أفكار تجميلية للمطابخ الصغيرة

أفكار تجميلية للمطابخ الصغيرة هتكون مهمة جداً بالنسبة لك لو بتعاني من الطبخ في المطابخ الضيقة.

فأكيد هتواجهي المتاعب المعتادة في النوع ده من المطابخ، زي:

إن المطبخ حجمه صغير، ومساحة العمل محدودة مش مخلياكي تاخدي راحتك.

ده غير إن بطبيعة الحال صغر حجم المطبخ بيترتب عليه صغر حجم الأجهزة اللي فيه زي الفرن والبوتجاز.

وكمان ضيق مساحات التخزين في خزانات المطبخ.

وبرغم كدة في حيل ممكن تستخدموها وتخلي مطبخكم يبان أوسع.

زي إنكم تمددوا خزاين المطبخ لحد السقف مهما كان حجم المطبخ، ده هيخلي السقف يبان أعلى والمطبخ أوسع.

كمان لما تغيروا لون خزاين المطبخ بألوان زاهية لدرجة اللون الباهت اللي بتكونوا مستخدمينها في الحيطان.

فده برضه بيضيف له وسع أكتر، حتى التفاصيل الصغيرة اللي ممكن تضيفوها على المطبخ هتضيفله لمسة جمالية وتسيب أثر.

زي إنكم تضيفوا شريط نحاسي مثلاً على الحيط.

أو استخدموا أدوات معدنية عتيقة تسيب بصمتكم الشخصية على المكان.

وأفكار تانية كتير تقدروا تستخدموها في مطابخكم تديله وسع وروح وأناقة.

في النهاية المطبخ ده المكان اللي عروستنا هتقضي فيه أطول وقت وهي بتحضر الأكل لعريسها حبيبها وولادكم بعد كدة.

فلازم يكون الوقت ده ممتع ومشرق وفي مكان جميل ونضيف ومبهج.

وعشان كدة احنا هنا في المقال ده جمعنا لكم أكبر عدد من الأفكار اللي تقدروا تستغلوها عشان توصلوا للنتيجة دي.

فتابعوا معانا المقال.

أفكار تجميلية للمطابخ الصغيرة الوردية:

لو عروستنا لسة فيها روح الطفولة البريئة وبتحب ألوان البنات الهادية الرومانسية؛ فتقدروا تزينوا مطبخكم باللون الوردي.

وده بإنكم تدهنوا الحيطان وخزاين المطبخ بدرجتين من اللون الوردي، الحيطان بدرجة باهتة، وأماكن التخزين بدرجة أغمق.

وبكدة المطبخ هيبقى أحلى مطبخ لعروسة باربي جميلة تقف تجهز فيه أحلى الأكلات لعريسها وأهلهم لما يعزموهم.

استخدام ورق الحائط:

مين قال إن ورق الحائط بيكون بس في الليفينج وأوض النوم؟ لا تقدروا تستخدموه كمان في أفكار تجميلية للمطابخ الصغيرة.

وده لإن ورق الحائط بيضيف لمسة جمال مبتكرة على أي مكان يتحط فيه، وخصوصاً الأماكن الضيقة.

تثبيت عناصر إضاءة جذابة:

تجميل المطابخ من النوع ده مش لازم يكون بس من خلال وحدات التخزين وأماكن الأجهزة ودهاناتها وألوان الحوايط والأرضيات.

حتى الإضاءة ممكن تستخدموها في التجميل، وده بإنكم تركبوا عناصر إضاءة تكون جذابة للنظر.

فممكن مثلاً تبقى عبارة عن مصابيح معلقة ومتغلفة بقماش أو ورق مقوى بأشكال جذابة.

الألوان المحايدة من أفكار تجميلية للمطابخ الصغيرة:

الألوان المحايدة زي البيج والكريمي والأوف وايت ودرجاتهم المختلفة بتضفي الهدوء والسكينة على المكان.

وده شعور انت أكيد بتكوني محتاجاه طول الوقت وانت في المطبخ وواقفة على رجلك بتجهزي الأكل.

عشان كدة تقدري تستخدمي الألوان دي في دهانات الخزاين والحيطان.

وممكن كمان تبدلي الحيطان والسقف بإنك تعمليها بلاط سيراميك بنفس الألوان دي مع نقشات مبهجة عليها.

المطابخ الريفية القديمة:

يمكن دايماً الموضات الحديثة في المطابخ بتخلينا نصممها بطريقة تبان فيها مودرن وبتعتمد أكتر على الاستايلات المعدنية في تصميماتها.

لكن احدث اتجاهات الموضة دلوقتي في كل المجالات بقت بتعتمد أكتر على إننا نرجع للقديم والبساطة.

وعشان كدة تقدروا تعتمدوا في تجميل مطابخكم على تفاصيل صغيرة كنا بنشوفها زمان في مطابخ جداتنا.

ودي زي مثلاً إننا نحط ستاير قماش صغيرة بدل ضرف أماكن التخزين، وبكدة كمان نتخلص من الأبواب والمفصلات اللي ممكن تبقى بتعملنا زحمة كل ما نفتح ونقفل فيها.

استبدال الخزائن بالرفوف في أفكار تجميلية للمطابخ الصغيرة:

واستثماراً للمساحة كمان، وعشان منستغلهاش في زجمة مش هتنفعنا؛ فنقدر نبدل وحدات التخزين الكاملة برفوف بس.

وبكدة هنقدر نستغل أكبر مساحة ممكنة من المطبخ، ونرتب عليها أدوات المطبخ أو أي وحدات تزيينية نحب نستخدمها براحتنا وبشكل جمالي محبب.

والرفوف دي ممكن تبقى رفوف حرة منفصلة من الحديد والفولاذ، أو ممكن برضه تكون رفوف مكتبية متصلة من الخشب.

وفي نهاية المقال نتمنى إننا نكون قدمنا لكم أفكار تجميلية للمطابخ الصغيرة تساعدكم في تصميم مطابخكم وإنكم تضيفوا لها الجاذبية والحيوية اللي تحبوها.

ونتمنى لكم بداية حياة زوجية سعيدة مليانة حب وفرح ووصفات أكل شهية وهنية.