سعر فستان العروسة إزاي تختاري الأنسب لميزانيتك؟
سعر فستان العروسة عادة هو من أكتر العوامل اللي بتأثر على اختيارك للفستان، خاصة إن عادة دي بتكون أول تجربة للعروسة.
يعني غالباً بتكون دي أول مرة تتجوز فيها وبالتالي أول مرة تشتري فساتين أفراح.
فأكيد معندهاش خبرة أوي في موضوع الأسعار.
وده بيخلي من المقلق للعروسة إنها متبقاش عارفة إذا كان السعر ده غالي ومبالغ فيه ولا عادي أو رخيص.
وعشان كدة في المقال ده احنا هنحاول نساعدك في انك تقدري تحددي أسعار الفساتين وأسباب ارتفاع أسعار الفساتين الغالية.
وكمان هنساعدك تحددي إذا كان الأنسب ليكي إنك تشتري فستانك الخاص بيك ولا تأجري واحد أفضل لك.
فتابعي معانا المقال عشان تعرفي كل التفاصيل دي.
ليه سعر فستان العروسة بيكون غالي؟:
ده سؤال ممكن يجي على بالك كتير، غير إنك برضه ممكن تسألي نفسك إن ليه الأسعار دي بتكون مختلفة بين الفساتين؟
وليه فيه فساتين أغلى بكتير وفساتين رخيصة أوي؟ الحقيقة إن في أسباب وعوامل كتير بتتحكم في أسعار فساتين الأفراح.
أهمها: الخامة اللي الفستان معمول منها، وطريقة تصنيعه، وماركته، فمبدئياً مواد تصنيع الملابس بشكل عام غالية.
لكن اللي بيفرق فساتين الأفراح عن اللبس العادي هو إن الفستان عادة بيكون من أنواع قماش زي الحرير والساتان.
والحقيقة إن أنواع القماش دي من أغلى أنواع القماش؛ فبالتالي بتأثر على أسعار الفساتين المعمولة منها.
وعشان كدة السعر للفستان الواحد بيكون غالي، غير كدة كمان فساتين أفراح كتير بيدخل فيها تطريز يدوي للخرز والأشكال اللي عليها.
أو ممكن كل الفستان يبقى صناعة يدوية أصلاً، وده بيخلي الأسعار غالية؛ لإن الصناعة اليدوية بتكون فريدة.
والقطعة منها مش بتتكرر تاني، وده معناه إن الفستان منها مبيكونلوش شبيه.
طبعاً دي عوامل بتخلي السعر يزيد لإنها بتتعامل مع الفستان على إنه تحفة فنية مش هتتكرر.
وفي النهاية فيه عامل البراند، فطبيعي لو الفستان أصلي من ماركة عالمية مشهورة هيكون أغلى كتير.
فمش هيبقى فيه مقارنة بينه وبين الفستان اللي في محل بسيط أو من خياطة بسيطة في شارعكم.
إزاي تاخدي قرارك؟:
ولإنك هتلبسي فستانك ليوم واحد بس؛ فمن الطبيعي إنك تكوني عايزة تخلي سعر فستان العروسة أرخص ما يكون.
لكن احنا مننصحكيش إنك تاخدي قرارك بناء على السعر بس، فبرضه الفستان المصنوع من خامات وتصاميم مختارة هيزود من روعة مظهرك وجمالك يوم فرحك.
وعشان كدة العوامل اللي لازم تاخدي بالك منها مش بس السعر وإنما كمان مدى ملائمته لأجواء المكان وتيمة الفرح ومظهرك ولون بشرتك.
وعشان كدة ممكن خياراتك تكون ما بين إنك تشتري أو تأجري، وتشتري وتأجري بناء على ايه ومن أي مكان؟
تخفيض سعر فستان العروسة لو هتأجريه:
فيه فايديتين هيعودوا عليكي لو اخترتي انك تأجري فستانك بدل ما تشتريه، الأولانية إنك تقدري تلبسي الفستان من ماركة مشهورة وبجودة عالية.
الفستان ده في العادي هيكون سعره غالي جداً، لكن تقدري تأجريه بنص التمن بس، وتاني حاجة إنك مش هتحتاجي تاخدي بالك منه قبل ما تلبسيه وبعد ما تقلعيه.
يعني تفاصيل زي الدراي كلين والمكواه والكلام ده كله محل الإيجار هو اللي هيهتم بيها، ده غير إنك تقدري تأجري إكسسوارات ومستلزمات تانية معاه بنفس السعر.
زي الجوانتيات وبوكيه الورد والإكسسوارات المكملة ليه زي التاج والطرحة، حتى لو هتدفعي لهم مقابل زيادة.
بس في النهاية هيوفر عليكي وقت ومجهود إنك تدوري على المستلزمات دي وتلفي عليها بنفسك.
مزايا إنك تشتري الفستان:
أما لو بتخططي إنك عايزة تحتفظي بالفستان، وممكن تلبسيه في مناسبات تانية بعد كدة خصوصاً لو مكنش أبيض تماماً.
أو ممكن تصبغيه بلون تاني بعد الفرح، بالذات لو كان باستايا مختلفة عن الاستايل المنفوش اللي مينفعش غير عروسة في فرحها.
أو لو كنت هتعملي الفرح في بلد غير بلدك الأصلية سواء في محافظة تانية أو برة مصر أصلاً.
في الحالة دي هتحتاجي إن الفستان يفضل معاكي مدة طويلة، ولإن إيجار الفستان بيكون باليوم؛ فساعتها سعر فستان العروسة بالإيجار هيكون أغلى من الشراء.
كمان شراء الفستان هيكون أريح لك لو بتفكري تعملي جلسات تصوير أوبن إير، وده معناه إنك هتتحركي كتير في أماكن عامة أو حدائق أو على البحر حسب خطتك.
لو الفستان إيجار هتفضلي خايفة طول الوقت من إنه يتوسخ أو يحصل له أي حاجة مهما كانت بسيطة.
في حين إنه لو ملكك ده هيديكي حرية إنك تنفذي أي فكرة مجنونة في التصوير وتتحركي براحتك من غير ما تخافي من حاجة.
أفكار لتخفيض سعر فستان العروسة:
لو استقريتي على إنك هتشتري فستانك فعلاً، بس محتاجة إنه يكون أرخص من الأسعار المعروضة فعلاً.
فتقدري تختاري إنك تشتري واحد مستعمل من عروسة قبلك، وهتلاقي كتير بيعرضوا فساتينهم للبيع سواء على جروبات السوشيال ميديا أو مواقع بيع الحاجات المستعملة على الإنترنت.
وفي النهاية نتمنى إننا نكون قدمنا لك أفكار تساعدك في تحديد سعر فستان العروسة المناسب ليكي وتختاري أحلى الفساتين اللي تخليكي أجمل عروسة في فرحك.
هل محتوى المقال دة كان مفيد بالنسبة لك؟
نعم، مفيد!لا!
