تاريخ شهر العسل على مر العصور

تاريخ شهر العسل يمكن كتير مننا مفكرش فيه، احنا اتعودنا اننا بنحتفل بيه بعد الجواز وخلاص.

لكن منعرفش هو ظهر امتى ولا ليه؟

فبعد ما بتعلنوا جوازكم وبتحتفلوا بيه، بيكون الطبيعي من وجهة نظركم إنكم تروحوا رحلة مع بعض.

سواء جوة مصر أو برة مصر، وحتى لو هتسافروا برة مصر وتستمتعوا بمية جامايكا الفيروزية.

أو تقضوا وقت رومانسي تحت برج إيفل في باريس، أو حتى تاخدوا رحلة خلوية في صحاري جنوب إفريقيا.

فكلها طرق احتفالية عشان تبدأوا الفصل الجديد ده من علاقتكم وتحتفلوا بيه.

فسواء كانت الرحلة هادية أو مليانة نشاط، ساحلية أو جبلية.

فإنكم تقضوا شهر عسل مع بعض بعد جوازكم ده بيتيح لكم إنكم تقضوا وقت خاص بيكم لوحدكم مع بعض.

وده بيساعدكم إنكم تعمقوا علاقتكم وتكونوا مع بعض ذكريات متتنسيش.

وعلى الرغم إن دي عادة معروفة خلاص عند كل الناس في الوقت الحالي، إلا إن في الحقيقة العادة دي موجودة فعلاً من قرون كتير.

لكن الفرق إنها دلوقتي هي عادة عشان توفر للأزواج الاسترخاء وانهم يعرفوا بعض أكتر.

إلا إنها زمان لما بدأت في العصور الوسطى كان ليها غرض أكتر غموض وأقل رومانسية.

فلو عاوزين تعرفوا مراحل تطور رحلات الهاني موون على مر التاريخ لحد ما نوصل للوقت الحالي.

والأساليب اللي ممكن تتبعوها عشان تستمتعوا بأحلى رحلة فيه، فتابعوا معانا المقال ده، واحنا جيبنا لكم كل التفاصيل اللي ممكن تحتاجوها وتحبوا تعرفوها.

تاريخ شهر العسل ومعناه وبداية ظهوره:

أول مرة ظهر فيها النوع ده من الرحلات كان في القرن الخامس في العصور الوسطى.

ورغم إن العادة دي زي ما بنعرفها دلوقتي بترمز للرومانسية والاحتفال، إلا إنها في الحقيقة جاية أصلاً من فكرة الجواز بالخطف.

وهي ممارسة قديمة كان بيلجأ ليها بعض الرجال في إنهم يخطفوا العروسة اللي عاوزين يتجوزوها.

وده عشان يضمنوا إن الجواز يتم بعيد عن اعتراض عيليتها، وميظهروش تاني لحد ما أهلها ييأسوا من البحث عنها.

أو لحد ما تبدأ تظهر عليها أعراض الحمل؛ فمحدش يقدر يبطل جوازهم أو يعترض عليه.

وطبعاً ده مكنش بيبقى غصب عن أهلها بس وإنما كان ممكن يبقى غصب عن العروسة نفسها برضه.

وأغلب اللي كانوا بيلجأوا للتصرف ده كان الرجالة الفقراء في الصين وأمريكا الجنوبية وجنوب وشرق آسيا وأفريقيا وبعض الدول الأوروبية.

وكان السبب في ده هو محاولتهم للهروب من دفع المهر.

وفي قصة تانية برضه ورا تاريخ شهر العسل وظهور اسمه بالطريقة دي.

وبرضه القصة دي ترجع جذورها للقرن الخامس،.

واللي بتقول إن ضيوف الفرح كانوا بيقدموا للعروسين مشروب كحولي متخمر لمدة دورة قمرية كاملة.

وكان بيتوقع إن المفروض العروسين يشربوا من المشروب ده لمدة شهر كامل عشان تزيد فرصهم في الخلفة.

وعشان كدة فتسمية هاني موون معناها فعلاً حرفياً مشروب كحولي لمدة شهر قمري.

وبعد كدة بدأت العادة دي تطور بشكل حديث على مر القرون.

في القرن التاسع عشر:

في الوقت ده في بريطانيا وأمريكا كان الأزواج الجدد بيطلعوا رحلات بعد فرحهم يزوروا فيها قرايبهم وصحابهم اللي مقدروش يحضروا فرحهم.

وأحياناً كان عشان العروسة تاخد على أجواء الجواز ولحد ما تتأقلم على حياتها الزوجية الجديدة، كان ممكن حد من صحابها أو قرايبها يطلع معاها في الرحلات دي.

لكن بداية من فترة السبعينيات للقرن ده بدأ الزوجين يسافروا لوحدهم، وكانوا بيستغلوا الرحلات دي في انهم يتباهوا ويتفاخروا بثروتهم ومكانتهم المادية والاجتماعية.

تاريخ شهر العسل في القرن العشرين:

ولما وصلنا القرن العشرين بقى الاحتفال بالهاني موون ده أمر طبيعي وشائع عند أغلب الناس، مبقاش حصر على الطبقات العالية بس.

فدخلت فيه كمان الطبقات المتوسطة خصوصاً مع تطور العربيات ووسائل النقل والسفر، وبدأ العرسان يسافروا لأماكن بعيدة ودول تانية.

حتى إن بعض الأماكن السياحية بدأت تستغل الموضوع وتقدم نفسها على إنها وجهة أساسية للنوع ده من الرحلات.

زي شلالات نياجرا اللي أطلقت على نفسها “عاصمة الهاني موون في العالم”، وفي نص القرن بدأت منتجعات الهاني موون تظهر في كل مكان.

القرن الحادي والعشرين اللي عايشين فيه دلوقتي:

ودلوقتي مبقاش تاريخ شهر العسل محصور في نوع أو نمط معين من الرحلات، لا بقى فيه خيارات كتير قدام كل عروسين في انهم يختاروا الرحلات اللي تعجبهم.

مبقاش شرط فيها مكان معين أو إنها تكون لوقت معين أو ليها برنامج محدد، ولكن الأهم من ده كله إنها تكون بهدف الاحتفال بجوازهم وإنهم يقووا علاقتهم الرومانسية.

فسواء كانت رحلة برة مصر أو جوة مصر، لمدة طويلة أو قصيرة، بتزوروا فيها مكان واحد أو بتتنقلوا في كذة مكان أو كذة دولة.

فالمهم من ده كله إنكم تقضوا أحلى وقت مع بعض وتبنوا ذكريات سعيدة تعيش معاكم العمر كله وتكون أساس تبنوا عليه علاقتكم الزوجية اللي تستمر معاكم للأبد.

وفي نهاية المقال نتمنى إنكم تكونوا قضيتم معانا رحلة ممتعة وانتم بتكتشفوا تاريخ شهر العسل على مر العصور، ونتمنى إن عسل حياتكم يدوم معاكم للأبد.