تأخر الزواج .. سن العنوسة وكيفية مواجهة المجتمع

تأخر الزواج بيكون لعدة أسباب، يعني مش لازم البنت ال توصل لسن معين يتقال عليها عانس. علشان فرصها في الحمل قلت. أو غن يوصل شاب لسن معين ويتقال إن راجت عليه وبقى عانس.

كل دي خرافات، وزادت لدرجة إني قرأت موضوع قريب بيقول إن سن العنوسة عند البنات بيبدأ من 30 سنة. وإن سن العنوسة للراجل بيكون بعد الأربعين. كمان فيه فكر عند بعض الناس دلوقت غن البنت ال يتعدى عمرها 25 سنة تبقى عانس..

أسباب تأخر الزواج

بيحصل تأخر الزواج لأسباب كتيرة للشاب والبنت. ممكن تكون أسباب خارجة عن إراتهم وما أكترها الأيام دي زي:

• الأزمات الإقتصادية ال بتمر بيها البلد من فترة كبيرة، مع زيادة نسبة البطالة وحتى لو فيه شغل فالرواتب مبتكفيش مواصلات الشغل مش الجواز.
• الأفكار الغريبة عند الاهل إن كانوا أهل البنت أو الشاب، والتعقيدات أو الشروط التعجيزية والتافهة في أغلب الأحيان ال ممكن تبوظ جوازة قبل يوم الفرح.
• السوشيال ميديا وتأثيرها السلبي على تفكير البنات والشباب. البنت تكون بتحلم بالسفر حول العالم وفيلا وشايفة ان ده طبيعي. والولد ال بيحلم بملكة جمال العالم والممثلات ال بيصرفوا ملايين على عمليات التجميل والمكياج والدايت وغيره.

وممكن الجواز بيتأخر لأسباب متعلقة بالشخص نفسه زي إن:

• البنت مش جاهزة للجواز لظروف عيلتها الاقتصادية وال معروف ان في مصر إجبار لازم البنت تساعد في تجهيز الشقة وفي الآخر يتقلها متكتبيش قايمة. ده غير هدية الأم ال بتطمح إن عروسة ابنها تجهزها من أول وجديد.
• الشاب مش جاهز للجواز لأسباب قلة الشغل وعدم قدرته على فتح بيت. أو عدم القدرة على تلبية طلبات أهل العروسة المبالغ فيها. في حين إنه بيدور على كيفية تشطيب شقة بأقل التكاليف.
• عدم التوفيق في اختيار شريك الحياة، زي إن الشخصيات مش متوافقة، والتفكير مش متناسب وغيره من الأسباب.

ما هو سن العنوسة

سن العنوسة هو السن ال بتوصل ليه البنت او الولد من غير زواج، وبيختلف السن ده على حسب كل دولة عربية، وكل محافظة او مدينة او قرية في كل دولة. كمان بيتبع سن العنوسة بعض الأفكار الغريبة والعادات والتقاليد المتخلفة المتداولة من جيل للتاني.

في أماكن بيتم حساب سن العنوسة من بعد مرور البنت سن التلاتين، والشاب سن الأربعين بدون جواز. وفي مناطق تانية بيتحسب سن العنوسة من بعد العشرين للبنات.

والأسوا هي المناطق ال حسب عاداتها وتقاليدها لازم البنت تتجوز أول ما تتم 14 سنة بس؟؟؟ وفي نفس المناطق دي عادي إن واحد عنده 60 سنة يتجوز البنت ال عندها 14 سنة.

المشترك في كل الفئات ال فاتت دي إنهم مش بيعتمدوا على العلم ولا الدين حتى في تحديد سن او شروط للجواز. وده للأسف بيدمر عائلات وأطفال وأجيال كاملة. وكمان بيزود المشاكل النفسية عند الشباب والبنات ال لم يوفقههم الحظ في الجواز.

حلول تأخر الزواج

إن سن الجواز يتأخر عند بعض البنات والشباب، وتزداد نسبة العنوسة ده مؤشر خطر على المجتمع. لأن بتزيد مسبة الضغط على الشباب وزيادة نسبة الانتحار والأمراض النفسية والتحرش وغيرها. علشان كده لازم نشوف حلول تأخر الزواج زي:

• تسهيل الزواج من الأهل، يعني الشاب يجهز بيته بال يقدر عليه ويدفع المهر ال أبو العروسة يطلبه وميكتبش قايمة وطبعا يتقي الله في مراته. ولو الظروف مسمحتش ممكن العروسة تساعد بال تقدر عليه ويتكتبلها قايمة وبرضه تتقوا الله في بعض.
• تشجيع الشباب على الشغل أي كان وتقدير نفسهم وتعبها بدل السفر بمئات الألوف والمخاطرة بحياتهم على رواتب ضعيفة وغيرها.
• التوعية بالدين لتقليل نسبة التحرش والاغتصاب وغيرها.
• التوعية النفسية لإبعاد الشباب عن التوجه للمخدرات وغيرها. يعني يكون مفيش معاه فلوس يتجوز ومعاه يشرب مخدرات ويدمر صحته وأصحابه وأهله.
• تقليل الاعتماد على العادات والتقاليد الغريبة. سن الجواز بيبدأ لما البنت تقدر تتحمل مسؤولية بيت وحمل وولادة وتربية أولاد وطالما سنها يقبل ده فأفضل في سن الجواز عادي.
• الراجل بيكون في سن الحواز وقت ما يكون قادر يفتح بيت ويتحمل مسؤولية أولاد وزوجة ويتقي ربنا فيهم. يعني لو ابنك مش كده متبليش بنات الناس بيه.

في النهاية تأخر سن الزواج مش عيب ولا وصمة عار. مفيش حد هيرناح طول ما بيدور على ال يرضي الناس والمجتمع لأنهم مش هيرضوا مهما عملت. ودي حياتك انت وهي مش حياة حد، مفيش حد هيشيل شيلتك غيرك ففكر في نفسك وال يريحك.