خامات أقمشة فساتين الأفراح اعرفيها قبل ما تختاري فستانك المميز
خامات أقمشة فساتين الأفراح أغلب العرايس مبيركزوش فيها، بيهتموا أكتر حاجة بالشكل العام للفستان وتصميمه.
لكن في الحقيقة إن ملمس الفستان ومظهره العام بيعتمد بشكل كبير على القماش المستخدم في تصنيعه.
وعشان كدة في المقال ده احنا هنحاول نساعدك بإننا نعرفك أنواع الخامات اللي لازم تعرفيها قبل ما تختاري فستانك.
فتابعي معانا المقال.
الحرير:
معروف إن الحرير خامة فاخرة، وهو خامة أساسية في الفساتين خصوصاً فستان العروسة.
وبيتميز بنعومته ولمعانه اللي بيدي لفساتين العرايس أناقة ورقي ملهمش مثيل، وأجود أنواع الحرير المعروفه هو حرير ميكادو.
وأشهر براند عالمي بيستخدم الحرير في تصميمات الفساتين وخصوصاً الخاصة بالأعراس هي ماركة أنطونيو ريفا.
والبراند دي من أكتر البراندات المشهورة بين العرايس على مستوى العالم، وحلم لأي عروسة إنها تلبس فستان منها.
الدانتيل في خامات أقمشة فساتين الأفراح:
الدانتيل مش مجرد نوع من خامات أقمشة فساتين الأفراح وإنما هو أصلاً اسم عام لنوع الخيوط المستخدمة في القماش.
والخيوط دي بتكون عبارة عن خيوط منسوجة مع بعضها بشكل ملتوي ونمط مفتوح لكنه مش واحد.
ففي تقنيات وأنماط كتير بيستخدمها المصممين في الفساتين الدانتيل، وحتى لو سميناه ببساطة فستان دانتيل.
إلا إن أجواء الفستان بتتغير من واحد للتاني على حسب نمط الدانتيل نفسه وتصميم الفستان.
وده اللي بيخليه فستان مختلف في كل مرة، وممن يبقى مجرد فستان شيك لطيف أو فستان فخم راقي.
التول من خامات أقمشة فساتين الأفراح:
قماش التول هو نسيج شبكي رقيق متعدد الأضلاع، وعادة بيكون مصنوع من مواد زي القطن والحرير والألياف الصناعية زي الفسكوز.
وبيتميز قماش التول بشفافيته اللي بتخليه مثالي جداً عشان يضيف لمسة من الأناقة على فستان العروسة.
وحتى لو متمش استخدامه في تفصيل وتصميم الفستان ككل إلا إنه عادة بيكون هو المادة الأساسية أو الوحيدة في تصميم طرحة الفستان.
الأورجانزا:
الأورجانزا بيدخل في قماش فستان العروسة لإنه عادة قماش رقيق خفيف ومع ذلك متين ونسيجه بيتكون من طبقة واحدة.
وزي التول بيتم تصنيعه من مجموعة متنوعة من المواد الأساسية زي الحرير والبوليستر.
ولإنه رقيق فعادة لما بيستخدم في تفصبل وتصميم فستان العروسة بيتم استخدام كذة طبقة مع بعض في التصميم عشان تدي السمك المطلوب للفستان.
أو بيتم استخدام في تصميم أجزاء معينة من الفستان بحيث تكون شفافة زي منطقة الصدر والأكمام.
خامات أقمشة فساتين الأفراح من الشيفون:
الشيفون قماش رقيق وناعم ونسيجه بسيط، عادة كان بيتم تصنيعه من الحرير، لكن في الأوقات الأخيرة مع ارتفاع الأسعار والأزمات المالية بقى بيتصنع من الألياف الصناعية.
وده بقى بيقلل من أسعار الفساتين المصممة من الشيفون، وخصوصاً إنه بيتميز بخفة وزنه ونعومته وده بيدي انسيابية في المظهر والحركة للعروسة.
وحتى لو مش هتختاري فستان من الشيفون لكن تقدري تستخدميه برضه في تفاصيل كتير من إكسسواراتك المكملة للفستان.
ودي زي الأوشحة والطرح والجوانتيات والشرابات أو البطانة الداخلية لجونلة الفستان الكبيرة.
التفتا:
خامات أقمشة فساتين الأفراح من التفتا بتتميز بملمسها المتجعد وفي نفس الوقت ناعم وبيلمع ومتين بصلابة متوسطة.
وده بيخليه قابل لتصميمات كتير بتختلف في أناقتها وشياكة مظهرها سواء كانت بمظهر رسمي تقليدي أو تصميمات حديثة مختلفة.
وعادة القماش ده بيتصنع من الحرير بس عشان كدة معروف إنه قماش عالي الجودة وأسعاره مش قليلة.
تطريز فستان العروسة:
التطريز عادة مش مرتبط أو بيتعلق بخامة أو نوع قماش معين، هو ممكن يتعمل على أي خامة قماش.
لكن الفكرة فيه هي استخدام تقنيات تطريز معينة هي اللي بتزود شياكة وأناقة الفستان، وغالباً فستان العروسة بيستخدم فيه التطريز على الداتيل أكتر.
فحتى لو كان الفستان من أنواع قماش تاني لكن بيتضاف له طبقة دانتيل مطرزة تزوقه، وده بيزود من روعة تصميم الفستان بشكل عام.
وفي النهاية نتمنى إننا نكون قدمنا لك تفصيل وشرح وافي يعرفك خامات أقمشة فساتين الأفراح فتقدري تختاري منها اللي يناسبك في فستان فرحك.
ونتمنى لك فرح سعيد تكوني فيه أجمل عروسة، ويكون بداية لأحلى حياة جاية مع شريك حياتك اللي بتتمنيه.
هل محتوى المقال دة كان مفيد بالنسبة لك؟
نعم، مفيد!لا!
