أماكن بيع الأثاث في مصر الأفضل والأضمن

عشان عارفين أهمية الأثاث في كل بيت خاصة للعروسين هنقولكم على أهم أماكن بيع الأثاث في مصر واللي هتلاقوا فيها كل احتياجاتكم عند تجهيز شقتكم.

ولأن تجهيز شقة العروسين بيكون أهم جزء فيها اختيار الأساس هنساعدك إزاي تختاروه. بحيث يحقق لكم الراحة اللي محتاجينها وفي نفس الوقت يكون متماشي مع ذوقكم. وطبعًا إزاي نحدد ميزانية مناسبة لاختيار الأثاث والأماكن اللي تقدورا تشتروا منها.

إمتى تبدأ تدور على أماكن بيع الأثاث في مصر

مش ضروري أبدًا تكون خطوتكم الأولى بعد الخطوبة هي البحث عن الأثاث. ولكن هي برضو من الخطوة الأخيرة. فممكن بعد اختياركم للتصميم الداخلي المناسب لمساحة الشقة وعند مرحلة تحديد الأوان والأرضيات تحددوا ستايل الأثاث اللي هتحتاجوه ويتماشى مع التصميم اللي اختارتوه.

بعد الاختيار تقدروا تبدأوا في اختيار الأثاث من كتالوجات لو هتفصلوا حاجة مناسبة لمساحة معينة. أو لو حابين كل الأثاث يكون عمولة فهتبدأوا بالاختيار قبل الفرح بحوالي 5 شهور على الأقل لأن الأثاث العمولة بياخد وقت طويل شوية وخاصة لو النجار عنده تسليمات قبلكم.

ولو هتشتروه جاهز فقبل الفرح بشهر أو اتنين على الأكثر. بحيث ميتعرضش للتراب وقت طويل قبل الفرش.

تحديد ميزانية شراء الأثاث

من الطبيعي إن من قبل الخطوبة العريس بيحدد الميزانية التقريبية لكل احتياجاته. وهنا المفروض هتبدأوا تختاروا الأثاث بناءً على الميزانية المحددة مُسبقًا. وممكن نقسمها على حسب الأولويات يعني الأعلى سعرًا للغرفة الأكثر أهمية بالنسبالكم وهكذا. ولكن سواء كانت الميزانية مرتفعة أو منخفضة هتحتاجوا تركزوا في شوية تفاصيل عشان تقدروا تحددوا هتقدروا تشتروا منين من بين أماكن بيع الأثاث في مصر وهتشتروا بكام.

أولًا: عدد الغرف

بناءً على عدد الغرف اللي هتحتاجوه هتحددوا الميزانية. يعني أقل شقة بتحتاج غرفة نوم وغرفة استقبال وغرفة معيشة ومنطقة طعام. ممكن منطقة الطعام تكون في المطبخ أو في مكان متاح للسفرة. وغرفة الأطفال بتكون على حسب اتساع مساحة الشقة ورغبة العروسين في شراءها من بداية الزواج. طبعًا إذا المساحة والميزانية تسمح بإضافة أثاث تاني يبقى دا تحددوه بناءً على احتياجاتكم.

ثانيًا: خامات الأثاث

هنا هنتكلم عن نقطتين مهمين وهما خامة الأثاث “الاستايل” لإن مثلًا الأثاث الموردن سعره غير الأساس الكلاسيكي الفخم. وكذلك سعرهم مختلف عن المعدن لمحبي أسلوب التصميم الداخلي الصناعي. فهنا سعر الأثاث مرتبط بالاستايل اللي إنتم هتختاروه.

وتاني حاجة خامة الأثاث “الجودة” في كل ستايل خامات كثيرة جدًا. يعني في الموردن ممكن تكون غرفة نوم بـ 50 ألف جنية أو أقل شوية. وممكن الغرفة سعرها يتجاوز 150 ألف. يبقى هنا نركز على عامل الجودة ونختارها بما يتناسب مع الميزانية.

