أماكن بيع اكسسوارات الفرح للعروسة أون لاين ومحلات

من أهم تجهيزات الفرح اللي العروسة بتركز عليها هي الاكسسوارات. عشان كدا بتبدأ بدري تتدور على أماكن بيع اكسسوارات الفرح حتى من قبل ما تلاقي الفستان. والسبب إن تقريبًا الاكسسوارات من أهم القطع اللي بتأثر في شكل العروسة خاصة في صور سيشن الفرح.

وعشان تريحي بالك من البحث ومتلفيش كتير هنحاول نختصر عليكي المسافة ونقولك على الخلاصة. وهي أفضل أماكن بيع اكسسوارات الفرح سواء محلات أو أون لاين.

نصائح قبل البحث عن أماكن بيع اكسسوارات الفرح

بس قبل ما تبدأي في شوية نصائح كدا هتساعدك تختاري بسرعة واللي يناسبك ومتندميش على أي حاجة تشتريها:

• حددي الأول الميزانية اللي هينفع تصرفيها على الإكسسوارات.
• جهزي قايمة بالاكسسوارات اللي محتاجاها، وحددي أشكال تختاري بينها.
• اختاري فستانك الأول أو على الأقل حددي الاستايل اللي عايزة تلبسيه.
• حددي مجموعة من الاكسسوارات اللي هتتناسب مع ستايل الفستان. وبعدين استقري على اللي يناسب شكلك وحجم الوش وطريقة الطرحة اللي هتلبسيها. أو تسريحة الشعر اللي هتعمليها.
• ركزي على الاكسسوارات المريحة، بلاش حاجة تبقى ضيقة أو فيها معدن واضح يضايقك طول الفرح.
• اتأكدي إن الاكسسوارات قوية ومش هتقع منك في الفرح مع الحركة والرقص.

لو روحتي أماكن بيع اكسسوارات الفرح هتحتاجي اي؟

لو محتارة ومش عارفة هتحتاجي اكسسوارات ايه في الفرح فخلينا ناخدها واحدة واحدة. ونوضحلك الأنواع والخامات اللي هتناسبك في الفرح. عشان وانتي بتدوري على أماكن بيع اكسسوارات الفرح تروحي مباشرة للأماكن اللي هتوفر النوع المناسب ليكي.

أولًا: شنطة العروسة

متستغربيش، بقت موضة لطيفة جدًا إن العروسة يكون ليها شنطة يوم الفرح. والمقصود بيها شنطة اليد الرقيقة جدًا سواء المرصعة بأحجار لامعة أو الهاند ميد. ودي هتنفع يكون فيها موبايلك وليب جلوس أو روج ومناديل.

ثانيًا: طاقم “حلق، سلسلة، إسورة، خاتم”

مش ضروري يكون الطاقم كامل، ممكن نكتفي بكولية أو سلسلة مع حلق. أو خاتم وأسورة لوحدهم وحلق وسلسلة لوحدهم. المهم إنك تعرفي تنسقي كل قطعة اكسسوار مع بقية القطع سواء الشنطة أو حتى جزمة الفرح والطرحة.

ثالثًا: جزمة العروسة

ومش المقصود إن الجزمة جزء من الإكسسوار، ولكنها أكيد أهم قطعة بعد الفستان والاكسسوار. وكتير من العرايس بتحب تضيف جزء إكسسوار عليها زي خلخال. أو تضيف شرايط ستان أو جوبير، فعلى حسب ذوقك اهتمي بتنسيق الجزمة مع باقي الاكسسوارات.

