فيه ناس قبلنا استخدمت خدماته وقالت رأيها فيه.

فعشان تعرف تختار أنسب فوتوغرافر ليك ولفرحك تقدر تشوف ريفيوهات العرسان اللي سبقوك قبل كدة قالوا ايه عن المصورين اللي صوروا فرحهم.

وتختار منهم أكتر حد شكروا فيه، والريفيوهات دي عادة هتلاقيها في الصفحات والجروبات المهتمة ومتخصصة بمجالات حفلات الزفاف والخطوبة.

وكمان ممكن تلاقي آراء للناس في التعليقات على صفحات وحسابات المصورين نفسهم أو مواقعهم الشخصية.

أسئلة إجابتها مهمة قبل ما تقرر خيارك النهائي:

بعد ما حصرت اختيار مصور الأفراح اللي عايزه في اتنين أو تلاتة؛ فعشان تقرر القرار النهائي وتختار واحد منهم فيه شوية أسئلة محتاج تعرف إجابتها وبعدين تقرر.

أول سؤال طبعاً محتاج تتأكد منه هو إنه يكون متفرغ في يوم فرحكم وميكونش عنده ارتباطات تانية.

كمان تقدر تسأله من امتى وهو بيصور أفراح؟ وهل سبق ليه التصوير في مكان فرحك بالتحديد؟ وإذا كان ممكن يوريك صور سابقة من شغله.

وبرضه محتاج تتأكد من سياسات التعامل معاه زي أوقات الدفع وطرق الإلغاء لو حصل أي ظرف طارئ، وامتى هتقدر تاخد الصور؟

وتقدر تسأله برضه لو هو محتاج يعرف أي معلومات معينة هتساعده أكتر في مهمته في تصوير الفرح.

وبكدة نكون وصلنا لنهاية المقال، ونتمنى إننا نكون قدمنا لك نصايح تفيدك في اختيار مصور الأفراح اللي يوثق يومكم بأحلى صورة.

ونتمنى لكم بداية حياة زوجية سعيدة مليانة بصور حلوة في كل لحظة فيها تدوم للأبد.