ثالثًا: أماكن الشراء

الأثاث زيه زي أي منتج في العالم بيختلف من حيث الشكل والجودة. وكما بيختلف سعره حسب العلامة التجارية. يعني لو هتشتري من أماكن بيع الأثاث في مصر الشعبية أو المنتشرة في مناطق بيع الأثاث. غير لما تشتري من مول تجاري زي مول مصر ومول العرب وغيرها من العلامات التجارية الشهيرة اللي ليها فروع في الأماكن دي.

أفضل أماكن بيع الأثاث في مصر

في كل مكان في مصر تقريبًا هتلاقوا مكان مختص ببيع الأثاث. سواء ورش تصنيع أو معارض بيع. دا غير معارض البيع المباشر اللي بقت في كل مول كبير في مصر.

وممكن نقسم أماكن بيع الأثاث في مصر لقسمين:

القسم الأول: معارض المولات

ودي هتلاقيها في مولات كتير زي مول مصر، مول العرب، هايبر، سيتي سنتر. وبتكون فيها فروع مختلفة، سواء معارض لورش صغيرة. أو معارض كبيرة زي أيكيا، وهوم سنتر، وهب فرنتشر وغيرهم كتير.

القسم الثاني: مناطق الأثاث

ودي بتكون إما معارض في شوارع معينة شهيرة هنلاقيها منتشرة في أماكن متفرقة من الشارع. زي شارع فيصل، شارع الهرم، وفي شارع عباس العقاد، ومكرم عبيد، ومصطفى النحاس في مدينة نصر.

وممكن تبقى مناطق ورش ومعارض زي طبعًا دمياط، والمناصرة قرب منطقة العتبة. وأماكن مماثلة في محافظات مصر بتجمع بين ورش الأثاث والمعارض في نفس المنطقة.

أماكن بيع الأثاث أون لاين

تقريبًا أول ما بتتكلموا عن الأثاث هتبدأ تظهرلكم إعلانات معارض من كل الدنيا. وعشان نتجنب شراء حاجة مش مضمونة هنحاول نقولكم أماكن مناسب تقدروا تشتروا منها أون لاين. خاصة وإن تجارب الشراء منها تقييماتها عالية ومفيش مشاكل مكررة.

من أشهر أماكن بيع الأثاث في مصر أون لاين هي أيكيا بلا منازع. لكن طبعًا أسعارها مش في متناول الجميع ولكنها خامة ممتازة مع أسعار مرتفعة. وهومز مارت ودي خامات جديدة جدًا وأسعار مناسبة. وهب فرنيشتر ودا تصاميم هايلة وسعر إلى حدٍ ما مناسب. وأخيرًا لو الميزانية مش مناسبة ممكن نشتري من أماكن موثوقة زي المرشدي ورنين خاصة وإن عندهم خدمة الاسترجاع في حالة المنتج في مشاكل أو مش عاجبكم.

أخطاء نتجنبها عند شراء الأثاث

وإنتم بتشتروا الأثاث اتأكدوا من المقاسات الأول. لإن وارد جدًا خطأ في المقاس يضيع عليكم فلوس كتيرة. كمان قارنوا الأسعار قبل ما تشتروا وشوفوا نفس القطعة بتتباع فين وبكام.

وحاولوا تتأكدوا من جودة الخامات خاصة لو بتشتروا منتج غالي. ولو هتشتروا كل الأثاث من مكان واحد في نفس الوقت خدوا معاكم نجار يشوف الخامة ويتأكد من جودتها.

وكدا تقدروا تشتروا احتياجاتكم من أي مكان من أماكن بيع الأثاث في مصر بدون ما توقعوا في أخطاء تضايقكم بعد كدا.

اقرأ أيضًا: ديكورات رومانسية لغرف النوم.

اقرأ أيضًا: تصميم غرف نوم ضيقة تساعد على الشعور بالاتساع.