إزاي تنسقي الإكسسوارات مع الفستان؟

طبعًا النقطة دي محتاجة تركيز جدًا، عشان ننسق الاكسسوارات مع الفستان بس من غير ما نقلل من جمال الفستان، وهنا هنتصرف على حسب ستايل الفستان نفسه:

• يعني لو الفستان بسيط هنحاول نظهره باكسسوارات لامعة ولكن غير مبالغ فيها. لو الفستان من التُل الخفيف وسادة، هنضيف عُقد فيه فصوص لامعة، وتاج برضو فيه فصوص.
• لو الفستان فيه فصوص كتير هنكتفي بسلسلة وفيها ألماظة كبيرة مثلًا. بحيث تبقى قطعة واحدة بس كبيرة وواضحة ولكنها مش هتزود لمعان الفستان. والتاج يكون المعدن ظاهر فيه أكثر من الفصوص.
• ولو الفستان ليه ياقة مثلًا أو رقبة طويلة هتحتاجي سلسلة قصيرة جدًا. بحيث تبقى ملفوفة على الرقبة ونازلة مسافة صغيرة على أول الصدر. وهنختار حلق طويل عشان يظهر مع رقبة الفستان.
• وألوان الاكسسوارات طبيعي تبقى رقيقة جدًا. هتبقى عندك اختيارات بين الأبيض، والأوف وايت، والعاجي، والفيروزي، والوردي.

أماكن بيع اكسسوارات الفرح في القاهرة

دلوقتي أماكن بيع الاكسسوارات منتشرة جدًا، تقريبًا في كل منطقة حيوية هتلاقي محلات اكسسوارات. لكن هنحاول التركيز على الأماكن اللي فيها عدد كبير من محلات الاكسسوارات. بحيث تقدري تنزلي مكان واحد وفي نفس الوقت تلاقي أكثر من اختيار قدامك.

• وسط البلد، وخاصة شارع قصر النيل و26 يوليو، هتلاقي فيها محلات كتير منها النمرسي. وكل المحلات بتهتم إنها توفر تشكيلات كتيرة للعروسة.
• شارع شهاب ودا متفرع من شارع جامعة الدول بالمهندسين. ويعتبر من أفضل أماكن بيع اكسسوارات الفرح لأن فيها عدد كبير من محلات بيع طرح واكسسوارات. والمحلات دي بتوفر أحدث قطع اكسسوارات للعرايس.
• شارع عباس العقاد، وطبعًا إلى جانب كل محل فساتين أفراح هتلاقي محل اكسسوارات للفرح. غير إن معظم المحلات اكسسواراتها إلى حدٍ ما شعبية، إلا إنك هتلاقي برضو محلات ذوقها راقي جدًا.
• ركزي برضو في المولات زي كايرو فيستيفال وسيتي ستارز ومول العرب. هتلاقي فيهم محلات فخمة جدًا لبيع الاكسسوارات، ولكن طبعًا سعرهم مرتفع.

أماكن بيع اكسسوارات الفرح أون لاين

لو إنتي من النوع اللي بيحب يشتري أون لاين ومعندكيش طاقة تلفي على المحلات. يبقى تبدأي تدوري بدري شوية عشان لو التوصيل أخر عليكي متبقاش مشكلة. ومن الأماكن اللي هتلاقي فيها اكسسوارات جميلة جدًا:

• شي إن: ودا بقى هوس للبنات أصلًا، هتلاقي عليه كل احتياجاتك من الاكسسوارات. ولكن ركزي في مواصفات كل قطعة عشان تتأكدي إنها هتناسبك.
• إنستجرام: وطبعًا مش هو تحديدًا اللي بيبيع، لكن هتلاقي عليه أماكن بيع اكسسوارات الفرح كتيرة جدًا ومتنوعة. وهتلاقي عليه أماكن داخل وخارج مصر.
• النمرسي: ودا أهم مكان هتلاقي فيه اكسسوارات الفرح، سواء أون لاين أو في فروعه.

وطبعًا أيًا كان المكان اللي هتشتري منه سواء من أماكن بيع اكسسوارات الفرح أون لاين أو من فروع المحلات ركزي على إنك تشتري احتياجك بس. عشان هتلاقي حاجات كتير قدامك هتلفت نظرك وهتشتت إنتباهك عن اللي انتي محتاجاه.

اقرأ أيضًا: ديكورات كتب كتاب جديدة ومختلفة تناسب ذوقك.

اقرأ أيضًا: تحضير شنطة يوم الفرح للعروسة بالتفصيل.