إدارة ميزانية تجهيزات الفرح بكل تفاصيلها

تعتبر فترة تجهيزات الفرح من أكثر المراحل اللي محتاجة تركيز وتخطيط لكل يوم فيها. ولأن أي عريس وعروسة عايزين الفرح يكون مثالي هنحاول نوضح كيفية إدارة ميزانية تجهيزات الفرح بكل تفاصيله عشان نرفع عن العريس الضغط اللي بيعيشه في الفترة دي.

وعلى قدر الإمكان نساعده على تجهيز الفرح بالميزانية اللي حددها بدون ما يتعرض لضغط مالي بعد الفرح.

أهمية إدارة ميزانية تجهيزات الفرح من الخطوبة للزفاف

القصد من إدارة الميزانية مش بس توفير فلوس أو إنهاء تجهيزات الزفاف بأقل مبلغ. لكن الفكرة مساعدتك في تخفيف التوتر اللي ممكن تدخل فيه في الفترة دي. وتفادي أي خلاف ممكن يحصل مع العروسة أو الأهل بخصوص الفرح ومكانه وغيره من التفاصيل اللي ممكن تكون مصدر توتر للطرفين. عشان كدا من أول الخطوبة ابدأ في ترتيبات ميزانيتك لكل المراحل اللي هتمر بيها. سواء إدارة ميزانية تجهيزات الفرح أو ميزانية شراء الأثاث والفرش. أو حتى مصروفات الخطوبة والهدايا ومتطلبات الفترة دي.

تحديد الميزانية لـ إدارة ميزانية تجهيزات الفرح

طبيعي أول حاجة نبدأ فيها هي تحديد الميزانية من الأساس، وعشان تقدر تحددها بما يتناسب مع وضعك المادي وباقي استعدادات الزفاف يبقى ضروري تركز في النقاط دي:

• تحديد صافي الميزانية بعد ما تنتهي من حسابات باقي التجهيزات من تشطيب الشقة والفرش وباقي التفاصيل.
• تحديد بنود صرف الميزانية مع العروسة. هتشوف العروسة محتاجة إيه قبل الفرح، وإيه الجزء اللي إنت مسؤول عنه في التجهيزات دي.
• وضع حد أدنى وحد أعلى لكل بند من البنود عشان تكونوا متفقين من البداية. ومفيش طرف فيكم يطلب طلبات مفاجئة غير محسوبة.

الاتفاق في المرحلة دي بيضمن إنكم تعدو فترة التجهيزات بدون خلافات كثير من العرسان بيقعوا فيها. وبيخلي الأمور واضحة جدًا قدام الأهل من الطرفين ودا يساعد على إن كل طرف يلتزم بالاتفاق.

وضع قائمة المصروفات

بما إن الميزانية اتحددت يبقى باقي إدارة ميزانية تجهيزات الفرح بما يتناسب معها. وطبعًا بما يتناسب مع المتطلبات وهنا ضروري نعمل قائمة محددة جدًا بالمتطلبات.

هنحاول نوضح المتطلبات دي في قوائم منفصلة، كل قائمة تشمل ما يندرج تحتها.

أولًا: مكان الفرح

ودا أكبر بند بيسحب من الميزانية، لأنه بطبيعة الحال تأجير أي مكان للزفاف تكلفته أكثر من أي تكاليف فرعية. ودا لا يشمل فقط قاعة الزفاف بل بنضم ليه تكاليف الفوتوجرافر للقاعة. وتكاليف تأجير لوكيشن تصوير لسيشن الفرح، وتكاليف فتوجرافر الفرح.

وفي بند تاني لازم تخلي بالك منه وتحدده بما يتناسب مع ميزانيتك وهي توزيعات يوم الفرح. ممكن تبقى مجرد توزيعات تذكارية زي توزيعات السبوع. أو مشروبات أو أكل حسب مكان الفرح وميزانيتك.

