تدخل الأهل في الحياة الزوجية كيفية تجنبه بطريقة مثالية ؟

بالرغم من أن الأهل مصدر أمان لينا. لكن معظمنا بيحاول يلاقي طريقة تمكنه من تجنب تدخل الأهل في الحياة الزوجية. لأن الحياة الزوجية الناجحة مبنية على التفاهم والخصوصية، وبقدر ما وجود الأهل مفيد في حياتنا، بقدر ما بيكون ليه تأثير سلبي. ودا بيحصل لما منعرفش نوازن بين وجود الأهل، وبين تدخلهم في مسار العلاقة. أو التأثير عليها والتحكم فيها، وفي المقال ده هنعرض كل المعلومات المهمة عن تدخل الأهل، وهنوضح الأسباب والتأثير والحلول والنصائح، عشان نقدر نعيش حياة زوجية سعيدة.

الحياة الزوجية

أسباب تدخل الأهل في الحياة الزوجية

قبل ما نعرف طرق تجنب تدخل الأهل في الحياة الزوجية. لازم نعرف أسباب تدخلهم، عشان تكون الحلول معروف استخدامها مع أي سبب، وأسباب تدخل الأهل هي:

• الاعتماد على الأهل: الاعتماد على الأهل بعد الجواز بيكون اعتماد مادي أو عاطفي، وفي الحالتين الأهل بيفتكروا أن ليهم حق التدخل في العلاقة، عشان كدا لازم نوفر الدعم لشريكنا، ونسد أي ثغرة ممكن يدخل منها طرف تالت.
• التأثير الثقافي: قبل ما نقرر نكمل مع شريك حياتنا لازم نعرف تأثير البيئة وثقافة التربية عليه. لأن في أسر عودت الأبناء على التدخل المطلق، وهنا بيكون الأب والأم مصدر السلطة حتى بعد الجواز، وبكدا يكون شريك حياتنا مسلوب الإرادة بدون شخصية.
• ضعف التواصل: ضعف التواصل بيحصل لما الطرف التاني يكون بيرفض يسمعنا، أو مش فاهم مشاعرنا ومشاكلنا. أو مش مهتم بيها، وهنا الطرف المتضرر بيحاول يتواصل مع الأهل، وبكدا يفتح باب لتدخلهم في العلاقة الزوجية.
• الرغبة في السيطرة: أحياناً بتكون شخصية الأب والأم أقوى من الإبن وبتفرض سيطرتها عليه. وهنا عادي أم الزوجة تختار الأكل واللبس وتحدد تصرفات الزوجة، وكذلك سيطرة الأب والأم على الزوج. وكأنه ممثل بيمشي حسب الدور المكتوب.
• غياب الحدود: العلاقة عشان يكون فيها خصوصية لازم يكون ليها حدود، ونعرف امتى نتكلم وعن إيه نتكلم، وايه المسموح أن حد يتدخل فيه، وإلا هتكون حياة الزوجين كتاب مفتوح أي حد ممكن يعدل فيه لحد ما يتشوه.

تأثير تدخل الأهل في الحياة الزوجية

بمجرد ما نلاحظ أي صورة من صور تدخل الأهل، لازم نبدأ نلاقي حلول، وإلا هنكون بنتنازل عن الخصوصية. وبنراهن مع الأيام على علاقتنا، ونكون عرضة لأي خلاف هيحصل، دا غير التأثير السلبي جداً لتدخلهم وهو:

• انعدام الخصوصية: الخصوصية هي أهم سبب من أسباب استقرار الزواج، وهي أول حاجة هنخسرها لو سمحنا بتدخل الأهل؛ لأن قراراتنا وتفاعلاتنا هتكون مكشوفة للكل ومتأثرة برأيهم.
• زيادة التوتر: وقت أي خلاف بسيط، أو قصاد أي رغبة للطرف التاني تدخل الأهل بيسبب كوارث. وممكن تكون المشكلة هتتحل أو الرغبة هتتنفذ، لكن بسبب تأثير الأهل تضيع الحلول. وتدخل العلاقة في مسار نهايته كارثية.
• هدم الثقة: الثقة مهمة جداً بين الزوجين، ولو سمحنا بتدخل الأهل هتضيع الثقة، ويبدأ الشك فكل رغبة أو قرار؛ بسبب أننا مش عارفين هل دا فعلاً قرار شريكنا ولا دا قرار أهله!.

