أفكار هدايا رومانسية للعروسة بسيطة لكن مميزة

من المناسبات المهمة جدًا اللي لازم تفكر فيها قبل الفرح هي هدايا العروسة. لإن الهدايا وبالذات وقت الفرح بتكون أفضل وسيلة للتعبير عن الحب. عشان كدا هنقولك شوية أفكار هدايا رومانسية للعروسة تقدر تفاجئها بيها. سواء يوم الفرح أو بعد الفرح وحتى في شهر العسل وبعده.

أفكار هدايا رومانسية للعروسة يوم الفرح

يوم العمر اللي مش بيتنسي، لازم تخلي هداياه كمان متتنسيش، ويكون ليها طابع خاص، ومن الأفكار المميزة جدًا على سبيل المثال:

تصميم صندوق ذكريات

ممكن تجمع كل ذكريات فترة خطوبتكم، مثًلا صور ليكم، رسائل مميزة بينكم. أو تذكرة لمكان دخلتوه مع بعض، أو أي حاجة ليها علاقة بذكرة مميزة. هتجمع كل الحاجات دي في الصندوق، وتنظمها بشكل جميل وتكتب معاه مرسال فيه توضيح للذكريات.

قطعة مجوهرات أو اكسسوار مميز

أكيد هتلاقي العروسة بتحب حاجة معينة، زي وردة أو شكل معين أو أي رمز ليه أهمية عندها. حاول تدور على سلسلة أو خاتم عليه الرمز دا بحيث يبقى فعلًا مفاجأة هتبسطها. أو ممكن خاتم تنقش عليه تاريخ ذكرى مميزة بالنسبالكم.

مرسال بخط اليد

البنات كلها بتحب المراسيل، مهما طلع شات واتساب وماسنجر وغيره. يبقى للمرسال الورقي أهمية خاصة، تخيل فرحة عروستك لو كتبتلها مرسال بخط إيدك ووصلته ليها يوم الفرح قبل الفرح أو بعده. توصف فيه مشاعرك أو أد ايه إنت مستني حياتكم الجديدة تبدأ. المرسال هيغير من معنوياتها ويخليها في أسعد حالاتها، كمان هيخليك إنت كمان في أسعد حالاتك.

أفكار هدايا رومانسية للعروسة في عش الزوجية

طيب مقدرتش تنفذ اللي قولناه من أفكار هدايا رومانسية للعروسة يوم الفرح. هتبقى قدامك فرصة تانية تقدم هدية مميزة بعد ما توصلوا عش الزوجية. ومن أهم أفكار هدايا رومانسية للعروسة تقدر تنفذها يوم الفرح:

• عشاء رومانسي: تحضير العشاء في أول ليلة ليكم مع بعض هيكون ليه احساس مميز جدًا. ومش هياخد أي جهد لأن طبيعي هيكون عندكم أكل جاهز، كل اللي عليك تجهز الأكل على السفرة وتولع شموع وموسيقى هادية وهتبقى أحلى هدية.
• برواز لذكرياتكم: ممكن تطبع صور ليها ذكريات معاكم، وتحطهم في برواز بشكل منظم وتعلقه على أول مكان عينها هتشوفه في الشقة.
• بوك نوت ليومياتكم: هيكون هدية مختلفة جدًا ورومانسية جدًا، إنك تبدأ تتكلم فيه عن أهم لحظات مرت بينكم. وتسيب الباقي فاضي عشان تكتبوه مع بعض في كل لحظاتكم المميزة.

أفكار هدايا رومانسية للعروسة في شهر العسل

طبعًا الوقت اللي هيعدي عليكم في شهر العسل مش هيعدي عليكم مرة تانية. عشان كدا لازم تسيب فيه ذكريات مميزة، هنقولك شوية أفكار ممكن تطبق منها اللي يتناسب مع شخصية عروستك أو على حسب إنت شايف إيه يبسطها:

• حجز جلسة سبا مزدوجة: هتقضو مع بعض وقت قمة في الاسترخاء. لو الفندق اللي حجزت فيه شهر العسل بيوفر خدمات سبا احجز جلسة لفردين.
• رحلة فيها مفاجأة: حسب المكان اللي هتقضو فيه شهر العسل حاول تشوف مكان مناسب ممكن تعمل فيه ديكور وزينة مفاجأة ليها. ويفضل يكون مكان على البحر أو في حديقة، وتعيشوا فيه أجواء مختلفة.
• اكسسوار للذكرى: من غير ما تاخد بالها حاول تشوف أشهر حاجة المكان معروف بيها. بحيث تقدملها هدية زي سلسلة عليها ذكرى من المكان. وأكيد مش هتنسى الوقت اللي قضيتوه في شهر العسل طول عمرها.

أفكار هدايا رومانسية للعروسة بعد شهر العسل

طيب لو معرفتش تطبق أي أفكار هدايا رومانسية للعروسة من اللي قولناها، وخلاص رجعت من شهر العسل، هل لسه قدامك فرصة تقدملها هدية؟؟؟ أكيد لسه فيه فرصة، وتحاول توضحلها إن الهدية سببها إنكم خلال هتستقروا في بيتكم وحبيت تعملها الهدية دي مفاجأة:

• جلسة رومانسية: تقدر تنظمها في البلكونة أو في غرفة المعيشة. تكون فيها أضواء هادية جدًا وعطر فواح مريح للأعصاب، وتشغل فيلم رومانسي أو فيلم أنتم بتحبوه، وشوية مكسرات وشموع بسيطة وأجواء لطيفة.
• كروت رومانسية: ممكن تلحق نفسك وتكتب لها شوية كروت رومانسية وتوزعهم في كل مكان في الشقة، بحيث كل ما تفتح مكان أو درج تلاقي مفاجأة جواه.
• كروت مساعدة: ودي بقى هتخلي الحياة بينكم فوق الرائعة. مثلًا كارت في المطبخ تلاقيه الصبح “متحضريش العشا أنا اللي هعمله النهاردة”، “ليكي خروجة عندي، اختاري المكان اللي تحبيه”، “تحبي نعمل ليلة فيلم ولا نروح السينما”، وهكذا، أمور بسيطة لكن قادرة تغير حياتكم.

المهم يعني وإنت بتنفذ أي أفكار هدايا رومانسية للعروسة اختار الأول اللي تحسه طالع من قلبك. لأن لو عملت مفاجأة إنت نفسك مش حاببها أكيد هيوصلها الإحساس دا، فاختار اللي يبسطكم إنتم الاتنين.

اقرأ أيضًا: أرخص أماكن شهر العسل خارج مصر.

اقرأ أيضًا: تحضير شنطة يوم الفرح للعريس.