أحدث تسريحات الشعر للعروسة اختاري منها اللي يناسبك في فرحك

أحدث تسريحات الشعر للعروسة بالظبط زي اتجاهات الموضة في فساتين الأفراح بتتغير كل فترة.

وعلى الرغم من أهمية إنك تكوني مرتاحة في التسريحة اللي هتختاريها أكتر من أي شيء تاني.

إلا إن ده ميمنعش إنك تدمجي الموضة مع راحتك، وأكتر حاجة بتميز الموضة عموماً في الفترة الحالية هي اتجاهها للبساطة والعفوية.

بمعنى إنك مش هتضطري تعملي تسريحة غريبة مش متعودة عليها عشان توصلي لمظهر العروسة المثالية.

كل اللي ممكن تحتاجيه هي لمسات بسيطة على تسريحتك وشعرك عشان توصلي للأناقة والشياكة اللي بتتمنيها في اليوم ده.

وعشان كدة احنا هنا في المقال ده جمعنا لك أجدد التسريحات في الوقت الحالي.

واللي تقدري تختاري منها براحتك اللي يناسب شخصيتك ومظهر فستانك وجو فرحك.

فتابعي معانا المقال.

المظهر الطبيعي للشعر القصير:

لو كان شعرك قصير فدي أصلاً واحدة من الموضات الرايجة حالياً في أحدث تسريحات الشعر للعروسة.

وده معناه إنك تقدري تحتفظي بمظهر شعرك الطبيعي زي ما هو من غير أي إضافات.

غير بس مجرد تسريحة ناعمة رقيقة تظهر جماله.

إكسسوارات مزخرفة للشعر:

لو كان خيارك إنك مش هتلبسي طرحة فستان الفرح؛ فده معناه إنك هتركزي أكتر على الإكسسوارات اللي هتستخدميها لشعرك.

وفي الحالة دي سواء كنت هتستخدمي مشابك وتوك شعر جانبية أو طوق كامل للشعر من ورا.

فالموضة في الجزئية دي هي استخدام قطع براقة وجريئة.

أحدث تسريحات الشعر للعروسة من التسريحات التقليدية:

انطلاقاً من نقطة البساطة والعفوية اللي قلنا عليها في الأول.

بقت موضة التسريحات بتعتمد على التسريحات التقليدية اللي متعودين عليها في يومنا العادي.

زي إنك تعملي كحكة مرفوعة، ودي يتتميز إنها تخلي التركيز كله على وشك وجماله.

أو ممكن كمان تعملي ديل حصان أو ضفيرة جانبية،كل التسريحات دي بتديكي مظهر عفوي بريء وطفولي.

وكمان بتساعدك إنك تتخلصي من الوقت الطويل اللي ممكن يضيع في التسريحات المعقدة.

وكمان بيخلصك من إنك تتحملي وزن إضافي على راسك من الوصلات والشعر المستعار اللي ممكن تضيفيها بسبب التسريحات دي.

وأكتر حاجة بتميز التسريحات التقليدية إن على الرغم إن بعض الناس ممكن يشوفوها فوضوية إلا إنها بتدي مظهر أنيق وناعم لتسريحة العروسة.

وخصوصاً لما يتضاف لها بعض الإكسسوارات حوالين الوش وعند خط الشعر.

شعر مموج:

ومن الموضات المنتشرة حالياً في المجال ده هي الشعر المموج بتمويجات عشوائية عفوية شبه موج البحر مش التمويجات المنظمة اللي بتعملها مكواة الشعر.

وتقدري تحققي المظهر ده بإنك تقسمي شعرك لنصين وتسيبيه ينسدل على كتافك بحرية، أو لو حابة فممكن تعمليه ضفيرة.

والموضة في أحدث تسريحات الشعر للعروسة من النوع ده إن الضفيرة تكون كبيرة؛ فلو شعرك خفيف ممكن تضيفي له وصلة صغيرة تديكي الحجم المطلوب في الضفيرة.

وكمان أكتر أنواع الضفاير المستخدمة في الشكل ده هي الضفاير اللي بتعتمد على تلات خصلات للشعر أو ضفيرة ديل السمكة السايبة.

وأكتر الإكسسوارات اللي بتليق على النوع ده من التسريحات هي إكسسوارات شعر رقيقة على شكل الزهور وبألوانها البسيطة.

أحدث تسريحات الشعر للعروسة رجعت لها موضة القوصة:

كلنا كنا بنعمل قوصة واحنا صغيرين تنزل على قورتنا وتدينا مظهر طفولي بريء جميل، لكن في فترة ما لما كبرنا طلعوا وقالوا لنا إن الموضة دلوقتي إن الشعر كله يبقى طول واحد راجع لورا، واحنا سمعنا الكلام.

دلوقتي رجعت موضة القوصة من تاني، وبقت الموضة هي إن يكون شعر العروسة نازل بعفوية على وشها من غير ما يضايقها.

فلو معندكيش قوصة تقدري بسهولة تطلبي من كوافير فرحك إنه يعملك واحدة تليق على وشك، أو ممكن يعملها لك بنفس طول شعرك ويخبي الزيادات منها بمشابك الشعر.

وفي نهاية المقال نتمنى إننا نكون ساعدناكي في اختيار أحدث تسريحات الشعر للعروسة اللي ممكن تناسبك وتناسب جمالك وذوقك وأجواء فرحك.

ونتمنى لك فرح سعيد وبداية حياة زوجية سعيدة تدوم للأبد وألف مبروك مقدماً.