تحديد قائمة ضيوف الفرح خطوات تساعدك في إنجازها بسرعة

تحديد قائمة ضيوف الفرح من أكتر المهام صعوبة وتقل دم على قلبك أكيد، إنك تقعد تحدد هتبعت الدعوة لمين ومين هتضطر تتجاهله.

وده عشان متتجاوزش مساحة القاعة والميزانية اللي حددتها من الأول لفرحك.

وعلى الرغم من صعوبة المهمة وإرهاقها إلا إنها من أول المهام اللي لازم تقوم بيها.

وأول خطوات المهمة دي هي إنك تتكلم مع أهلك وعروستك وأهلها؛ عشان تقدروا تحددوا مع بعض عدد الضيوف اللي هتقدر تتحمل تكلفتهم.

وأهم حاجة لازم تاخدوا بالكم منها من الأول إنكم تفضلوا منظمين طول الوقت.

وده تحققه بإنك تجمع معلومات التواصل مع المعازيم كلها في مكان واحد عشان تقدر توصلها بسهولة وقت ما تحب.

وبالتالي تقدر تحدد منها مين اللي هتبعت له ومين لا، وتقدر تدي القايمة النهائية لمنظم الحفلة أو إدارة القاعة.

وفي المقال ده حاولنا نجمع لكم الخطوات اللي هتساعدكم في تحديد قائمة ضيوف الفرح وايه الحاجات اللي لازم تحطوها في اعتباركم وانتم بتخططوا ليها.

فتابعوا معانا المقال.

نمط الفرح:

أول حاجة لازم تحطوها في اعتباركم وانتم بتقرروا تحديد قائمة ضيوف الفرح هي تيمة ونمط الحفلة اللي هتعملوها.

ايه طبيعة فرحكم اللي تخيلتوه مع بعض؟ هل ناويين إنه يكون فرح حميمي مع الأهل وأقرب الأصدقاء بس؟

ولا بتفكروا إنه يكون فرح كبير فيه معازيم كتير تسهروا معاهم لوش الصبح؟ وهل هيكون فرح عائلي ومسموح فيه بالأطفال ولا هيكون فرح للكبار بس؟

أو هل ناويين مثلاً إنكم تعملوه في بلد تانية، وده سواء محافظة غير محافظتكم جوة مصر، زي إنكم تكونوا ناويين تعملوه على البحر في إسكندرية أو الغردقة مثلاً.

أو لو انتم من محافظة إقليمية وناويين تعملوه في القاهرة، أو ناويين تعملوه في دولة تانية خالص برة مصر.

في أي حال من الأحوال دي؛ فده هيأثر على قايمة ضيوفكم، مين منهم هيكون مستعد يسافر ومين لا.

وبعد ما تحددوا نمط فرحكم هتقدر تحددوا بناء عليه طبيعة المعازيم اللي هيكونوا مناسبين لإنكم تعزموهم في فرحكم.

تحديد قائمة ضيوف الفرح بتقسيمها:

وعشان تقدروا تسهلوا الموضوع عليكم أكتر؛ فتقدروا تقسموا القايمة على تلات أتلات، بحيث يكون تلت لقرايب العريس وتلت لقرايب العروسة وتلت لأصحابكم وزمايل الشغل.

وده طبعاً بعد ما تكونوا حددتوا العدد اللي هتقدروا تعزموه بناء على ميزانيتكم؛ فتقسموا العدد ده بالطريقة دي.

لكن ده مش معناه برضه انكم ملتزمين بالتقسيمة دي إلتزام جبري، يعني لو قرايب حد فيكم أو صحابكم مكملوش عدد التلت اللي حددتوه يبقى فيه مرونة في الموضوع.

وإنما مش لازم تعزموا حد عمركم ما قابلتوه من قرايبكم مثلاً عشان تكملوا بيه العدد وخلاص، لا تقدروا تضيفوا في التلت بتاعهم من صحابكم أو من قرايب الطرف التاني.

ترتيب الأولويات:

وارد جداً إنك بعد ما تخلص تحديد قائمة ضيوف الفرح تلاقي إن عددها أكبر من اللي انت مقرره وإنك محتاج تقلل العدد ده.

وعشان متكونش مضطر إنك تعيد القايمة من الأول تاني خليك مركز إنك ترتبها من الأهم فالمهم فالأقل أهمية.

يعني على سبيل المثال أخواتك وأزواجهم مثلاً أهم من صحاب والدك في النادي، فالترتيب من المفترض إنه يكون:

العيلة المباشرة (اللي هم الأب والأم والخوات)، بعدهم العيلة الأكبر (اللي هم الأجداد والأعمام والأخوال وولادهم).

وفي نفس المرتبة تقريباً الأصدقاء المقربين اللي هيكونوا وصيفات العروسة وصحاب العريس الأنتيم اللي هيكونوا معاه طول الوقت.

وبعدهم الصحاب اللي في مرتبة أقل، والأهل البعاد اللي من الدرجة التالتة والرابعة، وزمايل الشغل.

لما ترتب القايمة بالطريقة دي هيبقى متاح ليك تقدر تفهم الأعداد اللي هتحتاجها في كل خانة منهم، ومين تقدر تتخلى عنه لو الإمكانية مسمحتش من غير ما تأذي مشاعر حد.

ساعتها هتبدأ تقلل العدد من تحت لفوق، ومتفترضش أبداً إنك هتعزم كل الناس حتى لو عددهم أكبر من إمكانيات القاعة وميزانيتك.

وانت حاطط في دماغك إن فيه ناس ممكن متجيش في الآخر، ممكن يفاجئوك ويجوا كلهم وساعتها مش هتعرف تتصرف.

استخدم الحسابات في تحديد قائمة ضيوف الفرح:

ممكن تكون متصور إن الموضوع مش محتاج كل ده، بس لو مش عايز تتفاجئ بحاجات مش متوقعها في اليوم نفسه لازم تبقى عامل حسابك من الأول.

لما تعزم حد من صحابك أو قرايبك لازم تبقى حاطط في اعتبارك هل هو عازب وبيتحرك لوحده ولا متجوز وطبيعي هيجي مع مراته أو هتيجي مع جوزها؟

ولو متجوز أو سبق له الجواز وعنده أطفال؛ فهل هيجيبهم معاه ولا لا؟ وهل هيكون معاهم مربية مثلاً بتاخد بالها من العيال؟

كل دي حسابات محتاج تحطها في تخطيطاتك؛ لإنها بتأثر في النهاية على عدد الوجبات اللي هتحتاجها، وسعة المكان.

وكذلك عدد الكراسي والترابيزات، والهدايا التذكارية اللي ممكن توزعوها على المعازيم في الحفلة.

وفي نهاية المقال نتمنى اننا نكون قدمنا لك خطوات مفيدة تساعدك في تحديد قائمة ضيوف الفرح بسهولة وتريحك من الحيرة فيها.

ونتمنى لك في النهاية فرح سعيد مليان بأهل وصحاب بيحبوكم ويتمنوا لكم بداية حياة زوجية سعيدة مليانة حب وهنا.