ثانيًا: فستان الفرح

ودا طبعًا تاني بند بيسحب من الميزانية، وبناءً على الميزانية هتحدد إذا كان الفستان هيكون خاص بيها وتشتريه أو تأجره. ويندرج تحته جزمة الفرح وإكسسوارات الفرح وما يلزم من تفاصيل تانية. زي إضافة تفاصيل تانية في الفستان أو الطرحة، عشان كدا ميزانية الفستان بتكون مرِنة شوية. لإن وارد جدًا تدخل في تفاصيل كتير مش عامل حسابها. وخلي بالك إن أهم حاجة عند العروسة فستان الفرح فحاول تكون موفر جزء مناسب من الميزانية عشان تقدر تختار فستان يناسبها ويناسب ذوقها.

ثالثًا: تكاليف الميكب أرتست

ودي الموضة اللي كل العرسان بيتمنوا يتخلصوا منها. لإنهم لسه معندهمش قناعة إن العروسة محتاجة مبالغ طائلة عشان تبقى مختلفة يوم فرحها. خاصة لو إنت مش بتحب تشوف عروستك بميكب كتير هتكون تكاليف الميكب أرتست غير منطقية بالنسبالك. بل ممكن وإنت في مرحلة إدارة ميزانية تجهيزات الفرح توقع البند دا من غير ما تاخد بالك.

والحل هنا إنك هتسأل العروسة عن تطلعاتها في اليوم دا وعن المكيب أرتست المستهدفة. وطبعًا تعرف تكلفتها وتكلفة أي متطلبات جانبية بتحتاجها في اليوم دا.

البحث عن أفضل العروض والخصومات

بعد ما تنتهي من إدارة ميزانية تجهيزات الفرح وتحديد مبلغ لكل بند من البنود ممكن تركز في نقطة العروض والخصومات. ودي حاجة ممكن توفر في ميزانيتك بطريقة لا تتخيلها.

يعني لو مش فارق معاكم الفرح يكون في الصيف أو الشتاء ممكن تختارو وقت قريب من الشتاء دا بيكون وقت خصومات القاعات.

لو العروسة مش محددة ستايل معين لفستانها أو مكان معين لشراء أو تأجير الفستان ممكن تركزوا مع الأتيليهات الجديدة أو اللي بتفتح فرع جديد. الأماكن دي بتعمل خصومات قوية جدًا لجذب الأنظار ليها ممكن توفر معاكم نصف التكلفة اللي انتوا حددتوها للفستان.

نفس الأمر ينطبق على المكيب أرتست، في الأوقات البعيدة عن موسم الصيف بتنزل خصومات. فتلاقي باكدج العروسة بقى أقل مثلًا 25%.

طوارئ في إدارة ميزانية تجهيزات الفرح

زي ما ممكن توفر من الميزانية اللي حددتها ممكن برضو يحصل أي ظرف طارئ. عشان كدا مهما كانت قايمة التجهيزات كاملة لازم يكون في بند للطوارئ وتحدد له مبلغ خاص.

وارد جدًا تظهر حاجة مش في الحسبان في تجهيزات الفرح أو الفستان أو حتى القاعة. وغيرها من التفاصيل اللي هتتفاجئ بيها وقت الفرح. وعشان أي ظرف طارئ يمر بدون ما يوترك أو يأثر على فرحتك حدد مبلغ جانبي للطوارئ.

وفي الآخر يعني إدارة ميزانية تجهيزات الفرح دي بتساعدك على تجاوز توتر المرحلة دي. لكن برضو مينفعش تكون الميزانية عبء عليك. وهنا لازم تركز إن شريكة حياتك تكون عارفة وضعك المادي ومتفهماه. وفي نفس الوقت تكون صريح معاها وتقدم لها اللي تحتاجه بدون تقصير.

اقرأ أيضًا: قاعات افراح في القاهرة.

اقرأ أيضًا: خطوات التخطيط للفرح خطوة خطوة.