نصائح للعروسة قبل الزواج

كيفية تجنب دخول الأهل في الحياة الزوجية

بعد ما عرفنا الأسباب والتأثير دلوقتي هنعرف الطرق. عشان نقدر نتجنب تدخل أهل البيت في الحياة الزوجية، وأهم الطرق هي:

١-الاتفاق على حدود واضحة من البداية

قبل الجواز نحاول نتفق مع شريك حياتنا على حدود واضحة. عشان يفهم أقصى تدخل مسموح للأهل، ويقدر يشاركه معاهم بأدب، ولو ده محصلش قبل الجواز فممكن بعد أول تدخل نتناقش فيه بهدوء من غير انتقاض قاسي عشان المشكلة متكبرش.

٢-تعزيز الاستقلالية المادية والعاطفية

أغلب صور تدخل الأهل بسبب الاستقلالية بتكون لأسباب مادية أو عاطفية. ذي أن أهل الزوج يكونوا متكفلين بمساعدته مادياً بعد الجواز، أو أهل الزوجة يعرفوا التفاصيل المادية للزوج، ودا بيخلي الأهل يتدخلوا، وكمان عاطفياً لما نحكي مشكلة للأهل أو نعبر عن شعور زوجي هنا بنسمح ليهم بتدخل مش هينتهي، عشان كدا لازم نحافظ على الخصوصية بقدر الإمكان.

٣-بناء علاقة احترام مع الأهل

رفض تدخل الزوج لرأي أهله. أو رفض تدخل الزوجة لرأي أهلها هيكون ليه عواقب ممكن توصل للقطيعة، وكذلك لو انتقض الزوج رأي أهل الزوجة ممكن تحصل مشكلة والعكس صحيح، عشان كدا لازم نبني علاقة احترام لما نستقبل أي رأي أو توجيه. ونرد بجمل دبلوماسية شوية ذي ( أنا ممتن لنصيحتك يا أمي وهفكر مع زوجتي وهناخد قرار سليم) هنا أحنا مرفضناش النصيحة. ولا قدمنا وعد أننا نلتزم بيها، وكمان وضحنا بطريقة غير مباشرة قيمة رأي الزوجة وتأثيرها.

٤-إدارة الشكاوي بحكمة

آخر وأهم طريقة هي الحكمة في إدارة الشكاوي. لازم نكون فاهمين أن حل المشكلة موجود لو سمعنا بعض وحاولنا نرضي بعض، ونحاول أننا منتكلمش عن سلبيات الطرف التاني قصاد الأهل إلا لو وصل الأمر للتعنيف مثلاً، ولو احتاجنا رأي حد بلاش يكون رأي الأهل. والأفضل ناخد رأي شخص محايد.

أسرار السعادة الزوجية

نتيجة منع تحكم الأهل في الحياة الزوجية

للأسف بنفتكر أننا لما نمنع تدخل الأهل هنخسرهم. وأننا لما نرفض تحكمهم في حياتنا بعد الجواز هنكون بنعصيهم. ودا فكر موروث، لكن بين بر الوالدين وودهم وبين الحفاظ على الاستقلالية وخصوصية الزواج شعرة بسيطة، فلازم نركز فكل قرار وكل ردة فعل عشان منخسرش شريك حياتنا أو نخسر أهلنا، ولازم نكون عارفين أن معركة الحفاظ على العلاقة وخصوصيتها تستحق، وأن مهما كانت صعبة النتيجة هتكون كويسة، ولازم نكون فاهمين أن أي شخص ناضج قادر يتحكم في حياته، ومش طبيعي أننا نكون اعتماديين حتى بعد الجواز.