موسيقى حفل الزفاف فاجئ عروستك باختياراتك على حسب ميزانيتك

موسيقى حفل الزفاف هي أكتر حاجة بتحدد طبيعة الفرح وأجواءه، زي الموسيقى التصويرية لأي فيلم.

وفرحك أكيد المفروض ياخد طابع الفيلم الرومانسي، حتى لو كنتم مختارين له تيمات من عوالم السحر والفانتازيا والمغامرات.

إلا إنه في النهاية كل ده لازم يتغلف في الآخر بالطابع الرومانسي.

والموسيقى هي اللي هتسلط الضوء على كل لحظة مهمة في الفرح، سواء كانت زفتكم وانتم داخلين ممر القاعة.

أو لحظة القبلة الأولى اللي هتجمعكم مع بعض، أو وقت تقطيع التورتة.

أول حاجة ضيوفكم هياخدوا بالهم منها هي الموسيقى اللي بتتعزف حواليهم.

وعشان كدة الموسيقى دي لازم تعكس شخصيتكم ورؤيتكم لتيمة فرحكم.

ولإن عروستك هتكون مشغولة بتفاصيل كتير تانية في الفرح وفي مظهرها.

وغالباً مش هتهتم في الجانب ده غير إنها تختار البلاي ليست اللي هتشتغل في الفرح؛ فانت تقدر تتولى الموضوع ده لوحدك.

وتفاجئها بحاجات مجتش في بالها تعبر لها بيها عن حبك واهتمامك وإنك بذلت مجهود في التحضير لفرحكم زيها.

والسؤال اللي ممكن يجي في بالك دلوقتي هو إزاي أقدر أعمل ده وأختار الموسيقى المناسبة اللي تفاجئها وتبسطها؟

أول خطوة طبعاً في الموضوع انك تقدر تختار مختصين الموسيقى المناسبين للأفراح، واللي يقدروا يضيفوا البهجة والحيوية فيه.

وبعد كدة تقدر تشتغل معاهم على اختياراتك والأجواء اللي عايزها في كل فقرة.

واحنا هنا في المقال ده جمعنا لك كل التفاصيل اللي ممكن تحتاجها وانت بتتفق على موسيقى حفل الزفاف.

فتابع معانا المقال للنهاية.

عايز الموسيقى حية ولا مسجلة؟:

لو كنت متعاقد مع دي جيه في الفرح؛ فده معناه انه يقدر يشغلكم الموسيقى اللي انتم عايزينها طول فقرات الحفلة.

لكن ده ميمنعش إن في مزايا مختلفة لو جبت موسيقيين مخصوص يعزفوا بنفسهم في فقرات معينة.

سواء من الناحية العملية أو من الناحية الجمالية للفرح، زي مثلاً فقرة الزفة ودخولكم للقاعة.

الدي جيه مش هيقدر يحدد التوقيت ده بالظبط خصوصاً إنه بيكون جوه القاعة ومش شايفكم.

في حين إن الموسيقيين بيستقبلوكم من أول لحظة ويصاحبوكم خلال الممر كله، ويقدروا يخلوا موسيقى حفل الزفاف سلسة ومناسبة لأجواء اللحظة دي.

فهم يقدروا يغيروا في التوقيت براحتهم بحيث يتناسب مع حركتهم؛ فمفيش أحسن من إن العروسة تمشي براحتها في الممر بالسرعة اللي تناسبها.

وتفضل الموسيقى شغالة معاها لحد ما توصل، وتخلص أول ما تدخل القاعة، وكإن الموسيقى دي محطوطة مخصوص ليها.

ده غير إن الأجواء العامة اللي بتخلقها الموسيقى الحية بتخليها مختلفة تماماً عن التسجيلات المعتادة.

خصوصاً لما تظهر في لحظات معينة وتحولها للحظات خالدة محدش ينساها أبداً، وضيوفكم هيقدروا اللحظات دي جداً.

حتى لو كانت لحظات قليلة من عازف واحد أو اتنين تضيف لمسة حميمية لفقرات معينة في الفرح، مش لازم فرقة كاملة.

