الأخطاء الشائعة في اختيار شقة الجواز

اختيار شقة الجواز واحد من أهم القرارات اللي بتواجه أي عريس وعروسة قبل ما يبدؤوا حياتهم سوا. بس مع الحماس والتوتر والضغوطات، ساعات بنقع في أخطاء ممكن تخلينا نخسر الراحة اللي كنا بندور عليها. علشان كده مهم نكون عارفين إيه هي أكتر الأخطاء اللي ناس كتير بتقع فيها وهما بيختاروا شقة الزواج؛ علشان نتفاداها ونبدأ حياتنا براحة وسعادة مش بمشاكل وهموم، وفي الفقرات الجاية هنتكلم عن الأخطاء الشائعة في اختيار شقة الجواز بالتفصيل.

أهم الأخطاء الشائعة في اختيار شقة الجواز

للأسف معظمنا وقت الاختيار مش بيكون عنده حرية كفاية. لأنه بيكون محكوم بحاجات كتير منها الميزانية، أو أن مفيش وقت كفاية عشان يختار، أو أنه مرتبط بمنطقة معينة فيها الأسرة ولازم تكون شقة الجواز في نفس المنطقة. لكن رغم ضيق الاختيارات لازم ناخد بالنا من أهم الأخطاء الشائعة في اختيار شقة الجواز، وهي:

تجهيزات عش الزوجية

١- اختيار الشقة بناءً على الشكل بس

واحدة من أكتر الأخطاء الشائعة في اختيار شقة الجواز. واللي ناس كتير بتعملها هي إنهم يختاروا شقة علشان شكلها حلو. أو علشان فيها ديكورات جذابة. وبيتغافلوا عن حاجات أهم زي الموقع، جودة المبنى، أو حالة السباكة والكهرباء. والحقيقة إن الشقة مش شكل وبس، هي راحة طويلة المدى، فمتخليش المظاهر تخدعك.

٢- التسرع في الشراء من غير دراسة كفاية

الضغط من الأهل، أو الاستعجال علشان ميعاد الفرح. ممكن يخلي ناس كتير تاخد قرار سريع من غير ما تشوف اختيارات كفاية، أو حتى من غير ما تستشير حد متخصص. وده ممكن يخليهم يندموا بعد كده على اختيار مش مناسب. عشان كدا لازم وقت الاختيار ناخد وقتنا وندور ونسأل كفاية وبلاش الاستعجال.

تجهيز شقة العريس

٣- إهمال البنود القانونية

في ناس بتفرح إنها لقت شقة كويسة وسعرها مناسب، وبتنسى تقرأ العقد كويس أو تتأكد إن الأوراق كلها سليمة. وده ممكن يسبب مشاكل قانونية كبيرة بعد كده. عشان كدا لازم أي شقة تشتريها يكون ليها أوراق سليمة، وصاحبها واضح، والعقد فيه كل التفاصيل والحقوق. وإلا بعد كدا ممكن نلاقي نفسنا في مشاكل قانونية، ومعرضين لخسارة عش الزوجية.

٤- عدم الاتفاق على الأولويات مع الشريك

ساعات بيكون كل طرف في العلاقة ليه تصور مختلف عن الشقة. واحد عايزها في حي راقي، والتاني عايزها قريبة من شغله. واحد بيحب الدور الأرضي، والتاني نفسه في دور عالي. الاختلاف ده لو متحلش من الأول، ممكن يعمل توتر بعد الجواز. علشان كده مهم من البداية تتفقوا على أولوياتكم سوا. ومهم كمان يكون الاتفاق قبل ما نبدأ ندور، عشان منخسرش وقت أو جهد والطرف التاني مش مقتنع بكل ده.

أفضل النصائح لاختيار شقة مثالية للزواج

٥- التغاضي عن تكاليف ما بعد الشراء

ناس كتير وهي بتشتري الشقة بتفكر بس في تمنها. وبتنسى تكاليف التشطيب، والفرش، والصيانة، والمرافق. وده بيخليهم يكتشفوا بعدين إن الشقة كلفتهم أكتر بكتير من المتوقع، وده بيعمل أزمة مالية ممكن تأثر على بداية الحياة الزوجية. عشان كدا لازم نحسب كل حاجة من الأول. ونقارن بين أسعار الشقق لو جاهزة أو لو محتاجة تشطيب وتجهيز وبعدها نختار المناسب لينا.

٦- عدم تقييم المنطقة كويس

إهمال تقييم المنطقة واحد من أسوء الأخطاء الشائعة في اختيار شقة الجواز؛ لأنه ممكن تلاقي شقة شكلها حلو وسعرها مغري. لكن لما تبدأ تعيش فيها تكتشف إن المنطقة زحمة جدًا، أو فيها ضوضاء، أو مفيهاش خدمات قريبة. علشان كده قبل ما تشتري لازم تزور المكان في أوقات مختلفة، وتشوف هل يناسبك فعلًا ولا لأ. وكمان ضروري نتأكد من توفر كل أنواع الخدمات، ونشوف الخروج والتنقل سهل ولا صعب خصوصاً لو مفيش عربية خاصة، وكمان نتخيل مستقبل الأطفال في المنطقة. نشوف المدارس وأماكن خدمات الأطفال. وهل المنطقة آمنة ليهم ولا لأ، وإهمال أي عامل من العوامل دي هيكون ليه نتايج كارثية بعد كدا.

تصميم غرف المعيشة

٨- اختيار شقة أكبر من الاحتياج الحقيقي

من الأخطاء الشائعة في اختيار شقة الجواز أن بعض الناس بتفكر إن “كل ما كانت الشقة أكبر كل ما كانت أحسن”، وده مش دايمًا صح. ساعات الشقة الكبيرة بتبقى مكلفة جدًا في الفرش والصيانة ومش مناسبة لعدد الأفراد في البداية. خليك واقعي، واختار مساحة تناسب احتياجك الحقيقي. ولازم نكون متصالحين مع نفسنا وعارفين حدود إمكانيتنا كويس. وإلا هنتحمل ضغط مالي كبير من بداية حياتنا. وكمان هيكون ضغط بدون قيمة أو استفادة حقيقية.