أزياء ضيوف الفرح إزاي يختاروها؟

أزياء ضيوف الفرح هي أكتر حاجة بتكون محيرة ليهم، من أول ما حد بيستلم دعوة لحضور فرح حد من قرايبه أو معارفه.

بتبدأ حيرة طب هنلبس ايه؟ والحيرة بتزيد كل ما كان الضيوف دول من الدايرة البعيدة عن العروسين.

فميقدروش يعرفوا منهم كواليس خططهم ويحددوا على أساسها أكتر حاجة ممكن تكون مناسبة.

القرايب من الدرجة الأولى والأصدقاء المقربين بيكونوا محظوظين في النقطة دي.

وده لإنهم بيبقوا مع العريس والعروسة خطوة بخطوة وبيختاروا معاهم كل حاجة.

وبالتالي بيبقوا عارفين إيه الأزياء اللي هتبقى مناسبة لفكرة أو ثيم الاحتفال.

ومش بعيد يكونوا محددين أزياء معينة ليهم كمان كمجموعات.

ويمكن أغلب المقالات والنصايح عادة بتكون موجهة للعريس والعروسة وإنهم يعملوا ايه في تخطيطهم للفرح واختيارهم لتفاصيله.

لكن نادر ما حد بيلتفت للضيوف اللي هيحضروا الاحتفال ده نفسهم وهيشاركوا فيه، وهم أهم ناس فيه.

لإن من غيرهم مش هيكون فيه فرح أصلاً!

وعشان كدة احنا هنا في المقال ده حبينا نعوضكم ونحللكم حيرتكم.

وهنساعدكم في إزاي تختاروا اللي هتلبسوه في اليوم ده وبناء على ايه؟ فتابعوا معانا المقال.

أهم قواعد اختيار أزياء ضيوف الفرح:

أول حاجة لازم تاخدوا بالكم منها وانتم بتختاروا اللي هتلبسوه للفرح هو إذا كان العريس والعروسة حددوا فكرة أو موضوع معين للبس المعازيم في الفرح ولا لا، عادة ده هيكون مكتوب في الدعوة اللي اتبعتت لكم.

أما لو مش مكتوب حاجة معينة؛ فتقدروا برضه تستشفوا إذا كان فيه حاجة مميزة من لهجة الدعوة نفسها.

فهل هي رسمية وعادية أو كاجوال وبتوحي بنوع معين من الاحتفال؟ وكمان تقدروا تحددوا نوعية لبسكم بناء على وقت ومكان الحفلة نفسه.

فحفل زفاف بالنهار طبيعته وطبيعة أزياء ضيوف الفرح اللي هيحضروه هتكون مختلفة عن حفل زفاف بالليل.

كذلك نفس الفكرة بالنسبة للمكان.

الموضوع هيختلف إذا كانت الحفلة في قاعة في فندق فخم أو في نادي بسيط مثلاً أو حفلة في البيت.

وطبيعة المكان برضه هتفرق من إذا كانت قاعة مقفولة ولا فرح على الشط مثلاً أو في حديقة مفتوحة.

تفاصيل في ايه اللي تلبسوه وايه متلبسهوش:

حتى بعد ما تستقروا على اختيار نمط أزياء ضيوف الفرح، لسة فيه تفاصيل لازم تاخدوا بالكم منها وانتم بتشتروها زي الألوان والاكسسوارات.

فمثلاً مش هيكون من المفضل انكم تلبسوا أبيض، حتى لو فيه بعض العرسان مبيعترضوش على ده لكن الأنسب انكم تفضلوا في المنطقة الآمنة.

والكلام ده مش للبنات أو الستات بس وإنما كمان الرجالة ميفضلش انك تختار بدلة بيضا مثلاً لإن دلوقتي عرسان كتير بقوا بيلبسوا بدل بيضا في فرحهم عشان يطقموا مع فستان العروسة.

ولزيادة الأمان؛ فيفضل انكم تبعدوا عن الألوان المشابهة للأبيض زي الأوف وايت واللون الوردي الباهت والألوان المحايدة الناعمة اللي ممكن تتشاف كإنها أبيض.

أفكار أزياء ضيوف الفرح النسائية:

لو لسة محتارة تختاري ايه ففي تشكيلة كبيرة من الأزياء في السوق، وممكن تلاقيها في دولابك كمان تقدري تختاري منها.

تقدري تختاري ما بين إنك تلبسي بدلة جمبسوت سواريه أو سوداء برباط وسط تديكي أناقة وانسيابية في الحركة، أو بدلة رسمية نسائية بألوان مناسبة للفرح.

أو فستان دانتيل رقيق يخليكي تظهري زي الفراشة في المكان أو فستان شيك رسمي من الترتر يديكي مظهر ملكي.

أفكار لبدل الرجال:

يمكن انتم كرجالة الموضوع أسهل بالنسبة لكم شوية في اختيار أزياء ضيوف الفرح هي كدة كدة بدلة، بس برضه ممكن تبقى الحيرة في اختيار نوعها.

فلو الفرح هيكون في مكان فريندلي أوبن اير بالنهار تقدر تلبس بدلة قماش كاجوال مفتوحة تحتها قميص منقوش نقشات بألوان مبهجة.

وحتى لو بالليل لكن مع نفس الأجواء الكاجوال البسيطة دي؛ فتقدر برضه تختار بدلة منقوشة من قطعتين البنطلون والجاكيت مع قميص سادة متناسق مع ألوان البدلة.

أما لو الفرح في مكان رسمي وفخم؛ ففي الحالة دي ممكن تختار البدلة الكاملة من تلات قطع: البطلون والجاكيت والبليزر مع قميص رسمي تحتهم بألوان محايدة ومتناسقة.

وفي نهاية المقال نتمنى إننا نكون فدناكم وقدرنا نريحكم من الحيرة في اختيار أزياء ضيوف الفرح اللي بتجيلكم في كل مرة تتعزموا فيها على فرح.

ونتمنى لكم حضور أفراح سعيدة دايماً، وإنكم دايماً تكونوا متألقين في كل مكان تروحوه.