استغلال مساحة الشقة الصغيرة

لو شقتك صغيرة في المساحة فمش معنى كده إنك تعيش فيها مضغوط ومخنوق. أو تحس أنك عمرك ما هتكون مرتاح فيها. على العكس الشقة الصغيرة ليها سحرها وطابعها المميز. هي بس بتكون محتاجة لمسة تنظيم وذكاء في استغلال المساحات. ومش لازم خالص تكون مهندس ديكور علشان تغيّر شكل بيتك، كل اللي محتاجه شوية أفكار مبتكرة وقرارات ذكية في اختيارك للأثاث، وفي تنسيق الألوان ونسب توزيعها، وكمان في حجم ونوع الديكورات. ومتقلقش في المقال ده عن استغلال مساحة الشقة الصغيرة هنعرف سوا إزاي نحول الشقة الضيقة لمكان مفتوح ومرتب وشيك، من غير هدم ولا تكلفة كبيرة، وكله بالأفكار اللي تنفع تتنفذ وتناسب ظروف بيوتنا.

كيفية استغلال مساحة الشقة الصغيرة

في الزمن ده ومع ارتفاع أسعار العقارات سواء للتمليك أو الإيجار بقى كتير من الناس بتتجه للشقق الصغيرة، ودا باعتبارها حل عملي ومناسب لحجم الميزانية المخصصة للسكن. لكن التحدي الحقيقي بيبدأ لما نيجي نعيش فيها؛ لأن هنا بنكتشف إن كل متر محتاج يتحسب ونستغله صح. وهنا بييجي دور استغلال مساحة الشقة الصغيرة بذكاء. مش بس علشان نحط كل حاجتنا، لكن كمان علشان نعيش مرتاحين ومنظمين. من غير إحساس بالزحمة أو الفوضى. والسر هنا مش في المساحة نفسها، لكن السر في إزاي نستخدمها صح، ونخلّي كل ركن في الشقة ليه وظيفة وتأثير. وده اللي هنتكلم عنه بالتفصيل في الفقرات الجاية.

تجهيزات الشقة، تجهيزات عش الزوجية، عش الزوجية

١-اللعب بالألوان والإضاءة: وسّع المكان بعينك قبل ما توسّعه فعليًا

أكتر حاجة بتأثر على إحساسنا بالمساحة هي الألوان والإضاءة. فمثلاً الألوان الغامقة بتكتم المكان. وبتخليه يبان أضيق بكتير من حقيقته. عشان كدا جرب تدهّن الحيطان بلون واحد فاتح زي الأبيض أو الرمادي الفاتح، وخلّي السقف نفس درجة الحيطان علشان ميعملش فصل بصري. كمان ممكن تدخل لمسات بسيطة من الألوان الزاهية في الستاير أو الإكسسوارات. بس من غير ما تملى المكان. أما الإضاءة بقى فهي حكاية تانية. حاول تفتح الستاير الصبح علشان الشمس تدخل، وبلليل استخدم لمبات قوية و”سبوت لايت” في الزوايا علشان تنور المكان كويس. وممكن كمان تستخدم أباجورات طويلة بتدي لمسة ساحرة وجميلة، وفي نفس الوقت بتفتح الأوضة بصريًا. وبتدي إحساس إن المكان واسع.

٢-استغل الحيطان: متسيبش فراغ ممكن ينفعك

الحيطان مش ديكور بس. دي كنز لو عرفت تستخدمه صح. يعني ممكن تعمل رفوف فوق الكنب علشان تحط كتب أو ديكورات أو حتى زرع صناعي. ولو عندك مطبخ مفتوح على الريسيبشن، ممكن تركب وحدة تخزين طولية على الحيطة تفصل بين المكانين وتستخدمها للأطباق أو التوابل.وفي أوضة النوم مثلاً الحيطة اللي فوق السرير ممكن تتحول لمكتبة صغيرة، أو رفوف بعلب تخزين. وممكن كمان تركّب منظم للحائط تعلق عليه مفاتيح، نظارات شمس أو حتى شنطك واغراضكم الشخصية.

٣-الأثاث متعدد الاستخدامات: صديق المساحة المحدودة

لو انت لسه بتجهّز شقتك حاول اختار الأثاث اللي ليه أكتر من وظيفة. زي السرير اللي فيه أدراج لتخزين الملايات. أو ترابيزة قهوة بتتفتح وتتحوّل لسفرة. وفيه كمان كنبة بتتفتح لسرير للضيوف، ومكاتب صغيرة بتتعلق في الحيط وتتفرد وقت الاستخدام. والفكرة هنا إن كل قطعة أثاث تشتريها لازم تسأل نفسك: “هتفيدني في إيه تاني؟”. ولو شقتك إيجار أو مش ناوي تغيّر فيها حاجات كبيرة، ممكن تبدأ تدريجيًا بشراء وحدات تخزين ذكية من أماكن زي “IKEA”، أو حتى من الحرفيين في منطقتك اللي بيعملوا أثاث حسب الطلب

تجهيزات الشقة تصميم داخلي ديكورات مودرن

٤-المرايات والستاير: حيل بسيطة بتفتح المكان

المرايات والستاير تأثيرهم كبير أوي، فمثلاً المرايا الكبيرة بتدي عمق للمكان، خصوصًا لو حطيتها مقابلة للشباك، لأنها هنا هتعكس النور وتدي إحساس بالوسع. وحاول استخدم مراية بإطار بسيط بلون فاتح، أو حتى مجموعة مرايات صغيرة بشكل ديكوري على الحيطة. أما بالنسبة للستاير الأفضل تختارها طويلة. تبدأ من السقف لحد الأرض، وحتى لو الشباك صغير الطول بيطوّل الحيطة بصريًا. كمان اختار خامات خفيفة زي الشيفون أو الكتان علشان النور يعدي منها. ولو تقدر خليك في درجات فاتحة زي الأبيض الكريمي أو الرمادي أو السماوي.

٥-استغلال المطابخ والحمامات: كل زاوية ليها استخدام

المطبخ الصغير محتاج شوية نظام وخيال. فممكن تركّب رف فوق التلاجة، أو علاقات على ضلفة الدولاب الداخلية، أو منظم معدني فوق الحوض للأطباق. واشتري علب تخزين شفافة وسهلة التخزين علشان تستغل كل رف. والحمام برضو ليه حلول. فمثلاً نعمل وحدة رفوف فوق الغسالة، أو بوكس بلاستيك تحت الحوض. وفي دلوقتي شماعات بتتركب على ضلفة باب الحمام من ورا، علشان تحط عليها الفوط أو مستلزماتك اليومية. كل التفاصيل الصغيرة دي هتخلي المكان منظم وأسهل في التنضيف. وضروري هنا التنسيق مع العروسة لأن في حاجات كتير هي ملزمة بتوفيرها.

تجهيزات الشقة

٦-التنظيم وتقليل الفوضى: الترتيب هو الملك

في الشقق الصغيرة التنظيم هو سر الراحة. كل ما تشيل الحاجات اللي مالهاش استخدام، كل ما هتحس إن بيتك أوسع. وعشان كده خصص كل درج لغرض، وكل رف لحاجة معينة. وحاول استعمل علب تنظيم من القماش أو البلاستيك، واحتفظ بالحاجات الموسمية في بوكسات تحت السرير.كمان مهم تعمل روتين شهري لترتيب الشقة. اسأل نفسك كل شهر: “أنا استخدمت الحاجة دي آخر 30 يوم؟” لو لأ، يبقى مكانها في التخزين أو عند حد تاني يستفيد منها. وبكدا نتجنب أي زحمة مش ضرورية في الشقة.