حدد نوع موسيقى حفل الزفاف الحية اللي عايزها:

لو استقريت خلاص على إنك هتجيب عازفين حقيقين للموسيقى في فرحك؛ فممكن تحتار بعد كدة في أنهي نوع من العازفين اللي تجيبه وعددهم؟

هل تجيب فرقة وتريات مثلاً ولا تكتفي بعازف جيتار أو كمان، أو عازف ناي أو عازف بيانو، ولا تجيب فرقة كاملة؟

فيه حاجات لازم تحطها في اعتبارك وانت بتحدد التفاصيل دي زي المكان مثلاً؛ فلو الفرح في مكان أوبن اير تقدر تختار فرق الموسيقى الكبيرة لإن المكان هيساعهم.

وكمان أنواع الموسيقى العالية زي الطبول لإنها مبتحتاجش ميكروفونات وتقدر توصل للكل بسهولة.

أما لو مكان مقفول زي القاعات المعتادة؛ فتقدر تختار الآلات البسيطة الرقيقة زي الجيتار والكمان والناي، وده لإن القاعات هتوفر لها مكبرات صوت تخلي الكل يقدر يسمعها.

وبرضه نمط الفرح عموماً بيأثر على اختياراتك، هل هو فرح كبير رسمي؛ ففي الحالة دي هتكون الخيارات المناسبة ليه الآلات الراقية زي البيانو والتشيلو مثلاً.

ولا فرح حميمي قايم على القرايب والأصدقاء المقربين؛ فالأجواء فيه هتكون حيوية أكتر يناسبها آلات زي الجيتار والأورج والطبول مثلاً.

وهيساعدك في النقطة دي كمان إنك تكون محدد طبيعة الموسيقى اللي عايزها في فرحك ونوعها، وبناء عليه هتختار الآلات اللي تقدر تعزف الموسيقى دي.

حدد ميزانيتك:

متندمجش في الموضوع وتتفق على حاجات كتير وانت مش مقرر ميزانيتك في موسيقى حفل الزفاف هتكون قد ايه بالظبط؟

قبل ما تاخد أي قرار لازم تشوف ايه الميزانية المتاحة ليك، والميزانية دي تقدر تغطي ايه بالظبط؟

وحط في اعتبارك إن كل ما زاد عدد الفرقة اللي هتيجي تعزف في فرحك هيزيد أجرهم، وبالتالي هتحتاج لميزانية أكبر.

وعادة مبيكونش فيه فرق سعر كبير بين الفرق أو العازفين المختلفين، لكن الأفضل منهم بيكون عندهم ضغط شغل ومواعيد أكتر.

فحاول تتفق مع الفرقة أو العازف اللي هتحتاجه من بدري مش قبل الفرح على طول، واسمع عزفهم قبل ما تتفق معاهم.

وده سواء بإنك تحضر حفلة ليهم أو من على صفحات السوشيال ميديا الخاصة بيهم، واختار معاهم الأغاني أو الموسيقى اللي هيعزفوها بناء على فقرة ظهورهم في الفرح.

فأكيد الأغاني أو الموسيقى اللي ممكن تتعزف وانتم داخلين القاعة غير اللي هتتعزف وانتم بتبدلوا الخواتم.

وكذلك هتكون مختلفة عن موسيقى حفل الزفاف اللي ممكن تتعزف وانتم بترقصوا رقصتكم السلو الأولى أو لحظة تقطيع التورتة.

أو الموسيقى الأخيرة اللي ممكن تتعزف وانتم بتودعوا ضيوفكم وبتخرجوا من القاعة عشان تبدأوا حياتكم الجديدة مع بعض.

وفي كل الاختيارات دي حاول تكون اختياراتك متوافقة مع نوع الموسيقى والأغاني اللي عروستك بتحبها وهتبقى سعيدة لما تفاجئها بيها.

وفي النهاية نتمنى إننا نكون قدمنا لك أفكار تساعدك في اختيار موسيقى حفل الزفاف اللي تفاجئ عروستك بيها وتخليها تحس انك أكتر حد فاهمها وبيبقدرها في الدنيا.

ونتمنى لكم فرح سعيد مليان مفاجئات سعيدة وبداية حياة زوجية أبدية مليانة حب وفرح طول الوقت.