أماكن بيع مستلزمات السباكة دليل شامل

لو عريس وبتجهز شقتك من البداية ومحتاج تعرف أماكن بيع مستلزمات السباكة وغيرها من لوازم تأسيس الشقة هنساعدك بتوضيح كل النقاط اللي ممكن تحتاجها.

على سبيل المثال في القاهرة أماكن بيع مستلزمات السباكة في مناطق متفرقة عشان تخدم احتياجات جميع السكان من مختلف الاتجاهات. معظم الأماكن متخصصة في بيع المستلزمات بالجملة والقطاعي من لوازم سباكة أساسية وكماليات.

أماكن بيع مستلزمات السباكة في القاهرة

لو بنتكلم على أهم أماكن رئيسية لبيع مستلزمات السباكة هنلاقي أكثر من مكان بيجمع عدد كبير من المحلات، وممكن نوزعهم لأماكن رئيسية كالتالي:

شارع باب البحر

في منطقة باب الشعرية من أشهر الأماكن المتخصصة في بيع مستلزمات السباكة سواء جملة أو بالقطعة. الشارع بيجمع عدد كبير من المحلات لذلك الأسعار فيه تنافسية، كمان بتتوفر كل الماركات الشهيرة في منتجات الأدوات الصحية.

منطقة الفجالة

بالقرب من ميدان رمسيس، وتعتبر أشهر مكان للوازم السباكة والسيراميك وكماليات المطبخ. المميز في المنطقة إن معظم الشركات الشهيرة في بيع لوزام السباكة لها فروع داخل المنطقة. لذلك الأسعار فيها مناسبة جدًا، والشركات تقدم بعض الخصومات على شراء الكميات.

منطقة السبتية

من المناطق القريبة من رمسيس والإسعاف، فيها أكثر من 250 محل خاص بأدوات السباكة وكمالياتها. والأهم إن فيها فنيين سباكة ممكن الاستعانة بيهم لإنجاز أعمال السباكة بسعر مناسب. ولإن بعض الفنيين هم أصحاب المحلات فشراء المستلزمات وطلب التركيب مع بعض بيقللوا من السعر.

منطقة الموسكي

في الجزء المطل على شارع بورسعيد محلات كتير مختصة في بيع أدوات وكماليات السباكة. وتعتبر فعليًا من أرخص الأماكن لشراء اللوازم، وأرخص مكان لشراء الكماليات من دش وحنفيات وأحواض.

أفضل ماركات مستلزمات السباكة

بالنسبة للماركات الأفضل في السوق، من حيث الجودة أو الشكل فهنلاقي ماركات كثيرة متوفرة في الأماكن المذكورة. منها على سبيل المثال:

• إيديال ستاندرد: من أفضل الماركات اللي بتركز على الجودة بسعر مناسب، بتختص بشكل كبير في القطع المجزئة، زي مجموعات الصرف، ومجموعات تشغيل غطاء السيفون، وشاسيهات المراحيض.
• ديورافيت: من الماركات الأكثر بيعًا بسبب سعرها وجودتها، بتركز على القطع الداخلية للسيفون، والتوصيلات الداخلية.
• سمارت: من الشركات المتخصصة في إنتاج وبيع مواسير السباكة الداخلية، بأعلى جودة. بتقدم خامات مختلفة تناسب مختلف الاحتياجات.
• الشريف: من أفضل الشركات المنتجة أيضًا لمواسير الصرف الداخلي، وبتمتاز منتجاتها بالجودة سواء الجسم الخارجي أو الداخلي.

أفضل مولات بيع مستلزمات السباكة

معظم المولات في القاهرة بتهتم ببيع مستلزمات وكماليات الحمام والمطبخ، من أدوات أساسية وسيراميك وكماليات تشطيبات، ومن أشهر المولات:

• مؤسسة السلاب: لها فروع كثيرة في القاهرة، وموقع إلكتروني من خلاله يمكن معرفة الأسعار أو متابعة التخفيضات. لإنها من الأماكن المهتمة جدًا بعرض موديلاتها على الموقع وتحديد الأسعار وتقديم تخفيضات في أوقات كثيرة على مدار العام.
• مظلوم: من المعارض الكبيرة والمنتشرة في أماكن كثيرة في مصر، لها قسم خاص بأدوات السباكة، فهي في الأصل معارض للسيراميك والبورسلين.
• سان جورج: ودا مول خاص كله بأدوات السباكة ولوازمها، رغم إنه أضاف قسم للسيراميك والبورسلين، إلا أنه بالأساس اختصاصه أدوات السباكة. له فرع في الفجالة وآخر في حدائق الأهرام.
• محجوب: يوفر كل ما يخص السباكة وكماليتها الخارجية للمطبخ والحمام، والأهم إنه بيوفر خدمات توصيل وتقسيط. يعني نظام الشراء هيكون مناسب جدًا للعرسان عند تجهيز الشقة.

وبكدا نكون وضحنا أهم أماكن بيع مستلزمات السباكة في القاهرة من أماكن بيع جملة وبالقطعة. وكمان تقدروا تتابعوا عروض الشركات على مواقعهم الإلكترونية للشراء بأفضل سعر.

اقرأ أيضًا: وضعيات صور للعريس وأصحابه أفكار مطرقعة وسهلة.

اقرأ أيضًا: أماكن بيع بدلة الفرح في القاهرة والجيزة.